ပထံၣ်လိာ်သး ဒီး ပှၤအိၣ်လၢပဟံၣ်အဃၢၤ ဟဲၣ်နရံၣ် (Henry) အခီၣ်ထံးတဘျီန့ၣ်, အဝဲထုးထီၣ် လံာ်စီဆှံလီၢ်လံၤဖီဃးတဘ့ၣ်လၢ အထၢၣ် လၢအဝံစိာ်ဝဲအပူၤန့ၣ်လီၤ. လၢအမဲာ်ချံတဖၣ်ကပြ့ၣ်ထီၣ် အပူၤန့ၣ်, အဝဲသံကွၢ်ပှၤလၢ မ့ၢ်ပသးအိၣ်ကတိၤသကိးတၢ် ဘၣ်ဃး ကစၢ်ယွၤအကလုၢ်ကထါဧါ န့ၣ်လီၤ. ဖဲပဖျးပခိၣ်န့ၣ်ဒီး, အဝဲအိးထီၣ် လံာ်စီဆှံအဆၢတဖၣ်လၢ မၤနီၣ်ပာ်ဝဲချ့ချ့န့ၣ်လီၤ. အဝဲဒုးနဲၣ်ပှၤ အလံာ်ကွဲးနီၣ်တၢ်တဘ့ၣ် လၢအအိၣ်ပှဲၤဒီး အတၢ်ဃုထံၣ်တဖၣ်, ဒီးစံးဝဲလၢ အဝဲ ဒုးအိၣ်ထီၣ် ခီၣ်ဖၠူထၢၣ်တၢ်ဂ့ၢ်ပာ်ဖျါတဖၣ်, အိၣ်ပှဲၤဒီး တၢ်ဂ့ၢ်ကြၢးသ့ၣ်ညါလၢအဘၣ်ထွဲလိာ်သး တဖၣ်န့ၣ်လီၤ.
ဟဲၣ်နရံၣ် ဒုးသ့ၣ်ညါကဒီးပှၤလၢ အအိၣ်ဟဲလၢ ဟံၣ်ဒူၣ်ကီခဲတဖျၢၣ်ဒ်လဲၣ်အဂ့ၢ်ဝံၤန့ၣ်, ဘၣ်အိၣ်ထဲတဂၤဧိၤအဂ့ၢ်, ဒီးအတၢ်အိၣ်သးအအၢကတၢၢ်ကတီၢ်အပူၤန့ၣ်, ဒ်မၤတၢ် ၄:၁၂ ပာ်ဖျါဝဲအသိး တူၢ်လိာ်ကစၢ်ယ့ၣ်ရှူး အတၢ်သံဒီး အတၢ်ဂဲၤထၢၣ်သမူထီၣ်က့ၤတၢ် ဒ်အမ့ၢ်အတၢ်နာ်ခီၣ်ထံးခီၣ်ဘိန့ၣ်လီၤ. ခီဖျိသးစီဆှံ မၤစၢၤအီၤလၢ ကအိၣ်မူပိာ်ထွဲ လံာ်စီဆှံအတၢ်သိၣ်တၢ်သီတဖၣ်အဃိ အတၢ်အိၣ်မူဆီတလဲသးန့ၣ်လီၤ. ဟဲၣ်နရံၣ် ဟ့ၣ်လီၤအးလီၤတ့ၢ်အသးလၢ ကစၢ်ယွၤအစုပူၤ လၢအပူၤကွံာ် အါနံၣ်အါလါအပူၤဘၣ်ဆၣ်, အတၢ်သးဆူၣ်န့ၣ် သီဝဲဒီးအိၣ်စိအိၣ်ကမီၤဒံး အဖၢမုၢ်န့ၣ်လီၤ.
ဟဲၣ်နရံၣ်, ပှၤလၢအလဲၤတ့ၢ်လံတၢ်ဒီးကစၢ်ယ့ၣ်ရှူး အါနံၣ်အါလါတဂၤ, အတၢ်သးဆူၣ်န့ၣ် ထိၣ်ဟူးထိၣ်ဂဲၤယၤ ဒ်သိး ယကကွၢ်ထံဆိကမိၣ်က့ၤ ယနီၢ်သး အတၢ်သူၣ်ဆူၣ်သးဆူၣ်န့ၣ်လီၤ. ပှၤတၢ်မၢဖိစီၤပီလူး ကွဲးဝဲလၢ ရိမ့ၤ ၁၂:၁၁ အပူၤ “လၢတၢ်မၤသပှၢ်ပှၢ်န့ၣ် သုတဝံသးကၢၣ်တဂ့ၤ, လၢသူၣ် လၢသးအဂ့ၢ်န့ၣ် ဂဲၤလိာ်သုသးတက့ၢ်. လၢကစၢ်အဂ့ၢ်န့ၣ် မၤအတၢ်တက့ၢ်” န့ၣ်လီၤ. ယမ့ၢ်တပျဲ ယွၤကလုၢ်ကထါ ဆီၣ်ထွဲမၤစၢၤ တၢ်ပာ်သးတကလုာ်လၢတၢ်အိၣ်မူပာ်ဖျါ တၢ်စံးဘျုးဆၢက့ၤ တၢ်တဘိယူၢ်ဃီလၢကစၢ်ယ့ၣ်ရှူး မၤတ့ၢ်တၢ်လၢယဂီၢ်န့ၣ်ဒီး, တၢ်အိၣ်အသးဒ်သိးအံၤန့ၣ် ကဖျါလီၤဂာ်ဒ် တၢ်ဃ့ကိၢ်ဃ့ဂီၤတၢ်အသိးန့ၣ်လီၤ.
တၢ်သးဆူၣ်လၢကစၢ်ခရံာ်အဂီၢ်န့ၣ်, အိၣ်ဟဲခီဖျိလၢ တၢ်ရ့လိာ်ဘၣ်ထွဲလိာ်သးဒီးကစၢ်ခရံာ် လၢအအါထီၣ်လဲၢ်ထီၣ်ကွ့ၢ်ကွ့ၢ်အံၤ တလီၤဂာ်ဒီး ပတၢ်သူၣ်ဟူးသးဂဲၤအထီၣ်အလီၤ လၢပလဲၤခီဖျိန့ၢ်ဘၣ် လၢပသးသမူအပူၤန့ၣ်ဘၣ်. ဖဲပမၤလိသ့ၣ်ညါအါထီၣ်ကစၢ်ခရံာ်အဂ့ၢ်န့ၣ်ဒီး, အတၢ်လုၢ်ဒိၣ်ပှ့ၤဒိၣ်လၢပဂီၢ်န့ၣ် အါထီၣ်ဝဲ, ဒီးအတၢ်ဂ့ၤတၢ်ဝါတဖၣ် ပှဲၤလုာ်ကွံာ်လၢပသးပူၤ, ဒီးယွၤလီၤဆူ ဟီၣ်ခိၣ်ချၢန့ၣ်လီၤ.
