တၢ်ကစီၣ်လံာ်ပရၢ ဒ့လံၤ မ့ရၢၣ် (Daily Mirror) ပာ်ဖျါထီၣ်လၢ ညီနုာ်ပှၤကညီတဖၣ် ပာ်လီၤတၢ်ဆၢတဲာ် အဘျီ ၇၇၃, ၆၁၈ ဘျီ လၢအသးသမူ ဒီတစိၤအပူၤန့ၣ်လီၤ. အဲကလံး တၢ်ကစီၣ်လံာ်ပရၢအံၤ ပာ်ဖျါကဒီးဝဲ “တၢ်ဆၢတဲာ်တဖၣ်အကျါ တၢ်ဆၢတဲာ် ၁၄၃,၂၆၂ ထံၣ်န့ၣ် ကမ့ၢ်တၢ်ဆၢတဲာ်လၢ ပကဘၣ်ပီၢ်ယၢ်လီၤက့ၤပသးတဖၣ်န့ၣ်လီၤ”. တၢ်ကစီၣ်လ့ာ်ပရၢဒၢးအံၤ လဲၤမၤန့ၢ် နီၢ်ဂံၢ်နီၢ်ဒွးတဖၣ်အံၤဒ်လဲၣ်န့ၣ် ယတသ့ၣ်ညါဘၣ်ဆၣ်, လၢပတၢ်အိၣ်မူဒီတစိၤအံၤ ပအိၣ်ဒီးတၢ်ဆၢတဲာ်တဖၣ် လၢပဂံၢ်ဒွးတလၢာ်န့ၣ် ဖျါဆှဲဝဲဒၣ်န့ၣ်လီၤ. လီၤဆီဒၣ်တၢ် ဖဲလၢပဆိကမိၣ်ထီၣ် ပတၢ်ဃုထၢ ကိးမံၤဒဲးန့ၣ် အိၣ်ဒီးတၢ်အဘျုး (ဂ့ၤမ့ၢ်ဂ့ၤ အၢမ့ၢ်ဂ့ၤ) လၢအပိာ်ထွဲထီၣ်အခံတဖၣ်, ဒီးတနီၤနီၤ ကမ့ၢ်တၢ်လၢအကါဒိၣ်, ဒိၣ်န့ၢ်ဒံး တၢ်အဂုၤအဂၤတဖၣ် အဃိ ဘၣ်သ့ၣ်သ့ၣ် တၢ်ဆၢတဲာ်အါတက့ၢ်န့ၣ် အိၣ်ပတုာ်အသးန့ၣ်လီၤ.
ဖဲတၢ်လဲၤဝ့ၤဝီၤလၢ ပှၢ်မုၢ်ကနၢအနံၣ်လွံၢ်ဆံဝံၤအလီၢ်ခံ, ပှၤအံၣ်စရ့လးဖိတဖၣ် တုၤဃီၤဆူတၢ်လီၢ်လၢကနုာ်လီၤဆူ ထံသီကီၢ်သီတဘ့ၣ်အမဲာ်ညါ န့ၣ်လီၤ. အကတီၢ်လၢခံ, ပှၤအံၣ်စရ့လးဖိတဖၣ်နုာ်လီၤဆူ ကီၢ်အပူၤဝံၤ, ပှၤအံၣ်စရ့လးဖိတဖၣ်အခိၣ်အနၢ် စီၤယိၤရှူ တဲဖျါထီၣ် တၢ်ဃုထၢတမံၤလၢ အတၤပှၤဂီၢ်မုၢ်န့ၣ် ဖျါဖဲ ယိၤရှူ ၂၄:၁၄ အပူၤ “ပျံၤယွၤ, ဒီးမၤတၢ်လၢလၢပှဲၤပှဲၤ, တီတီလိၤလိၤ ဒီးသုးကွံာ် ကစၢ်တဖၣ်လၢ သုပၢ်မၤအတၢ်လၢ ထံမိၢ်ပှၢ် ဝၢ်ဘးခီတက့ၢ်” န့ၣ်လီၤ. ဒီးအဆၢဖိ ၁၅ အပူၤ စီၤယိၤရှူစံးဘၣ် ပှၤဂီၢ်မုၢ်လၢ “ဒီးမ့မ့ၢ်တၢ်အၢလၢ သုမဲာ်လၢသုကမၤယွၤအတၢ်ဒီး, ဃုထၢလၢ မုၢ်မဆါတနံၤအံၤ ပှၤလၢသုကမၤအတၢ်န့ၣ်တက့ၢ်. မ့မ့ၢ်ယဲဒၣ်အံၤ, ဒီးယပှၤဟံၣ်ဖိ, ပကမၤယွၤအတၢ်လီၤ” န့ၣ်လီၤ.
ဖဲပစးထီၣ် နံၤသီအသီတနံၤစုာ်စုာ်န့ၣ် တၢ်အဂ့ၤအဝါကဟဲအိၣ်ထီၣ်အသးတဖၣ်လၢပမဲာ်ညါန့ၣ်, ကနဲၣ်ဆှၢပှၤဆူ တၢ်ဆၢတဲာ်အါမံၤအါကလုာ် န့ၣ်လီၤ. ဟံးန့ၢ်တၢ်ဆၢကတီၢ်, ဒီးတၢ်ဃ့သကွံာ်ကညး ကစၢ်ယွၤအတၢ်နဲၣ်ဆှၢပှၤန့ၣ်, ကဒိၣ်စိလုၢ်ဘၢ ပတၢ်ဃုထၢသ့ၣ်တဖၣ်အဖီခိၣ်န့ၣ်လီၤ. ခီဖျိလၢ ကစၢ်ယွၤသးစီဆှံ အစိအကမီၤအပူၤ, ပဃုထၢလူၤပိာ် ကစၢ်ယွၤအကျဲအကပိၤအပူၤ ကိးမုၢ်နံၤဒဲးသ့ဝဲဒၣ်န့ၣ်လီၤ..
