ဒ် ၁၉၂၉ နံၣ် ဒီး ၂၀၀၈ နံၣ်, မ့ၢ်နံၣ်တဖၣ်လၢ အဟဲစိာ်တၢ်ဟးဂူာ်ဟးဂီၤ ဆူမုၢ်ကျိၤဝဲၤကွၢ်တဖၣ်အဃိ, ဒ်သိးကမၤစၢၤ တၢ်ကဟးဆှဲး ခါဆူညါ တၢ်ကမူၤကမၣ်ဘၣ်ထွဲဒီး ကျိၣ်စ့တၢ်ဂ့ၢ်ကီအဂီၢ်, တၢ်ကမူၤကမၣ်အလံာ်ရိဖှိၣ်ဒၢးတဖျၢၣ် ဘၣ်တၢ်သူၣ်ထီၣ်အီၤလၢ ကီၢ်စကီးတလဲ(န), အံၤဒ့ၤဘၢး အဝ့ၢ်န့ၣ်လီၤ. လၢလံာ်ရိဖှိၣ်ဒၢးအံၤအပူၤ, အိၣ်ဒီး လံာ်ပာ်ဖှိၣ် ခံကထိဘျဲၣ် လၢအကဟ့ၣ်ထီၣ်တၢ်သ့ၣ်ညါတၢ်နၢ်ပၢၢ် ဆူစိၤလၢခံ မုၢ်ကျိၤဝဲၤကွၢ် အပှၤကူၣ်သ့တဖၣ်အဂီၢ်န့ၣ်လီၤ. ဒ်ပှၤပၢၤလံာ်ရိဖှိၣ်ဒၢးတဖၣ် စံးဝဲအသိး, လံာ်ရိဖှိၣ်တဖျၢၣ်အံၤ ကဟ့ၣ်တၢ်အဒိအလၢအပှဲၤတမံၤလၢ “ပှၤစဲၣ်နီၤတဖၣ် မၤကမၣ်တၢ်တလီၢ်လီၢ်ဒ်လဲၣ်”အဂ့ၢ်န့ၣ်လီၤ. ပှၤပၢၤလံာ်ရိဖှိၣ်တဖၣ် နာ်ဝဲလၢ တၢ်ကသူၣ်ထီၣ် မုၢ်ကျိၤဝဲၤကွၢ် လၢအဂံၢ်ဆူၣ်ဂၢၢ်ကျၢၤအဂီၢ်န့ၣ်, ကျဲအိၣ်ထဲတထံၣ်, ဒီးကျဲအံၤမ့ၢ်တၢ်မၤလိန့ၢ် တၢ်လၢအပူၤကွံာ်တၢ်ကမၣ်တဖၣ်န့ၣ်လီၤ.
ဒ်သိးတၢ်ကဟးဆှဲး တၢ်လ့ပစီ, ဒီးကအိၣ်မူအိၣ်ဂဲၤလၢ နီၢ်သးအတၢ်ဂံၢ်ဆူၣ်ဘါဆူၣ်အဂီၢ်န့ၣ်, စီၤပီလူး ဒုးသ့ၣ်နီၣ်ထီၣ် ပှၤကရံၣ်သူးဖိတဖၣ် ကမၤလိန့ၢ်တၢ် ခီဖျိလၢအပူၤကွံာ် ယွၤအပှၤဂီၢ်မုၢ် အတၢ်ကမူၤကမၣ်တဖၣ်အပူၤန့ၣ်လီၤ. လၢတၢ်န့ၣ်အဃိ, ဒ်သိးပှၤကရံၣ်သူးဖိတဖၣ် အသု တကဲထီၣ် ပှၤလၢအလဲၤတလၢကွံာ် တၢ်နာ်န့ၢ်လီၤသး လၢနီၢ်သးခွဲးယာ်လီၤဆီအဂီၢ်, ပှၤတၢ်မၢဖိ စူးကါ လၢပျၢၤပှၤအံၣ်စရ့လးဖိ အတၢ်လီၤတူာ်လီၤကာ်တဖၣ် ဒ်အမ့ၢ်တၢ်အဒိလၢ ပှၤကရံၣ်သူးဖိတဖၣ်ကဒိးန့ၢ်တၢ်ကူၣ်သ့အဂီၢ်န့ၣ်လီၤ. ၁ ကရံၣ် ၁၀:၇-၁၀ အပူၤပာ်ဖျါဝဲ ပှၤအံၣ်စရ့လးဖိတဖၣ် ဘါတၢ်ဂီၤတၢ်ဖီၣ်, ဃုထၢမၤ “တၢ်မၤကမၣ်မုၣ်ကမၣ်ခွါ”, ကဒူးကဒ့ၣ် ကစၢ်ယွၤအတၢ်တိာ်တၢ်ရဲၣ်တၢ်ကျဲၤ, ဒီးတၢ်ပညိၣ်လၢအဝဲသ့ၣ်အဂီၢ်, ဒီးပူထီၣ်ခိၣ်နၢ်လၢယွၤပာ်လီၤတဖၣ်န့ၣ်လီၤ. မ့ၢ်လၢအဝဲသ့ၣ် အတၢ်ဒဲးဘးအဃိ, ဘၣ်လဲၤခီဖျိ ယွၤအတၢ်သိၣ်ဃီၣ်န့ၣ်လီၤ. အဆၢဖိ ၁၁ အပူၤန့ၣ် စီၤပီလူး ယၢၤထီၣ် “တၢ်အဒိအတဲာ်တဖၣ်” လၢတၢ်စံၣ်စိၤတဲစိၤ ဖျါဖဲလံာ်စီဆှံအပူၤ, ဒ်သိးကမၤစၢၤ ပှၤလၢအစူၢ်က့ၤနာ်က့ၤကစၢ်ယ့ၣ်ရှူးတဖၣ် ကဟးဆှဲး တၢ်မၤကမၣ်ဘၣ်တၢ်တလီၢ်လီၢ် ဒ်ပှၤအံၣ်စရ့လးဖိတဖၣ်အသိးန့ၣ်လီၤ.
မ့ၢ်လၢကစၢ်ယွၤ မၤစၢၤပှၤသတးဒီး, ဒ်သိးပကဒိးန့ၢ် သးလၢ အစူၢ်ဒိကနၣ် ကစၢ်ယွၤအဂီၢ် မ်ပကမၤလိန့ၢ်တၢ်လၢ ပတၢ်ကမူၤတၢ်ကမၣ်တဖၣ်လၢ ပမၤမ့ၢ်ဂ့ၤ, ပှၤဂုၤပှၤဂၤ မၤမ့ၢ်ဂ့ၤန့ၣ်အပူၤတက့ၢ်.
