ကၠဲး(Jack), ဖၠၣ်စိမိၤသရၣ်ဒိၣ်စိတဂၤ ဘၣ်ထွဲဒီးပီညါလၢကွၢ်ထံဆိကမိၣ်တၢ်ယိာ်ယိာ် ဒီးလံာ်လဲၢ် တၢ်ကွဲးတကပၤ, ဒီးမ့ၢ်ပှၤပာ်သူၣ်ပာ်သးစဲၣ်နီၤဒိၣ်မးတဂၤန့ၣ်လီၤ. ဖဲအသးအိၣ် (၁၅) နံၣ်န့ၣ်, စံးလီၤအသးလၢ အတနာ်ထူနာ်ယွၤတဂၤ, ဒီးဖဲလၢအဒိၣ်တုာ်ခိၣ်ပှဲၤထီၣ် အကတီၢ်န့ၣ်, ဒီတဒၢဝဲ အတၢ်တစူၢ်တနာ်ယွၤ ဆူၣ်ဆူၣ်ကိၤကိၤန့ၣ်လီၤ. အတံၤသကိး ပှၤခရံာ်ဖိတဖၣ် ကျဲးစၢးကွဲန့ၢ်အီၤ န့ၣ်လီၤ. ကၠဲး စံးဝဲဒၣ် “ပှၤကိးဂၤဒဲး ဒီးတၢ်ကိးမံၤဒဲးန့ၣ် ပာ်ဖှိၣ်ထီၣ် အသးလၢ တၢ်အတကပၤလံ.” ဘၣ်ဆၣ် အဝဲအၢၣ်လီၤဝဲဒၣ်လၢ လံာ်စီဆှံန့ၣ် လီၤဆီဝဲဒၣ်လၢ လံာ်လဲၢ်ဒီးတၢ်စံၣ်ဃဲၤတဲဃဲၤ အဂုၤ အဂၤတဖၣ်န့ၣ်လီၤ. အဝဲကွဲးပာ်ဖျါ ဘၣ်ထွဲဒီး လံာ်တၢ်သးခုကစီၣ်တဖၣ်အဂ့ၢ်လၢ “တၢ်စံၣ်ဃဲၤ တဲဃဲၤတယုၢ် မ့ၢ်ကဲထီၣ် တၢ်ဂ့ၢ်တၢ်ကျိၤမၤသးနီၢ်နီၢ် ဒီးလိၣ်ထီၣ်အသး လၢပှၤကညီၤ အက့ၢ်အဂီၤ သၢပျၢၤန့ၣ်ဒီး, တၢ်သးခုကစီၣ်အံၤ ကမ့ၢ်ဒၣ်တၢ်ဒ်န့ၣ်အသိးန့ၣ်လီၤ.”

၂ မိၤရှ့ ၃ မ့ၢ်လံာ်စီဆှံအဒိၣ်ကတၢၢ်တဆၢလၢ အလုၢ်ဘၢဒိၣ်စိ ကၠဲး န့ၣ်လီၤ. ယွၤကိး စီၤမိၤရှ့ ဒ်သိးကနဲၣ်ဆှၢဒုးဟးထီၣ် ပှၤအံၣ်စရ့လးဖိတဖၣ် လၢကီၢ်အဲၤကူပတူးန့ၣ်လီၤ. အဆၢဖိ ၁၁ န့ၣ် စီၤမိၤရှ့သံကွၢ်ကစၢ်ယွၤ “ယဲဒၣ်အံၤ ယမ့ၢ်မတၤတဂၤလၢ ယကလဲၤဆူ ဖၤရိၣ်အအိၣ်… န့ၣ်လဲၣ်” န့ၣ်လီၤ. အဆၢဖိ ၁၄ အပူၤ ကစၢ်ယွၤစံးဆၢ “ယမ့ၢ်တၢ်လၢယမ့ၢ်လီၤ” န့ၣ်လီၤ. လံာ်စီဆှံတတီၤအံၤ အိၣ်ဒီး တၢ်ကတိၤအဖျၢၣ်ဒီးမံၤသၣ် လၢအဃါဃုာ်သးတဖၣ်အါမးဘၣ်ဆၣ်, မ့ၢ်တၢ်လၢအဆဲး ကပီၤပာ်ဖျါထီၣ် ယွၤအတၢ်အိၣ်ဝဲဆိးဝဲလီၤထူလီၤယိာ်, လၢတၢ်အခီၣ်ထံးလံၤလံၤအဂ့ၢ်န့ၣ်လီၤ. လၢခံအကတီၢ်န့ၣ် ကစၢ်ယ့ၣ်ရှူး စံးကတိၤတၢ်တမံၤဃီ ဖဲယိၤဟၣ် ၈:၅၈ အပူၤ, “စီၤအၤဘြၤဟၣ် တချုးအိၣ်ဖျဲၣ်ထီၣ်ဒံးဘၣ်န့ၣ် ယမ့ၢ်ယဲလီၤ” န့ၣ်မ့ၢ်တၢ်လၢအလီၤသးစဲတမံၤန့ၣ်လီၤ.

ကၠဲး, ပှၤသ့ၣ်ညါအီၤအါလၢ စံၣ် အဲး(စ) လူဝ့း(စ) (C S Lewis) န့ၣ် ဘၣ်တၢ်ကွဲန့ၢ်လွဲန့ၢ်အီၤ အဒိၣ်အယိာ်လၢ လံာ်စီဆှံတဆၢအံၤန့ၣ်လီၤ. “ယမ့ၢ်တၢ်လၢယမ့ၢ်” စံးတၢ်န့ၣ် မ့ၢ်တၢ်လၢယွၤအမ့ၢ် အတီတဂၤဧိၤ ကဘၣ်စံးကတိၤဝဲယိယိဖိန့ၣ်လီၤ. ဖဲအတၢ်အိၣ်မူဆီတလဲသး အကတီၢ်ဖိအံၤန့ၣ်, လူဝ့း(စ) “ဟ့ၣ်လီၤအသး ဒီးအၢၣ်လီၤဝဲဒၣ်လၢ ယွၤမ့ၢ်ဝဲယွၤန့ၣ်လီၤ.” တၢ်ဂ့ၢ်အံၤလၢ လူဝ့း(စ) အဂီၢ် မ့ၢ်တၢ်တူၢ်လိာ်ကစၢ်ယ့ၣ်ရှူး ဒီးအတၢ်လဲၤစးထီၣ်အသးအဂ့ၢ်န့ၣ်လီၤ.

ဘၣ်သ့ၣ်သ့ၣ် ပကဘၣ်ဂဲၤလိာ်သးဒီးတၢ်စူၢ်တၢ်နာ် မ့တမ့ၢ် တၢ်စူၢ်တၢ်နာ်လၢအတလီၤတံာ် လီၤဆဲး ဒ်လူဝ့း(စ)အသိးန့ၣ်လီၤ. ဂ့ၤပသံကွၢ်လီၤက့ၤပသးလၢ ကစၢ်ယွၤန့ၣ် မ့ၢ်မး “ယမ့ၢ်တၢ်လၢ ယမ့ၢ်” နီၢ်နီၢ် လၢပတၢ်အိၣ်မူအပူၤဧါန့ၣ်လီၤ.