မုၢ်ဂဲၤဒိ နံရှဲလ် နံးခိ(လ) (Nichelle Nichols) ဘၣ်တၢ်သ့ၣ်နီၣ်အီၤအဂ့ၤကတၢၢ် လၢတၢ်ဂီၤမူ စတါထြဲး(ခ) ‘Star Trek’ အပူၤ, ဒ်သုးခိၣ် အၣ်ဟူရၣ် (Uhura) န့ၣ်လီၤ. အတၢ်ဃုထၢတမံၤအံၤ ဒုးကဲထီၣ် အနီၢ်ကစၢ်အမံၤဟူထီၣ်သါလီၤအဂီၢ်, ဒီးမ့ၢ် အဲဖြံၤကၤ-အမဲရကၤမုၣ် အဆိကတၢၢ် တဂၤ လၢကွဲၤထံၣ်ဟူအတၢ်ဒုးနဲၣ်အပူၤန့ၣ်လီၤ. ဘၣ်ဆၣ် အတၢ်မၤနၢၤဒိၣ်န့ၢ်အါန့ၢ်တၢ်တမံၤ လၢတၢ်အိၣ်မူအပူၤ ကဟဲဝဲဒၣ်ဒံးန့ၣ်လီၤ.

နီၢ်နီၢ်န့ၣ် ဖဲတၢ်ဂီၤမူ စတါထြဲး(ခ) အခီၣ်ထံးတပတီၢ်ဝံၤန့ၣ်ဒီး ဒ်သိးကက့ၤကဒါက့ၤဆူ တၢ်ဒုးနဲၣ်မူအတၢ်မၤအဂီၢ် နံးခိ(လ) ဟးထီၣ်ကွံာ်ဝဲဒၣ်လံန့ၣ်လီၤ. လၢခံန့ၣ် ထံၣ်လိာ်အသးဒီး မ့ၣ်တ့ၣ်လူသၣ်ခ့ ကၠူနယၢၣ်, ပှၤလၢဟ့ၣ်ဂံၢ်ဟ့ၣ်ဘါအီၤ ဒ်သိးအသုတတပာ်တ့ၢ်ကွံာ် တၢ်ဂဲၤဒိ တၢ်ဂီၤမူအံၤအဂီၢ်န့ၣ်လီၤ. အဝဲစံးဘၣ် နံးခိ(လ), မ့ၢ်တၢ်အဆိကတၢၢ်တဘျီ လၢပှၤသူဖံး အဲဖြၤကၤ- အမဲရကၤမုၣ်တဂၤ ဘၣ်တၢ်ထံၣ်အီၤလၢကွဲၤထံၣ်ဟူအတၢ်ရဲၣ်တၢ်ကျဲၤ, ဒ်အမ့ၢ် ပှၤစဲၣ်နီၤ, ကူၣ်သ့ကူၣ်ဘၣ်တဂၤလၢ မၤတၢ်သ့ခဲလၢာ်, လဲၤထီၣ်တုၤဒၣ်လဲာ် ဆူမူဒီပျီအဃိ န့ၣ်လီၤ. ခီဖျိလၢအဂဲၤဒိဝဲ ဒ်သုးခိၣ် အၣ်ဟူရၣ်အသိးန့ၣ်, နံးခိ(လ) အမံၤဟူထီၣ်သါလီၤ အါထီၣ်ဒိၣ်ထီၣ်အဃိဒီး ပာ်ဖျါဒုးသ့ၣ်ညါဘၣ် ပှၤသူဖံးမုၣ်တဖၣ် ဃုာ်ဒီးဖိသၣ်တဖၣ်အဂီၢ် တၢ်လၢအဝဲသ့ၣ်ကဲထီၣ်ဝဲသ့တဖၣ်န့ၣ်လီၤ.

တၢ်ဂ့ၢ်အံၤ ဒုးသ့ၣ်နီၣ်ထီၣ်ယၤ, လၢ မၢ်ကူး ၁၀:၃၇ အပူၤ စီၤယၤကိာ်ဒီးစီၤယိၤဟၣ် ဃ့ဝဲတၢ်လီၢ်တၢ်လၤအဂ့ၤကတၢၢ်, လၢကစၢ်ယ့ၣ်ရှူး အဘီအမုၢ်အပူၤန့ၣ်လီၤ. တၢ်လီၢ်တၢ်လၤ ဒ်သိးအံၤလၢ ပှၤတဂၤအတၢ်မၤနၢၤအဂီၢ် ကမ့ၢ်တၢ်မနုၤလဲၣ်. အဆၢဖိ ၃၈-၄၀ အပူၤ တမ့ၢ်ထဲ ကစၢ်ယ့ၣ်ရှူးတဲနၢ်ပၢၢ် အဝဲသ့ၣ်အတၢ်ဃ့လၢ ကဒုးကဲထီၣ် တၢ်ကီတၢ်ခဲအတၢ်မ့ၢ်တၢ်နီၢ်နီၢ်, တကးဒ်ဘၣ်န့ၣ် ကိးဝဲအပျဲၢ်အဘီၣ်တဖၣ်ဆူလီၢ်ထီၣ်ထီ, ဒီးစံးဝဲလၢ အဆၢဖိ ၄၃ အပူၤ “ဖဲဒၣ်ပှၤလၢတၢ်မိၣ်ကဲဒိၣ်အသးလၢသုကျါတဂၤဂၤန့ၣ် ကကဲလၢသုခ့သုပှၤလီၤ” န့ၣ်လီၤ. အဆၢဖိ ၄၅ ပာ်ဖျါဝဲလၢ ပှၤပိာ်ကစၢ်ယ့ၣ်ရှူးအခံတဖၣ် တမ့ၢ်ကဘၣ်ဃုထဲ အနီၢ်ကစၢ်အဘျုး န့ၣ်ဘၣ်, ဒ်ကစၢ်ယ့ၣ်ရှူးအသိး, ကဘၣ်စူးကါအလီၢ်အလၤတဖၣ် လၢတၢ်ကမၤတၢ်ခ့တၢ်ပှၤ အတၢ်မၤလၢပှၤဂၤအဂီၢ်န့ၣ်လီၤ. လၢတၢ်မၤနၢၤအါထီၣ်တၢ်လၢ ပှၤအဲဖြကၤ-အမဲရကၤဖိတဖၣ် အဂီၢ် နံးရှဲလ် နံးခိ(လ) မၤသကိးတၢ်ဒီး စတါထြဲး(ခ) တၢ်ဂီၤမူန့ၣ်လီၤ. ပဝဲစ့ၢ်ကီး မ်ပသုတသးမံ ထဲပနီၢ်ကစၢ် အတၢ်မၤနၢၤတဂ့ၤ, မ့မ့ၢ်လၢကစၢ်ခရံာ်အမံၤန့ၣ် မ်ပကစူးကါလီၢ်လၤဖိလၢပဒိးန့ၢ် တဖၣ် လၢပှၤအါဂၤအဂီၢ်တက့ၢ်.