ကစၢ်ယွၤဧၢ, ဘၣ်မနုၤအဃိ တၢ်မၤအသးဒ်သိးအံၤန့ၣ်လဲၣ်. တၢ်မၤအသးအံၤ မ့ၢ်နတၢ်ပညိၣ် လၢပဂီၢ်နီၢ်နီၢ်ဧါ. ဒ်ယမ့ၢ်ယဲ ဝၤ, ဒီးဖိဆံးသ့ၣ်တဖၣ်အပၢ်တဂၤန့ၣ်, တၢ်သံကွၢ်တဖၣ်အံၤ, ဟဲအိၣ်ထီၣ်လၢယသးပူၤတလီၢ်လီၢ်, ဖဲယဘၣ်ကွၢ်ဆၢၣ်မဲာ်ဒီး ခဲစၢၢ်တၢ်ဆါနးနးကျံးကျံး အကတီၢ်န့ၣ်လီၤ. အါန့ၢ်အန့ၣ်, ပဟံၣ်ဖိဃီဖိ မၤသကိးတၢ်ဒီး မံးရှၢၣ်ကရၢတခါ, လၢအဆှၢဖိသၣ် အါဒံအါဂၤ လၢကစူၢ်က့ၤနာ်က့ၤခရံာ် ဒ်အမ့ၢ်အတၢ်အုၣ်က့ၤခီၣ်က့ၤကစၢ်တဂၤန့ၣ်လီၤ. ကစၢ်ယွၤ ဟဲစိာ်န့ၢ် တၢ်အသူအသၣ်လၢအအိၣ်ဖျါတြၢၢ်ကလာ်န့ၣ်လီၤ. တၢ်သးခု အိၣ်ဝဲအါမးန့ၣ်လီၤ. ခဲကနံၣ်အံၤ,ဘၣ်မနုၤအဃိ တၢ်မၤအသးဒ်သိးအံၤန့ၣ်လဲၣ်.

အ့ၤ ၂:၈ အပူၤန့ၣ် ပကထံၣ်ဘၣ် ဖဲလၢနီၢ်အ့ၤစတၢ် ဘၣ်တၢ်ဒုးဟးထီၣ်အီၤလၢ အဟံၣ်လၢ အဲၣ်ဘၣ်ဝဲတဖျၢၣ်, ဒီးဘၣ်တၢ်စိာ်ဆှၢနုာ်အီၤဆူ တၢ်လီၢ်အသီတတီၤအကတီၢ်, ဖျါလၢကအိၣ် ဒီးတၢ်သံကွၢ်တဖၣ် ဒီးဃ့ထုကဖၣ်တၢ်ဆူကစၢ်ယွၤန့ၣ်လီၤ. အဆၢဖိ ၇ ပာ်ဖျါဝဲ ဖဲအမိၢ် အပၢ်သံ သဒၣ်ကွံာ်အီၤအလီၢ်ခံ အတခွါ စီၤမၢ်ဒကဲၤ လုၢ်ဒုးဒိၣ်ထီၣ်အီၤ ဒ်အဖိအသိးန့ၣ်လီၤ. လၢခံန့ၣ်ဒီး, အဆၢဖိ ၁၇ စံးဘၣ်ပှၤ အဝဲဘၣ်တၢ်ဆှၢထီၣ်အီၤဆူ နီပူၤ, ဒီးအကတၢၢ်န့ၣ်ကဲထီၣ် နီၢ်ပၤမုၣ်တဂၤန့ၣ်လီၤ. အဆၢဖိ ၁၁ ပာ်ဖျါဝဲ စီၤမၢ်ဒကဲၤ မ့ၢ်ပှၤလၢအသ့ၣ်ညါနၢ်ပၢၢ် “တၢ်ကမၤအသးဒီးအီၤ မနုၤမနုၤ” လဲၣ်န့ၣ်လီၤ. အကတီၢ်ဘၣ်ဒီး, အဝဲသ့ၣ်ခံဂၤလိာ်သ့ၣ်ညါဝဲ ဒ် အ့ၤ ၄:၁၄ ပာ်ဖျါဝဲ, ကစၢ်ယွၤကိး နီၢ်အ့ၤစတၢ် ဒ်သိးကတုၤဃီၤဆူ တၢ်အစိကမီၤဒိၣ်ထီတတီၤ “လၢဘီမုၢ်အလီၢ်လၢ အဆၢကတီၢ်(ဒ်သိး)အံၤ” အဂီၢ်- ကမ့ၢ်တၢ်လီၢ်တတီၤ လၢကဒုးအိၣ်ထီၣ် အပှၤဂီၢ်မုၢ် အတၢ်အုၣ်က့ၤခီၣ်က့ၤ လၢတၢ်ဟးဂီၤအဂီၢ်န့ၣ် ပကထံၣ်ဘၣ်ဖဲ အဆၢဒိၣ် ၇-၈ အပူၤန့ၣ်လီၤ.

တၢ်အံၤမ့ၢ်တၢ်အုၣ်သးတမံၤ, လၢအမ့ၢ်ကစၢ်ယွၤအတၢ်ပညိၣ် အလၢအပှဲၤအကျါတထံၣ်, ကစၢ်ယွၤကတဲာ်ကတီၤ ပာ်လီၤတၢ်လီၢ်တၢ်ကျဲ လၢအတညီနုၢ်ဒီး နီၢ်အ့ၤစတၢ်အဂီၢ်န့ၣ်လီၤ. ယွၤမၤတၢ်လၢယဂီၢ် ဒ်နီၢ်အ့ၤစတၢ်အသိးန့ၣ်လီၤ. ဖဲလၢယတူၢ်ဘၣ်ခီၣ်ဘၣ် ခဲစၢၣ်တၢ်ဆါဖးယံာ်ဖးထီ, ဒီအကတီၢ်န့ၣ်, ယအိၣ်ဒီးခွဲးယာ်လီၤဆီလၢ တၢ်ကနီၤဟ့ၣ် ယတၢ်စူၢ်တၢ်နာ်ဆူ ပှၤဆူးပှၤဆါတဖၣ်, ဒီးပှၤလၢအံးထွဲကွၢ်ထွဲပှၤဆါတဖၣ်, ဆူပှၤအါဒံအါဂၤအအိၣ်န့ၣ်လီၤ. မ့ၢ်ကစၢ်ယွၤဆှၢနၤ ဆူတၢ်လီၢ်တၢ်ကျဲလၢ အတညီနုၢ်ဒီးနၤ မနုၤတတီၤလဲၣ်. နာ်န့ၢ်အီၤတက့ၢ်. ရိမ့ၤ ၁၁:၃၃ ပာ်ဖျါဝဲလၢ ယွၤန့ၣ်ဂ့ၤဝဲ, ဒီးအတၢ်ပညိၣ်တဖၣ်စ့ၢ်ကီး ဂ့ၤဝဲဒၣ်န့ၣ်လီၤ.