လၢကီၢ်အီး(စ)တြ့လယါ “ဘရ့း(စ)ဘ့ ဝ့ၢ်ဘျီၣ်ရိဖှိၣ်” (Brisbane City Hall) န့ၣ်, မ့ၢ်ဝဲ ၁၉၂၀ နံၣ်တဖၣ်အပူၤ တၢ်တိာ်ကျဲၤအတၢ်မၤလၢ အဖျါကဟုကညီၢ်န့ၣ်လီၤ. လၢၢ်ဝါကံၣ်ဃ့ဃီသွါအဝါ ဖးထီတဖၣ်, ဒီးလၢၢ်တဖၣ်အံၤ ဘၣ်တၢ်ခူၣ်န့ၢ်အီၤလၢ တၢ်လီၢ်ဒ်သိးသိးဒီး မဲးခၢၣ်အဲကၠလိၣ် (Michelangelo) စူးကါဝဲလၢ အတၢ်ဂီၤစိးပျၤစီၤဒၤဝံးအက့ၢ်အဂီၤအလၢၢ်န့ၣ်လီၤ. တၢ်သူၣ်ထီၣ် တၢးထီတဖျၢၣ်အံၤ ပာ်ဖျါထီၣ်က့ၤ St. Mark’s Basilica တၢ်ဘါသရိာ် လၢဝ့ၢ်ဘဲန့း(စ) (Venice), ဒီးတိၢ်ဂီၤချံးကုအခိၣ်ဒုး မ့ၢ်တၢ်အဒိၣ်ကတၢၢ် လၢဟီၣ်ခိၣ်ဖျၢၣ် ကလံၤထံးအဟီၣ်ကဝီၤန့ၣ်လီၤ. ပှၤတ့တၢ်သူၣ်ထီၣ်တဖၣ် ဆၢမၤဃံမၤလၤတၢ်ခိၣ်စိး လၢတၢ်ဃူတၢ်ဖိးအကလူးဂီၢ်မုၢ်ဂီၢ်ပၤဘၣ်ဆၣ်, တၢ်ကီတၢ်ခဲအိၣ်တမံၤ, မ့ၢ်ဝဲကျိာ်စ့တအိၣ်လၢၤဘၣ်န့ၣ်လီၤ. ဖရဲး ကၠီစၢၣ် (Fred Johnson) လၢအမ့ၢ်ပှၤကျဲၤန့ၢ်ထံဧိၤနိဧိၤတဂၤန့ၣ် မၤစၢၤဝဲတၢ်ဂ့ၢ်ကီအံၤန့ၣ်လီၤ. ဒ်သိးကတ့န့ၢ်တၢ်ကပီၤအဖျၢၣ် လၢအကုာ်ကျီၤထီၣ် တၢ်သူၣ်ထီၣ်တၢးထီအံၤ လၢအနံၣ်တကယၤဃၣ်ဃၣ်အဂီၢ်န့ၣ် အဝဲစူးကါ တၢ်ဟးလီၢ်အထံကမါ, မ့ၣ်အူထူၣ်လီၢ်လံၤတထူၣ်, ဒီးစၢၣ်ထးဂာ်အက့အခီတနီၤန့ၣ်လီၤ.
