ဒး(စ)ထ်ဘိ (Dust Bowl) ကလံၤမုၢ်မဲး လီၤဘၣ် ကီၢ်အမဲရကၤ ဖဲ “ဟီၣ်ခိၣ်ဒီဘ့ၣ် မုၢ်ကျိၤဝဲၤကွာ် ဃံးစ့ၤကီခဲ” (Great Depression) အဆၢကတီၢ်, ပှၤအိၣ်ဆိးလၢ ဝ့ၢ်ဟါဝၣ်သၣ် (Hiawatha), ကီၢ်စဲၣ်ခဲ(န)စဲး, လၢအမ့ၢ် ကၠီၢ် မ့ဘၢ ဒ့ဘ့း(စ) (John Millburn Davis)န့ၣ်, ပာ်လီၤအသးလၢ ကမၤလၤကပီၤအမံၤလၢ အနီၢ်ကစၢ်ဒၣ်ဝဲအဂီၢ်န့ၣ်လီၤ. အနီၢ်ကစၢ်ဒၣ်ဝဲ အတၢ်ဂုာ်ကျဲးစၢးအဃိ ကဲထီၣ်ပှၤကဲဒိၣ်ထူးတီၤတဂၤ, ပှၤလၢအဖိတအိၣ်တဂၤ, ဒ့ဘ့း(စ)အ့ၤန့ၣ် ကြၢးပာ်လီၤစူးကါ အစ့ တဖၣ်လၢ တၢ်မၤဂ့ၤမၤစၢၤတၢ်အကရၢ မ့တမ့ၢ် တၢ်မၤမုၢ်ကျိၤဝဲၤကွာ် အတၢ်ဒိၣ်ထီၣ်ထီထီၣ်အဂီၢ်န့ၣ်လီၤ. ကဘၣ်မၤတၢ်ဒ်သိးအံၤအလီၢ်န့ၣ်, မၤလၢာ်ဝဲ ကျိၣ်စ့အါအါဂီၢ်ဂီၢ်, မၢလီၤဝဲလၢပှၤကမၤန့ၢ် အနီၢ်ကစၢ်ဒီးအမါ, လၢလဲၤပူၤကွံာ်လံဟီၣ်ခိၣ်တဂၤ, အက့ၢ်အဂီၤလၢၢ်စိးပျၤ ထဲသိးသိးလၢ ပှၤမူအနီၣ်ထိၣ် တဆံတခါ, ဒ်သိးတၢ်ကပိာ်ဆၢထၢၣ်အီၤ ဖဲလီၢ်ကဝီၤ တၢ်သွၣ်ခိၣ်အဂီၢ်န့ၣ်လီၤ.
ဒ့းဘ့း(စ) စံးဘၣ် ပှၤကွဲးတၢ်ကစီၣ်ဖိ (Journalist) အၢနံၤ ပၢ(လ) (Ernie Pyle) လၢ “ဖဲ ခဲ(န)စဲး (Kansas) အဝ့ၢ်န့ၣ် ပှၤသးဟ့ယၤလီၤ.” ပှၤအိၣ်ဆိးဖဲ ဟီၣ်ကဝီၤပူၤတဖၣ် အဲၣ်ဒိးလၢ အဝဲကဟ့ၣ် ကျိၣ်စ့တၢ်မၤစၢၤလၢ တၢ်သူၣ်ထီၣ်ဘှီထီၣ် တၢ်သူၣ်ထီၣ်ကဲဘျုးလၢ ကမျၢၢ်အဂီၢ်, ဒ်အမ့ၢ် တၢ်ဆါဟံၣ်, တၢ်ပီၢ်ထံအလီၢ် မ့တမ့ၢ် ဖီကရၢၢ်တဖၣ်န့ၣ်လီၤ. ဘၣ်ဆၣ် ဒ့ဘ့း(စ) စံးဝဲလၢ, “မ့ၢ်ယတိၢ်အဃိဒီး ယကစူးကါ ဒ်တၢ်ဘၣ်ယသးအသိးန့ၣ်လီၤ.”
ဖဲလၢအစိၤအဆၢကတီၢ်န့ၣ်, စီၤပၤရှလိၤမိၤ မ့ၢ်ပှၤကဲဒိၣ်ကတၢၢ်တဂၤ လၢစံၣ်တဲၤတဲ ၅:၁၀-၁၂ အပူၤ ကွဲးပာ်ဖျါဝဲ “ပှၤလၢအအဲၣ်စ့န့ၣ် အသးတမံဘၣ်လၢ စ့အဃိဘၣ်” ဒီး “တုၤတၢ်စုလီၢ်ခီၣ်ခိၣ် အါထီၣ်ဒီး ပှၤလၢ အအီၣ်အီၤန့ၣ် အါထီၣ်ဝဲလီၤ” န့ၣ်လီၤ. စီၤရှလိၤမိၤ အတၢ်ဒိၣ်ထီၣ်အပူၤ အိၣ်ဒီး တၢ်သ့ၣ်ညါဒိၣ်ဒိၣ်ကလဲာ် ဘၣ်ထွဲဒီး တၢ်ထူးတၢ်တီၤဟဲစိာ် တၢ်ဟးဂီၤသ့ဝဲဒၣ်အဂ့ၢ်န့ၣ်လီၤ.
တၢ်မၢဖိ စီၤပီလူးစ့ၢ်ကီးသ့ၣ်ညါနၢ်ပၢၢ် တၢ်ထူးတၢ်တီၤအတၢ်လ့ပစီအဃိ, အတၢ်အိၣ်မူန့ၣ် ဃုထၢပာ်လီၤဒီးစူးကါဝဲ တၢ်ဒိကနၣ်ကစၢ်ယ့ၣ်ရှူးန့ၣ်လီၤ. လၢရိမ့ၤဃိာ်တဖျၢၣ်အပူၤန့ၣ်, ဖဲစီၤပီလူး အိၣ်ခိးဝဲ တၢ်ကမၤသံအီၤအဆၢကတီၢ်, လၢ ၂ တံၤ ၄:၆-၇ န့ၣ် ကွဲးပာ်ဖျါဝဲလၢတၢ်မံသူၣ်မံသး ဒိၣ်ဒိၣ်ကလဲာ်အပူၤ “ခဲကနံၣ်အံၤဒၣ်လဲာ် တၢ်လူၤလီၤဂၢ်လီၤယၤ, ဒီးယက့ၤတၢ်အဆၢအကတီၢ် ဘၣ်လံ.- တၢ်ဒုးလၢအဂ့ၤန့ၣ် ယဒုးလံ, တၢ်ဃ့ၢ်န့ၣ် ယဃ့ၢ်လံ, ယပၢၤဃာ်တၢ်နာ်န့ၣ်လံ” န့ၣ်လီၤ.
တၢ်လၢအအိၣ်ဂၢၢ်ဆိးကျၢၤစံးတၢ်န့ၣ် တမ့ၢ်ပစိးပျၤလၢၢ်လၢ ထးပျၤ မ့တမ့ၢ် တၢ်ပာ်ဖှိၣ်ပာ်တံၤ တၢ်လၢပဂီၢ်ဒၣ်ဝဲဘၣ်. မ့ၢ်တၢ်လၢပဟ့ၣ်နီၤလီၤ လၢတၢ်အဲၣ် ဆူတဂၤဒီးတဂၤအအိၣ်, ဒီးလၢယွၤအဂီၢ် – ကစၢ်လၢအဒုးနဲၣ် ပကဘၣ်အဲၣ်တၢ်ဒ်လဲၣ်တဂၤအဂီၢ်န့ၣ်လီၤ.
