လၢယတၢ်မၤလီၢ်အဃၢၤ တလါတဖျၢၣ်အပူၤန့ၣ် သၣ်မံယီၤလၢအဆါဆူၣ်ဆါကဲတဒု အိၣ်ပစုာ်ပတ့ၤ, ဒီးကိးဃဲကအဲး အါနံၤအါသီန့ၣ်လီၤ. တချုးလၢ ကၠိၣ် (Jun) ဟဲထံၣ်န့ၢ်အီၤတစုန့ၣ် သၣ်မံယီၤလၢအဘၣ်တၢ်စူးကွံာ်လၢကျဲခိၣ်တဒုအံၤ, ပှၤလဲၤထီၣ်က့ၤလီၤတၢ်တဖၣ်တကနၢ်အီၤဘၣ်န့ၣ်လီၤ. ပှၤလၢအခွဲသိၣ်ခွဲပျီကျဲတဂၤအံၤ ဟဲက့ၤစိာ် သၣ်မံယီၤဖိအံၤ ဆူအဟံၣ်, လၢအအိၣ်ဆိးဝဲဒီးထွံၣ်ခံဒု, တဘျီလၢအမ့ၢ်တ့ၢ် ထွံၣ်ဟးဖျိးကျဲတဖၣ်န့ၣ်လီၤ.

ကၠိၣ် (Jun) စံးဝဲ “မ့ၢ်လၢပှၤတပာ်သူၣ်ပာ်သး တကနၢ်အဝဲသ့ၣ်နီတဂၤဘၣ်အဃိ ယအံးထွဲကွၢ်ထွဲအဝဲသ့ၣ်န့ၣ်လီၤ. ယထံၣ်လီၤက့ၤယသးလၢ အဝဲသ့ၣ်အပူၤလီၤ. ပမ့ၢ်စံးတၢ်ကတိၤအလၢာ်န့ၣ်, မတၤတဂၤမး တပာ်သူၣ်ပာ်သး ပှၤတဂၤ လၢအခွဲသိၣ်ခွဲပျီကျဲန့ၣ်ဘၣ်.”

ကစၢ်ယ့ၣ်ရှူး အတၢ်လဲၤဆူ ဝ့ၢ်ယရူၤရှလ့ၣ် အကျဲန့ၣ်, ဖဲအလဲၤတုၤဆူ ဝ့ၢ်ယရံးဃိအကတီၢ်, ပှၤမဲာ်ဘျီၣ်တဂၤ ဆ့ၣ်နီၤ ဒီးဃ့အီၣ်တၢ် လၢကျဲကပၤန့ၣ်လီၤ. အဝဲစ့ၢ်ကီး အသးကလၢၢ်ဘၣ်ဝဲလၢ ပှၤတကနၢ်ဃုာ်အီၤဘၣ်န့ၣ်လီၤ. လီၤလီၤဆီဆီ မုၢ်တနံၤအံၤ, ဖဲပှၤဂီၢ်မုၢ်လဲၤခီဂာ်တၢ်, ဒီးအဝဲသ့ၣ်ခဲလၢာ် ကွၢ်ဃီၤဝဲဒၣ်ဆူ ခရံာ်အအိၣ် – ဒီးမတၤတဂၤမး တအိၣ်ကတီၢ်မၤစၢၤ ပှၤဃ့အီၣ်တၢ်တဂၤအံၤဘၣ်န့ၣ်လီၤ.

ပှၤတအိၣ်နီတဂၤ, ထဲဒၣ်ကစၢ်ယ့ၣ်ရှူး ပာ်သူၣ်ပာ်သးအီၤန့ၣ်လီၤ. လၢပှၤဂီၢ်မုၢ်အတၢ်သီၣ်တၢ်သဲတဖၣ်အကျါ, ကစၢ် ယ့ၣ်ရှူးနၢ်ဟူဝဲ ပှၤလၢအဘၣ်တၢ်သးပ့ၤနီၣ်အီၤတဂၤ အတၢ်ကိးပသူထီၣ်န့ၣ်လီၤ. လူၤ ၁၈:၄၁-၄၂ အပူၤပကထံၣ်ဘၣ် ကစၢ်ခရံာ်သံကွၢ်အီၤ “နသးအိၣ်လၢ ယကမၤနၤလၢ မနုၤတမံၤလဲၣ်,” ဒီးဒိးန့ၢ်ဝဲ တၢ်စံးဆၢလၢ အဘၣ်ဒိသူၣ်ဘၣ်ဒိသး, “ကစၢ်ဧၢ, မ့ၢ်ဒ်သိး ယကထံၣ်ထီၣ်က့ၤတၢ်လီၤ.” ယ့ၣ်ရှူးစံးဘၣ်အီၤ “ထံၣ်ထီၣ်က့ၤတၢ်တက့ၢ်. နတၢ်နာ်အုၣ်က့ၤခီၣ်က့ၤလံ နၤလံ” န့ၣ်လီၤ.

ပသးကလၢၢ်ဘၣ်လၢ ပတဘၣ်တၢ်ထံၣ်ပှၤ, ပှၤတပာ်သူၣ်ပာ်သးပှၤ မ့ၢ်အိၣ်တဘျီဘျီဧါ. ခီဖျိပှၤလၢဖျါ အကါဒိၣ်န့ၢ်ပှၤ တဖၣ်အဃိ မ့ၢ်ပကိးသတြီထီၣ်တၢ်သ့ၣ်တဖၣ် လီၤဘၢလီၤမၢ်ကွံာ်လံဧါ. ပှၤလၢဟီၣ်ခိၣ်တပးကဲဝဲ လၢအကဘၣ်ပာ်သူၣ် ပာ်သးတဖၣ်အဂီၢ်, ပပှၤအုၣ်ခီၣ်ကစၢ် ပာ်သူၣ်ပာ်သးဝဲဒၣ်န့ၣ်လီၤ. ကိးထီၣ်ဆူအအိၣ် လၢတၢ်မၤစၢၤအဂီၢ်တက့ၢ်. ဖဲပှၤ အါဂၤ လဲၤခီဂာ် လဲၤကပာ်ပှၤအကတီၢ်န့ၣ်, အဝဲကအိၣ်ကတီၢ်မၤစၢၤပှၤန့ၣ်လီၤ.