“ယတၢ်စူၢ်တၢ်နာ် အိၣ်ဖဲလဲၣ်.” လၢယသးတၢ်အယိာ်အပူၤဒၣ်လဲာ် တၢ်တအိၣ်နီတမံၤ, အိၣ်ထဲတၢ်ကလီလီဒီးတၢ်ခံးသူ … ကစၢ်ယွၤမ့ၢ်အိၣ်ဖဲန့ၣ် – ဝံသးစူၤ ပျၢ်ကပာ်ဘၣ်ယၤတက့ၢ်.”

ပှၤလၢအကွဲးတၢ်ကတိၤတဖၣ်အံၤ ကကဲထီၣ်တၢ်ကမၢကမၣ်လၢနဂီၢ် – မ့ၢ်ဝဲ မါသၢၣ် ထရံစၣ် (Mother Teresa) န့ၣ်လီၤ. အဝဲဘၣ်တၢ်အဲၣ်အီၤ ဒီးအမံၤဟူသၣ်ဖျါ, ဒ်အမ့ၢ်တၢ်ခ့တၢ်ပှၤ လၢအတလီၤဘှံးလီၤတီၤ လၢပှၤဖှီၣ်ဖိယၢ်ဖိ အိၣ်ဆိးလၢ ဝ့ၢ်ကါ(လ)ကးတါ (Calcutta), ကီၤလၤသူကီၢ်တဖၣ်အဂီၢ်န့ၣ်လီၤ. အတၢ်စူၢ်တၢ်နာ်အဂီၢ် လၢတၢ်ဘှ့ၣ် တၢ်ဘှီၣ်အပူၤ ဒုးတ့ၢ်ဝဲတၢ်ဒုးလၢအလီၤပျံၤဒိၣ်မး လၢအနံၣ်ယဲၢ်ဆံဘျဲၣ်အတီၢ်ပူၤန့ၣ်လီၤ. ဖဲအဝဲသံ ၁၉၉၇ နံၣ် ဝံၤအလီၢ်ခံ, အနီၢ်ကစၢ်နီၢ်သးအတၢ်ဂဲၤလိာ်အဂ့ၢ်အံၤ အိၣ်ဟဲဖျါထီၣ် ခီဖျိလၢတနံၤဘၣ်တနံၤအတၢ်ကွဲးနီၣ်အက့အခီ လၢအဘၣ်တၢ်စဲကျံးထုးထီၣ်ရၤလီၤလၢ လံာ် “ဟဲ, ကဲထီၣ်ယတၢ်ကပီၤ” (Come Be My Light) အပူၤန့ၣ်လီၤ.

ဖဲပအိၣ်ဒီးတၢ်သးဒ့ဒီတဖၣ် (မ့တမ့ၢ်) ပသးကလၢၢ်ဘၣ်တၢ်တဖၣ် လၢကစၢ်ယွၤတအိၣ်ဘၣ်အဆၢကတီၢ်န့ၣ် မ့ၢ်ပကမၤတၢ်မနုၤလဲၣ်. တၢ်ဆၢကတီၢ်ဒ်သိးအံၤတဖၣ်န့ၣ် ကမၤတံာ်တာ်ဝဲ ပှၤခရံာ်ဖိတနီၤ အါန့ၢ်ပှၤအဂုၤအဂၤတဖၣ် န့ၣ်လီၤ. ဘၣ်ဆၣ် ပှၤအါဒံအါဂၤလၢ အစူၢ်က့ၤနာ်က့ၤကစၢ်ယ့ၣ်ရှူးတီတီလိၤလိၤတဖၣ်, အတၢ်အိၣ်မူအပူၤ ကလဲၤခီဖျိ ဘၣ်ဝဲ တၢ်သးဒ့ဒီ အကတီၢ်ဖိတဖၣ် မ့တမ့ၢ် တၢ်အခ့အခါအကတီၢ်ဖးဒိၣ်တဖၣ်သ့ၣ်သ့ၣ် ကအိၣ်ဝဲဒၣ်န့ၣ်လီၤ.

ယစံးဘျုးဘၣ်လၢ လံာ်စီဆှံဟ့ၣ်ပှၤ တၢ်ထုကဖၣ် အဃံအလၤလၢအပာ်ဖျါ တၢ်အဘၣ်ဒီးတၢ်တဘၣ်ခံမံၤလၢာ်, တၢ်ထုကဖၣ်လၢအအိၣ်ဒီးတၢ်နာ်, ဒီးလၢအတအိၣ်ဒီးတၢ်နာ်တဖၣ်န့ၣ်လီၤ. လၢမၢ်ကူး ၉:၂၁ အပူၤန့ၣ်, ကစၢ်ယ့ၣ်ရှူး ထံၣ်လိာ်သးဒီးပၢ်တဂၤ လၢတၢ်နါမၤနးမၤဖှီၣ်အဖိခွါ လၢအဖိသၣ်လံၤလံၤန့ၣ်လီၤ. အဆၢဖိ ၂၃ န့ၣ် ကစၢ်ယ့ၣ်ရှူး စံးဘၣ်အီၤလၢ အဝဲနာ်တၢ်မ့ၢ်သ့ (“တၢ်သ့တၢ်လၢာ်လၢပှၤလၢအနာ်တၢ်အဂီၢ်လီၤ”) ဒီး အဆၢဖိ ၂၄ ပာ်ဖျါဝဲ “ဒီးဖိသၣ် အပၢ်န့ၣ်, ကိးပသူထီၣ်တကီၢ်ခါ, ဒီးအမဲာ်ထံလီၤဒီးစံးဝဲဒၣ်, ယနာ်လီၤ. ယတၢ်တနာ်ဘၣ်အံၤ မၤစၢၤလၢ်တက့ၢ်” န့ၣ်လီၤ.

တၢ်သကွံၢ်ကညး လၢအတီအလိၤ, ဒီးလၢသူၣ်ဒီဖျၢၣ်သးဒီဖျၢၣ်အံၤ ကွဲမုာ်ပှၤလၢအဘၣ်ဂဲၤလိာ်ဒီးတၢ်သးဒ့ဒီတဖၣ် ဒ်သိးပကဟ့ၣ်လီၤ ပတၢ်သးဒ့ဒီတဖၣ်ဆူယွၤအအိၣ်, ဒီးပကအိၣ်ဒီးတၢ်နာ်လၢ ကစၢ်ယွၤကမၤဂၢၢ်မၤကျၢၤ ပတၢ်စူၢ်တၢ်နာ်, ဒီးကဟံးဃာ်ပှၤကျၢၤကျၢၤ ဖဲတြီၤလာ်လၢအယိာ်ကတၢၢ်, ဒီးအခံးကတၢၢ်တဖၣ်, တၢ်လၢပကဘၣ်လဲၤခီဂာ် တဘျီဂ့ၤ တဘျီဂ့ၤအပူၤန့ၣ်လီၤ.