တရူးတၢ်အိၣ်ဖှိၣ်သရၣ် အဖိဃုဂၤတဂၤ, ကၠီစိ(န), ဒိးန့ၢ် စကီလၣ်ရှ့း ဒ်သိးကလဲၤမၤလိတၢ် လၢကီၢ်အမဲရကၤအဖၠၣ်စိမိၤတဖျၢၣ်, ဖဲ ၁၉၂၀ နံၣ်န့ၣ်လီၤ. အဝဲဖျိထီၣ်အတၢ်မၤလိလၢ တၢ်လၤကပီၤ အဒိၣ်အထီကတၢၢ်, ဒီးမၤဝံၤအတၢ်မၤလိ လၢတီၤဒိၣ်တုာ်ခံပတီၢ်တပတီၢ်တၢ်ရဲၣ် တၢ်ကျဲၤ, ဒီးအကတၢၢ်န့ၣ်ဒိးန့ၢ်ဝဲ ဖံၣ်အ့းချ်ဒံၢ် (PhD.) န့ၣ်လီၤ. ဘၣ်ဆၣ်, ဖဲအမၤလိတၢ် အကတီၢ်, အဝဲလဲၤကပာ် ကစၢ်ယွၤန့ၣ်လီၤ. ဒီးဘၣ်တနၤ ဖဲ ၁၉၂၇ နံၣ်န့ၣ်, အဝဲအးလီၤအသး ဆူကစၢ်ခရံာ်အစုပူၤ ဒီးအသးကလၢၢ်ဘၣ်ဝဲလၢ ဒ်သိးကကဲထီၣ်ပှၤစံၣ်တဲၤတဲလီၤတၢ်တဂၤ အဂီၢ် ကစၢ်ယွၤကိးအီၤန့ၣ်လီၤ.
မ့ၢ်က့ၤတုၤဆူ တရူးကီၢ်န့ၣ် တၢ်ဖံးတၢ်မၤခွဲးယာ်တဖၣ် လၢကဒိးန့ၢ် ကျိၣ်စ့ဒိၣ်ဒိၣ်မုၢ်မုၢ် အိၣ်ခိးပာ်အီၤဘၣ်ဆၣ်, လၢကဘီပူၤ ဖဲအက့ၤဆူဟံၣ်အကတီၢ်, သးစီဆှံထုးန့ၢ်အသူၣ်အသး လၢကစူးကွံာ်ညိကွံာ် အတၢ်ပညိၣ်တၢ်မုၢ်လၢ်တဖၣ်အဂီၢ်န့ၣ်လီၤ. ဒ်သိးကမ့ၢ်ဝဲ အတၢ်ဟ့ၣ်လီၤ အသး အတၢ်ပနီၣ်အဂီၢ်, အဝဲကွံာ်လီၤတဲာ်တ့ၢ် တၢ်လၤကပီၤလၢအဒိးန့ၢ်ဝဲတဖၣ် ဆူပီၣ်လဲၣ်ပူၤ, ဒီးမ့မ့ၢ် ပာ်လီၤတ့ၢ်ဝဲထဲ ဖံၣ်အ့းချ်ဒံၢ် အဒံၢ်ကရံၣ်, ဒ်သိးကပာ်ဖျါတၢ်ယူးယီၣ်ပးကဲမိၢ်ပၢ်အဂီၢ်, ဒီးကဟ့ၣ်က့ၤဝဲအမိၢ်အပၢ်န့ၣ်လီၤ.
မၢ်ကူး ၈:၃၆ အပူၤ ကစၢ်ယ့ၣ်ရှူးစံးကတိၤဝဲ ဘၣ်ထွဲဒီး တၢ်ကဲထီၣ်အပျဲၢ်အဘီၣ်အဂ့ၢ်- “အဂ့ၢ်ဒ်အံၤ, ပှၤကညီမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါ, ဒီးမၤဟါမၢ်ကွံာ်အသးဒီး မ့ၢ်အန့ၢ်အဘျုး မနုၤလဲၣ်” န့ၣ် ကၠီစိ(န) ထံၣ်သ့ၣ်ညါနၢ်ပၢၢ်ဝဲန့ၣ်လီၤ. ဒ်အဆၢဖိ ၃၄-၃၅ ပာ်ဖျါဝဲအသိး ဖဲလၢ ပလူၤပိာ်ကစၢ်ယ့ၣ်ရှူးအခံ, ဒီးအတၢ်နဲၣ်ဆှၢပှၤအဂီၢ်, ပမ့ၢ်စူးကွံာ်ညိကွံာ်ပသး, ဒီးပၢ်တ့ၢ်ကွံာ် ပတၢ်အိၣ်မူအလီၢ်လံၤန့ၣ်ဒီး, အခီပညီကမ့ၢ် တၢ်လုၢ်ထီၣ်နီတဂၤ အတၢ်မိၢ်န့ၢ်သးလီတၢ်တဖၣ် ဃုာ်ဒီးတၢ်စုလီၢ်ခီၣ်ခိၣ်တဖၣ်, တၢ်လၢအမၤတံာ်တာ်တြီဃာ်ပကပိာ်ကစၢ်ခရံာ်အဂီၢ်န့ၣ်လီၤ.
ဆူညါတဆံခံနံၣ်အတီၢ်ပူၤ, ကၠီ မၤမံးရှၢၣ်အတၢ်မၤလၢသူၣ်ဒီဖျၢၣ်သးဒီဖျၢၣ် လၢကစၢ်ယွၤ ဟ့ၣ်သါအီၤ, ဒီးစံၣ်တဲၤတဲလီၤတၢ်သးခုကစီၣ် ဆူပှၤလၢအကထိတဖၣ်အကထိ လၢတရူးကီၢ် ဒီးအ့ရှၢၣ်-မုၢ်ထီၣ်ကလံၤထံးန့ၣ်လီၤ. ပဝဲတခီ ပကမၤတၢ်မနုၤလဲၣ်. တမ့ၢ်တၢ်ကကိးပှၤ ဒ်သိး ပကကဲထီၣ် ပှၤစံၣ်တဲၤတဲလီၤတၢ်တဖၣ် မ့တမ့ၢ် မံးရှၢၣ်နရံၣ်အတၢ်မၤဘၣ်ဆၣ်, ခီဖျိသးစီဆှံ မၤတၢ်လၢပပူၤဒီး, လၢတၢ်ကမၤ ကစၢ်ယွၤတၢ်မၤအဂီၢ်,ဖဲလၢကစၢ်ယွၤ ကိးပှၤတၢ်လီၢ်တတီၤဂ့ၤ တတီၤဂ့ၤအကတီၢ်, မ်ပကဟ့ၣ်လီၤသးလၢာ်လၢာ်ဆ့ဆ့ ဆူအစုပူၤန့ၣ်တက့ၢ်.
