အပူၤကွံာ်တဘျုးနံၣ်အကတီၢ်, ကၠူလံၣ် လဲ(န)မဲ(န) နုာ်လီၤပြၢဝဲ တၢ်သမံသမိးတၢ်ပြၢ လၢတၢ်ဃုထၢ ပှၤအူဖြၣ်စ့ၣ်ပံကွဲၤလၢ ဝ့ၢ်နယူးယီး Metropolitan Opera ပံကွဲၤသံကျံကရၢ အဂီၢ်န့ၣ်လီၤ. MET ကရၢအံၤ မၤအတၢ်သမံသမိးတၢ်ပြၢတဖၣ်လၢ ယာ်ဘျးစဲအလီၢ်ခံ ဒ်သိးတၢ်ကဟးဆှဲး စံၣ်ညီၣ်ကွီၢ်တဖၣ် အသုတၢ်စံၣ်ညီၣ်တဲာ်ဆိတၢ်အဂီၢ်န့ၣ်လီၤ. လဲ(န)မဲ(န) ပြၢဝဲအဂ့ၤကတၢၢ်အဃိဒီး, အကတၢၢ်န့ၣ်, မၤနၢၤဝဲတၢ်ပြၢအံၤန့ၣ်လီၤ. ဘၣ်ဆၣ်, ဖဲအဝဲ ဟးထီၣ်လၢ ယာ်ဘျးစဲအမဲာ်ညါန့ၣ်ဒီး, စံၣ်ညီၣ်ကွီၢ်တနီၤလၢ အမ့ၢ်ပိာ်ခွါတဖၣ် မ့ၢ်လၢတပာ် ပနီၣ်အီၤအဃိ, လဲၤနုာ်ဆူဒၢးအလီၢ်ခံ, ဒီးလူၤကွၢ်ဃု ပှၤအဂၤတဂၤဂၤန့ၣ်လီၤ.
၁ ရှမူၤ ၈:၅, ၉:၂ အပူၤန့ၣ် ပှၤအံၣ်စရ့လးဖိတဖၣ် ဃ့ထီၣ်ဝဲစီၤပၤတဂၤ အဆၢကတီၢ်, ကစၢ်ယွၤ အၢၣ်လီၤတူၢ်လိာ်ဝဲ, ဒီးဟ့ၣ်လီၤပှၤတဂၤလၢ အအိၣ်ဒီးနီၢ်ခိက့ၢ်ဂီၤ လၢအလီၤထုးသူၣ် ထုးသး ဒ်ထံကီၢ်အဂုၤအဂၤ အစီၤပၤတဖၣ်အသိးန့ၣ်လီၤ. ဘၣ်ဆၣ်, ၁ ရှမူၤ ၁၆:၁-၁၃ စံးဘၣ် ပှၤလၢ, နံၣ်အခီၣ်ထံးတဖၣ်အပူၤ စီၤစီလူးပၢတၢ် ဒ်စီၤပၤတဂၤအသိးန့ၣ်, ဘၣ်တၢ်ပနီၣ်အီၤ ဒ်အမ့ၢ်ပှၤလၢအကလုၢ်တတီ, ဒီးပှၤလၢတဒိကနၣ်တၢ်အဃိ, ကစၢ်ယွၤ ဆှၢလီၤဝံရှမူၤအ့လးဆူ ဝ့ၢ်ဘ့ၤသလ့ဃ့ၣ် ဒ်သိးကဖှူဝဲစီၤပၤအသီတဂၤလၢသိအဂီၢ်န့ၣ်လီၤ. ဖဲဝံရှမူၤအ့လး ထံၣ်ဝဲ စီၤယံးရှဲအဖိခွါအဒိၣ်ကတၢၢ် စီၤအလံအာ်, ဒီးမ့ၢ်လၢအအိၣ်ဒီး က့ၢ်ဂီၤလၢအလီၤထုးသူၣ်ထုးသး အဃိ, ဆိကမိၣ်ဝဲလၢ ကစၢ်ယွၤဃုထၢပှၤတဂၤအံၤ လၢကကဲထီၣ်စီၤပၤန့ၣ်လီၤ. ဘၣ်ဆၣ်, ကစၢ်ယွၤတၤဝဲ ဝံရှမူၤအ့လးအတၢ်ဆိကမိၣ် လၢအဆၢဖိ ၇ အပူၤစံးဝဲ “ပှၤကညီကွၢ်ပှၤအမဲာ်, မ့မ့ၢ် ယွၤကွၢ်ပှၤအသးလီၤ” န့ၣ်လီၤ. အဆၢဖိ ၁၂ န့ၣ်ပကထံၣ်ဘၣ် ကစၢ်ယွၤဃုထၢစီၤဒၤဝံး ဒ်သိးကနဲၣ်ဆှၢ အပှၤဂီၢ်မုၢ်အဂီၢ်န့ၣ်လီၤ.
လၢကစၢ်ယွၤအတၢ်ပညိၣ်အဂီၢ် တၢ်ကွၢ်ဆိကမိၣ်ထံ ပှၤဟီၣ်ခိၣ်ဖိတဖၣ် အတၢ်သ့တၢ်ဘၣ်, ဒီးဂ့ၤတဂ့ၤ, ကြၢးတကြၢးန့ၣ် လၢပှၤကကဲထီၣ်ခိၣ်နၢ်တဂၤအပူၤ ကစၢ်ယွၤကွၢ်ဝဲ တၢ်သကဲာ်ပဝး, တၢ်သးအိၣ်မၤတၢ်, ဒီးတၢ်သူၣ်ဟူးသးဂဲၤတဖၣ် မ့ၢ်အိၣ်တအိၣ်န့ၣ်လီၤ. ကစၢ်ယွၤကွဲမုာ်ပှၤလၢ ပကမ့ၢ်ပှၤလၢအသ့ထံၣ်တၢ် ဒ်ကစၢ်ယွၤမၤဝဲထံၣ်ဝဲ ဟီၣ်ခိၣ်, ဒီးပှၤကညီတဖၣ်အသိး – ကစၢ်ယွၤပညိၣ်ဝဲလၢ ပှၤကညီတဖၣ်အသးကံၢ်ပူၤ, ဒီးတမ့ၢ်တၢ်အက့ၢ်အဂီၤဖျါလၢခိ, မ့ၢ်ဂ့ၤ တမ့ၢ်လၢပှၤတဂၤဂၤ အတၢ်သ့တၢ်ဘၣ်လီၤဆီအဃိဘၣ်န့ၣ်လီၤ.