ဒ် ဖရဲး ကၠီစၢၣ် စူးကါဝဲ တၢ်လၢအအိၣ်ဒီးအီၤအသိး, တၢ်လၢအအိၣ်ဒီးပှၤန့ၣ် ပကမၤ သကိးတၢ်လၢ ကစၢ်ယွၤအတၢ်မၤအပူၤ- ဒိၣ်မ့ၢ်ဂ့ၤ, ဆံးမ့ၢ်ဂ့ၤသ့ဝဲဒၣ်န့ၣ်လီၤ. ဒ်သိးပှၤအံၣ်စရ့လးဖိတဖၣ် ကဘၣ်ဟးထီၣ်လၢကီၢ်အဲၤကူပတူးအဂီၢ် ဖဲကစၢ်ယွၤမၢ စီၤမိၤရှ့လၢ ကဘၣ်ကဲခိၣ်ကဲနၢ် အကတီၢ်န့ၣ်, စီၤမိၤရှ့ အသးတဆူၣ်ဝဲဘၣ်, ၂မိၤ ၄:၁ အပူၤ စီးမိၤရှ့စံးဝဲ “ကွၢ်ကွၢ် အဝဲသ့ၣ်တဖၣ်န့ၣ် တကနၣ်ယၤဘၣ်” န့ၣ်လီၤ. အဆၢဖိ ၂ န့ၣ် ကစၢ်ယွၤစံးဆၢအီၤလၢ တၢ်သံကွၢ်ယိယိဖိတထံၣ်- “တၢ်အိၣ်လၢ နစုပူၤန့ၣ် မ့ၢ်မနုၤတမံၤလဲၣ်” န့ၣ်လီၤ. စီၤမိၤရှ့ ဖီၣ်ဃာ်နီၣ်ထိးဘိ, သ့ၣ်ဒ့နီၣ်က့ဖိ န့ၣ်လီၤ. ဒီးအဆၢဖိ ၃ အပူၤန့ၣ် ကစၢ်ယွၤစံးဝဲဒၣ်လၢ ကတ့ၢ်လီၤကွံာ် အနီၣ်ထိးဘိဆူဟီၣ်ခိၣ်လိၤ, “ဒီးကဲထီၣ်ဝဲလၢဂုၢ်တဘိ” န့ၣ်လီၤ. ဝံၤန့ၣ်ဒီး, ကစၢ်ယွၤမၢစီၤမိၤရှ့ ကဖီၣ်န့ၢ်ဂုၢ်လၢအမဲၢ်, ဒီးဂုၢ်န့ၣ် ကဲထီၣ်က့ၤနီၣ်ထိးဘိန့ၣ်လီၤ. ကစၢ်ယွၤစံးဘၣ်အီၤ, တၢ်ခဲလၢာ်လၢ စီၤမိၤရှ့ကဘၣ်မၤဝဲန့ၣ်, စိာ်ထီၣ်အနီၣ်ထိးဘိ ဒီးနာ်ကစၢ်ယွၤကမၤတၢ် လၢအအိၣ်လီၤတဲာ်တဖၣ်န့ၣ်လီၤ. တၢ်လၢအလီၤ တိၢ်နီၣ်န့ၣ်, ၂မိၤ ၇:၁၀-၁၂, ၁၇:၅-၇ အပူၤန့ၣ် ပကထံၣ်ဘၣ်လၢ ကစၢ်ယွၤစူးကါနီၣ်ထိးဘိလၢ စီၤမိၤရှ့အစုပူၤ, ဒ်သိးကမၤပူၤဖျဲး ပှၤအံၣ်စရ့လးဖိတဖၣ်လၢ ပှၤအဲၤကူပတူးဖိအစုပူၤအဂီၢ်န့ၣ်လီၤ.
လၢပဂီၢ် တၢ်အိၣ်ဒီးပှၤတဖၣ် တမ့ၢ်ကဖျါဒ်တၢ်အဒိၣ်အမုၢ်ဘၣ်ဆၣ် လၢကစၢ်ယွၤအဂီၢ်, တၢ်အိၣ်ဒီးပှၤတမံၤမံၤန့ၣ် လၢဝဲလီၣ်ဝဲဒၣ်န့ၣ်လီၤ. ကစၢ်ယွၤဟံးန့ၢ် ပတၢ်ဂံၢ်ခီၣ်ထံးလၢအတမ့ၢ် တၢ်လီၤတိၢ်လီၤဆီတဖၣ် ဒီးစူးကါဝဲလၢ အတၢ်မၤအဂီၢ်န့ၣ်လီၤ.
