မ့ၣ်ရံၣ်ရှဲလ့ၣ် (Mary Shelley) အလံာ်တၢ်ကွဲးပူ ဖရၣ်ကဲၣ်စတ့ ‘Frankenstein’ အပူၤ, “တၢ်မုၢ်ဃၢ်” မ့ၢ်ဝဲ လံာ်လဲၢ်က့ၢ်ဂီၤလၢ အဘၣ်တၢ်သ့ၣ်ညါအီၤ အါကတၢၢ်အကျါတဂၤ လၢအထုးန့ၢ်သူၣ်န့ၢ်သး ပသးအတၢ်ဆိကမိၣ်န့ၣ်လီၤ. ဘၣ်ဆၣ်, ပှၤလၢအဖးပူ လီၤတံၢ်လီၤဆဲးတဖၣ် သ့ၣ်ညါဝဲလၢ တၢ်နီၢ်နီၢ်န့ၣ်, ရှဲလ့ၣ် အဲၣ်ဒိးပာ်ဖျါထီၣ် ဘ့းထၢၣ် ဖရၣ်ကဲၣ်စတ့, မ့ၢ်ပှၤစဲအ့ၣ်ဖိလၢ အနာ်ကမၣ်တၢ်, လၢအဒုးအိၣ်ထီၣ် တၢ်မုၢ်ဃၢ်အံၤ, အနီၢ်ကစၢ်ဒၣ်ဝဲ မ့ၢ်တၢ်မုၢ်ဃၢ်နီၢ်နီၢ်န့ၣ်လီၤ. တၢ်တ့ဒုးအိၣ်ထီၣ် တၢ်မုၢ်ဃၢ်လၢ အသူၣ်ဆးသးဆးတဂၤအံၤဝံၤန့ၣ်, ဘ့းထၢၣ် တဟ့ၣ်ဝဲ တၢ်မုၢ်ဃၢ်အံၤ လၢတၢ်နဲၣ်လိပၢဆှၢအီၤ, တၢ်ရ့လိာ်သကိးသး, မ့တမ့ၢ်, လၢတၢ်သူၣ်ခုသးခုအဂီၢ်တၢ်မုၢ်လၢ်အဃိ- တၢ်မုၢ်ဃၢ်အံၤ ဖျါဒ်သိး တၢ်မၤသးဟးဂီၤအီၤ, ဒီးတၢ်မၤသူၣ်ဒိၣ်သးဖျိးအီၤန့ၣ်လီၤ. တၢ်မုၢ်ဃၢ်လၢ အသးဆးအံၤ ထံၣ်လိာ်အသးဒီးဘ့းထၢၣ်, ဒီးကအုကစွါဝဲ, “နၤ, ယတၢ်ဘၣ်တ့ကစၢ်ဧၢ, နမၤဟးဂီၤကွံာ်ယၤဆူ တၢ်အက့အခီ, ဒီးသးမုာ်သးမံလၢ နမၤနၢၤတၢ်” န့ၣ်လီၤ.
ယွၤအကလုၢ်ကထါ နဲၣ်ဖျါထီၣ် တၢ်ဘၣ်တ့ခဲလၢာ်အကစၢ် အမ့ၢ်အတီတဂၤ လီၤဆီဝဲဒ်လဲၣ်အဂ့ၢ်- လၢအအိၣ်ဒီးတၢ်အဲၣ်တၢ်ကွံ လၢတဆီတလဲအသး, တလီၤဘှံး လီၤတီၤလၢအတၢ်ဘၣ်တ့အဂီၢ် နီတဘျီဘၣ်န့ၣ်လီၤ. ၁ မိၤ ၁:၃၁ စံးဘၣ်ပှၤလၢ ယွၤတတ့လီၤတၢ် ဒ်အခိၣ်တိၤလိၤဝဲ အသိးန့ၣ်ဘၣ်, မ့မ့ၢ် တ့လီၤဟီၣ်ခိၣ်လၢ အဃံလၤ, လၢအ “ဂ့ၤဒိၣ်မး” တဘ့ၣ် လၢတၢ်အဲၣ်တၢ်ကွံအပူၤန့ၣ်လီၤ. ဒီးပှၤဟီၣ်ခိၣ်ဖိတဖၣ်စူးကွံာ်ညိကွံာ်အီၤ ဒီးဃုထၢ တၢ်သကဲာ်ပဝးအၢအၢသီသီဒၣ်လဲာ်, တၢ်လၢကစၢ်ယွၤ အၢၣ်လီၤအသး, ဒီးအတၢ်အဲၣ် လၢပှၤဟီၣ်ခိၣ်ဖိတဖၣ်အဂီၢ်န့ၣ် တဆီတလဲဝဲဘၣ်န့ၣ်လီၤ.
ဒ်ကစၢ်ယ့ၣ်ရှူး စံးဘၣ် စီၤနံၤကဒ့မူးအသိး, ကစၢ်ယွၤအတၢ်အဲၣ်လၢ အစုတၢ်ဘၣ်တ့အဂီၢ်န့ၣ် ဒိၣ်နီၢ်မးအဃိ, တၢ်လၢအအဲၣ်ကတၢၢ်ဒၣ်လဲာ် အသးအိၣ်ဟ့ၣ် တၢ်န့ၣ်- ယိၤ ၃:၁၆ ပာ်ဖျါဝဲ, “အဖိခွါထဲတဂၤဧိၤ,” ဒ်သိးပှၤဟီၣ်ခိၣ်ဖိ ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ်န့ၣ်လီၤ. အဆၢဖိ ၁၅ စံးဘၣ်ပှၤ “ကယဲၢ်ပှၤလၢအစူၢ်က့ၤ နာ်က့ၤအီၤတဂၤလၢ်လၢ်န့ၣ်, …. ကန့ၢ်ဘၣ်တၢ်မူအထူအယိာ်” အဂီၢ် ကစၢ်ယ့ၣ်ရှူး လုၢ်ထီၣ်အသးသမူ, ဟံးန့ၢ်တူၢ် ပတၢ်ဒဲးဘးအဘူးအလဲတဖၣ်န့ၣ်လီၤ.
ပအိၣ်ဒီးတၢ်ဘၣ်တ့ကစၢ်, လၢပနာ်န့ၢ်အီၤလၢပသးဒီဖျၢၣ်, ဒီးလၢပတၢ်အိၣ်မူ ခဲလၢာ်သ့ဝဲတဂၤန့ၣ်လီၤ.
