ကစၢ်ယ့ၣ်ရှူးမၤထူၣ်ဖျဲးဝဲ ယဖိခွါ ကၠီး (Geoff) လၢအတၢ်စူးကါကသံၣ်မူၤဘှိး အါနံၣ်အါလါလံဒၣ်လဲာ် လၢအဂီၢ်ယတၢ်ဘၣ်ယိၣ်တဖၣ် အိၣ်ဒံးအဖၢမုၢ်န့ၣ်လီၤ. ပလဲၤခီဖျိတ့ၢ်တၢ်ဒ်သိးသိးအါမံၤလံဘၣ်ဆၣ်, ယကဘၣ်သ့ၣ်ညါ ခါဆူညါလၢအဂီၢ်, ယွၤအိၣ်ဒီး အတၢ်ပညိၣ်, အလီၢ်န့ၣ်, ဘၣ်တဘျီဘျီ, ယတၢ်ဘၣ်ယိၣ်အိၣ်ဒံးဒၣ် ခါလၢအပူၤကွံာ် ယဖိခွါအတၢ်ဂ့ၢ်ကီတဖၣ်အလိၤန့ၣ်လီၤ. အါစုအါဘျီ ပှၤလၢအသးစဲထီစူးကါကသံၣ် မူၤဘှိးတဖၣ် အမိၢ်အပၢ် ဘၣ်ယိၣ်ဝဲလၢ အဖိကမၤကဒါက့ၤတၢ်မူၤတၢ်ဘှီးဒ်အလီၢ်လီၢ်, ဒီးဘၣ်တနံၤ ဖဲဟံၣ်ဖိဃီဖိတဖၣ်ထံၣ်လိာ်သးအကတီၢ်, ယကိးဟးထီၣ် ကၠီး ဆူတၢ်ချၢ, ဒီးယစံးဘၣ်အီၤ, “သ့ၣ်နီၣ်ထီၣ်နဲလၢ, ပအိၣ်ဒီးဒုၣ်ဒါတဂၤ, ဒီးဒုၣ်ဒါအံၤအဂံၢ်ဘါဆူၣ်” န့ၣ်လီၤ. ယဖိခွါ စံးဆၢယၤလၢ “ယသ့ၣ်ညါ, ပါဧၢ, အဝဲအဂံၢ်ဘါဆူၣ်ဘၣ်ဆၣ် တအိၣ်ဒီးတၢ်စိတၢ်ကမီၤဘၣ်” န့ၣ်လီၤ.
အကတီၢ်တစိၢ်ဖိအံၤန့ၣ်, ယသ့ၣ်နီၣ်ထီၣ်က့ၤ ကစၢ်ယ့ၣ်ရှူးအစိကမီၤ လၢတၢ်ထိၣ်သတြီၤအီၤတန့ၢ်တသ့, လၢအမၤပူၤဖျဲးပှၤ လၢပတၢ်ဒဲးဘး, ဒီးဆီတလဲပတၢ်အိၣ်မူ ဖဲလၢပကွၢ်ထီၣ်အီၤန့ၣ်လီၤ. တကတီၢ်ဃီန့ၣ် ယဆိကမိၣ်ထီၣ် ကစၢ်ယ့ၣ်ရှူးကတိၤလီၤတၢ်ဆူအပျဲၢ်အဘီၣ်တဖၣ်, ဖဲလၢတချုးက့ၤထီၣ်ဆူ အပၢ်အိၣ်လၢမူခိၣ်အကတီၢ်, လၢ မးသဲ ၂၈:၁၈-၁၉ အပူၤစံးဝဲ, “တၢ်ဟ့ၣ်လီၤလံယၤလၢ ကယဲၢ်တၢ်စိတၢ်ကမီၤလၢမူခိၣ်, ဒီးလၢဟီၣ်ခိၣ်ချၢလီၤ. မၤသးဒ်န့ၣ်ဒီးလဲၤ…” န့ၣ်လီၤ.
ပတၢ်အိၣ်မူခါလၢအပူၤကွံာ် ကမ့ၢ်ဒၣ်ဝဲဒ်လဲၣ်ဂ့ၤ, ဒ်လဲၣ်ဂ့ၤန့ၣ်, ကစၢ်ယ့ၣ်ရှူးလၢအဘၣ်တၢ်ပျၤထီအီၤ, ဒီးအဂဲၤဆၢထၢၣ်သမူထီၣ်က့ၤတဂၤန့ၣ်, ဒုးအိၣ်ထီၣ်ကျဲတဘိလၢပဂီၢ် ဒ်သိးပကလဲၤဆူအအိၣ်အဂီၢ်န့ၣ်လီၤ. အဝဲဟံးဃာ်ပၢဆှၢ ပတၢ်အိၣ်မူ, ခါလၢအပူၤကွံာ်ဃုာ်ဒီးခါဆူညါ ခံမံၤလိာ်န့ၣ်လီၤ. အဆၢဖိ ၂၀ န့ၣ် မ့ၢ်လၢကစၢ်ယ့ၣ်ရှူးအၢၣ်လီၤဝဲလၢ ကအိၣ်ဒီးပှၤထီဘိအဃိ, ကစၢ်ကမၤလၢပှဲၤအတၢ်တိာ်, ဒီးပတၢ်အိၣ်မူတဖၣ် အိၣ်လၢကစၢ်အစုပူၤ လၢအတလီၤတိၢ်နီတဘျီဘၣ်န့ၣ်, ပနာ်န့ၢ်အီၤသ့န့ၣ်လီၤ. ယ့ၣ်ရှူး ဟ့ၣ်ပှၤတၢ်မုၢ်လၢ်, တၢ်လၢအလီၤဂာ်ဒီးအီၤတအိၣ်, တၢ်လၢ အဂ့ၤဒိၣ်မးအဃိ ပဟံးဃာ် ပကစၢ်ဒၣ်ဝဲတန့ၢ်ဘၣ်န့ၣ်လီၤ. တစိၢ်တလီၢ်ဖိအဂီၢ်န့ၣ်, မုၢ်ကီၤလံၢ်, ဒီးဟီၣ်ခိၣ် ကအိၣ်ဒီးတၢ်ဂံၢ်ဆူၣ်ဘါဆူၣ်ဘၣ်ဆၣ် “ကယဲၢ်တၢ်စိတၢ်ကမီၤခဲလၢာ်” ဘၣ်ထွဲဒီးကစၢ်ယ့ၣ်ရှူးလီၤစိၤလီၤထီနၣ်လီၤ.