ဖဲယနုာ်လီၤမၤသကိးတၢ်ဒီး ခရံာ်ဖိပှၤကွဲးလံာ်တဖု လၢအကွဲးဖိသၣ်အလံာ်အလဲၢ်တဖၣ်, ဒီးအဝဲသ့ၣ် တဂၤဒီးတဂၤအဂီၢ် ဃ့ဘါထုကဖၣ်လိာ်သကိးသး, ဒီးမၤစၢၤရၤလီၤ တဂၤဘၣ်တဂၤ အလံာ်လဲၢ်အဂ့ၢ် တဖၣ်အဆၢကတီၢ်, ပှၤတနီၤစံးဝဲ မ့ၢ်လၢ ပမၤသကိးတၢ်ဒီး ပှၤသတြီၤလိာ်သးသ့ၣ်တဖၣ်အဃိ ပမ့ၢ်ဒၣ် ပှၤဟးဂီၤဖိတဖၣ်န့ၣ်လီၤ. ဘၣ်ဆၣ် ပပှၤမၤသကိးတၢ်တဖုအံၤ ပပာ်လီၤပသးလၢ တၢ်ကဲခိၣ်ကဲနာ် လၢအပညိၣ်ယွၤအဘီမုၢ်, ဒီးတၢ်မၤဒိၣ်ထီၣ်ထီထီၣ် ပပှၤတဝၢအဂီၢ်အဃိ တမ့ၢ်ပသတြီၤလိာ်သးတၢ်ဘၣ်. ပအိၣ်ဒီးတၢ်ကွၢ်စိတမံၤဃီ လၢအမ့ၢ်တၢ်ရၤလီၤတၢ်သးခုကစီၣ်န့ၣ်လီၤ. ပမၤစီၤပၤတဂၤဃီ လၢအမ့ၢ် ကစၢ်ယ့ၣ်ရှူးအတၢ်န့ၣ်လီၤ. လၢတၢ်ပာ်ဖှိၣ်မၤသးကိးတၢ်တမံၤဃီအပူၤ, ပအုၣ်ပသးလၢခရံာ်အဂီၢ် တုၤဃီၤအါထီၣ်ဝဲဒၣ်ဆူ ပှၤကလုာ်တဖၣ်အအိၣ်န့ၣ်လီၤ.
ဖဲကစၢ်ယွၤမၢ စီၤမိၤရှ့ ဒ်သိးကဃုထၢထီၣ် ပှၤသူၣ်က့သးပှၢ်အဂၤ နွံဆံ လၢအအိၣ်ဒီးခိၣ်နၢ် အတၢ်လဲၤခီဖျိအကတီၢ်, ၄ မိၤ ၁၁:၁၆-၁၇ အပူၤ ယွၤစံးဝဲ “ယကဟံးန့ၢ် သးလၢအအိၣ်လၢနလိၤတနီၤ, ဒီးယကပာ်လီၤလၢအလိၤ ဒီးအဝဲသ့ၣ်ဘၣ်စိာ်ဒီးနၤလၢ ပှၤဂီၢ်မုၢ်သ့ၣ်အတၢ်ဝံ, ဒီးနတစိာ်ဘၣ် တဂၤဃီဘၣ်” န့ၣ်လီၤ. အကတီၢ်လၢခံန့ၣ်, စီၤယိၤရှူထံၣ် ပှၤသးပှၢ်ခံဂၤ ကတိၤတၢ်လၢဝံအကျိာ်, ဒီးစံးဘၣ် စီၤမိၤရှ့ ဒ်သိးကမၢအဝဲသ့ၣ် ကဆိကတီၢ်အဂီၢ်န့ၣ်လီၤ. အဆၢဖိ ၂၉ န့ၣ် ပကထံၣ်ဘၣ် စီၤမိၤရှ့ စံးဆၢက့ၤအီၤ, “နသးက့ၣ်အီၤလၢယဂီၢ်ဧါ. မ်ကယဲၢ်ယွၤအပှၤဂီၢ်မုၢ်ခဲလၢာ် မ့ၢ်ဝံဧိၤမီၣ်ဧိၤတက့ၢ်. မ်ယွၤပာ်အသးလၢအလိၤတက့ၢ်” န့ၣ်လီၤ.
လၢတၢ်မၤသကိးတၢ်ဒီး ပှၤဂုၤပှၤဂၤတဖၣ် တဘျီလၢ်လၢ်န့ၣ် တၢ်လၢပမၤတဖၣ် ပမ့ၢ်ပာ် ဒ်တၢ်သတြီၤ မ့တမ့ၢ် တၢ်ထိၣ်သတြီၤလိာ်သး, ဒ်အမ့ၢ်တၢ်လၢအမၤတံာ်တာ်ပှၤအကတီၢ်, ဒ်သိးပကထီဒါ, တြီဆၢ တၢ်လ့ပစီအံၤအဂီၢ် သးစီဆှံဟ့ၣ်ဂံၢ်ဟ့ၣ်ဘါ, မၤစၢၤပှၤသ့ဝဲဒၣ်န့ၣ်လီၤ. ဖဲပဃ့ကစၢ်ယွၤလၢ တၢ်ဒုးဒိၣ်ထီၣ် တၢ်ကဲခိၣ်ကဲနၢ်လၢ အဆိကမိၣ်ပာ်သူၣ်ပာ်သး ယွၤအဘီမုၢ်လၢပသးပူၤအဂီၢ်န့ၣ်ဒီး, အဝဲကရၤလီၤတၢ်သးခုကစီၣ် ဆူဟီၣ်ခိၣ်ဒီဘ့ၣ်, ဒီးလၢယွၤအဂီၢ် ဖဲပမၤသကိးတၢ်တပူၤဃီန့ၣ် အဝဲ ကမၤဖှံထီၣ် ပတၢ်ဝံဃၢဒၣ်လဲာ်သ့ဝဲဒၣ်န့ၣ်လီၤ.
