ဖဲ နံၣ်ကယၤ ၁၉ အတီၢ်ပူၤန့ၣ် ပှၤစကီးတ့း(ရှ်)ဖိ တၢ်အိၣ်ဖှိၣ်သရၣ် ထီမၢး ခၠါလ်မၣ် (Thomas Chalmers) တဘျီန့ၣ်စံးဝဲ အတၢ်လဲၤဒိးကသ့ၣ်လ့ၣ် လၢကစၢၢ်ကလိ, ဒီးတၢ်လဲၤကျဲတဖၣ် အိၣ်ပှဲၤဒီးတြီၤလာ်အဂ့ၢ်န့ၣ်လီၤ. ကသ့ၣ်တဖၣ်လၢအထုးလ့ၣ်အကျါတဒုန့ၣ် ဖုးသံပျီၢ်သံဒီးစံၣ်ဖုး ဝဲအဃိ ပှၤနီၣ်ကသ့ၣ်လ့ၣ်တဂၤန့ၣ်ဘၣ်ယိၣ်ဝဲလၢ အဝဲသ့ၣ်ခဲလၢာ် ကလီၤတဲာ်သံလၢတြီၤလာ် အဃိဒီး, ဖျ့တရံး, ဝံၤမၤသီၣ်အနီၣ်ဖျ့အကလုၢ်, တဘျီဘၣ်တဘျီ, တဘျီဘၣ်တဘျီန့ၣ်လီၤ. ဖဲအဝဲသ့ၣ် ပူၤဖျဲးလၢသးသမူတၢ်လီၤဘၣ်ယိၣ်အလီၢ်ဝံၤန့ၣ် ခၠါလ်မၣ် သံကွၢ်ပှၤနီၣ်ကသ့ၣ်လ့ၣ်လၢ ဘၣ်မနုၤအဃိ အဖျ့တရံး, ဝံၤမၤသီၣ်အနီၣ်ဖျ့အကလုၢ်လဲၣ်န့ၣ်ဒီး, စံးဆၢဝဲ “ဒ်သိးကသ့ၣ်တဖၣ် အသးတဒံဝ့ၤဒံဝီၤ, ဒီးကပာ်သူၣ်ပာ်သးဒၣ်ထဲလၢယၤအဂီၢ်, ယဘၣ်မၤဝဲဒ်သိးအံၤလီၤ” န့ၣ်လီၤ.

ဟီၣ်ခိၣ်လၢပအိၣ်ဆိးတဖျၢၣ်အံၤ, လၢပခိၣ်ဃၢၤဝးဝးန့ၣ် အိၣ်ပှဲၤဒီး တၢ်မၤပျံၤမၤဖုးပှၤ, ဒီးတၢ်လီၤဘၣ်ယိၣ်တဖၣ်လၢသးသမူအပူၤအဃိ, ပဝဲခဲလၢာ်ပလိၣ်ဘၣ်တၢ်တမံၤမံၤ ဒ်သိးပကပာ် သူၣ်ပာ်သး, ဒီးကထုးန့ၢ်သူၣ်န့ၢ်သးပှၤအဂီၢ်န့ၣ်လီၤ. ဘၣ်ဆၣ်ပလိၣ်ဘၣ်တၢ်အါန့ၢ် တၢ်လၢကထုးန့ၢ် ပသးဆူတၢ်အဂၤတမံၤ- ဒ်အမ့ၢ်တၢ်မၤဒံဝ့ၤဒံဝီၤပှၤလၢနီၢ်သးတကပၤန့ၣ်လီၤ. တၢ်လၢပလိၣ်ဘၣ်တၢ် အဒိၣ်ကတၢၢ်န့ၣ်မ့ၢ်ဝဲ ပကဘၣ်မၤဃံး, စၢထီဃာ်ပသးလၢ တၢ်အမ့ၢ်အတီနီၢ်နီၢ်, တၢ်လၢအစိကမီၤ ဒိၣ်န့ၢ်ဒံး ပတၢ်ပျံၤတၢ်ဖုးတဖၣ်န့ၣ်လီၤ. ဒ်ဝံယရှါယၤ စံးဘၣ်ယွၤအပှၤဂီၢ်မုၢ်လၢကီၢ်ယူဒၤအပူၤအသိး, တၢ်လၢပလိၣ်ဘၣ်နီၢ်နီၢ်န့ၣ် မ့ၢ်ဒၣ်ပကဘၣ်ပာ်စူၣ်ပနီၢ်သးထဲဒၣ် တထံၣ်ဃီဆူကစၢ်ယွၤအအိၣ် န့ၣ်လီၤ. ယရှါ ၂၆:၃ န့ၣ် ဝံအၢၣ်လီၤအီလီၤဝဲ “ပှၤအသးလၢ အသန့ၤအသးလၢနၤန့ၣ် နကပၢၤအီၤ လၢတၢ်ဃူတၢ်ဖိးအလၢအပှဲၤန့ၣ်လီၤ.” အဆၢဖိ ၄ အပူၤစံးကဒီးဝဲ “သန့ၤသုသးလၢယွၤ လီၤစိၤလီၤထီတက့ၢ်. အဂ့ၢ်ဒ်အံၤ, လၢကစၢ်ယွၤအပူၤန့ၣ် လၢၢ်အထူအယိာ်အိၣ်ဝဲတဖျၢၣ်လီၤ” န့ၣ်လီၤ.

သးအတၢ်ဃူတၢ်ဖိး မ့ၢ်ကစၢ်ယွၤအတၢ်ဟ့ၣ်ဆူ ကယဲၢ်ပှၤလၢအကွၢ်စူၣ်တၢ်တထံၣ်ဃီ ထဲဒၣ် ဆူကစၢ်ယွၤအအိၣ်တဖၣ်အဂီၢ်န့ၣ်လီၤ. ကစၢ်ယွၤအတၢ်ဃူတၢ်ဖိး လၢအဟ့ၣ်လီၤဝဲန့ၣ် ဂ့ၤဒိၣ်န့ၢ်ဒံး ကျိၤကျဲလၢကဒီတဒၢ ပသးအတၢ်ဆိကမိၣ်ဆှၢပှၤဆူ တၢ်ဟးဂုာ်ဟးဂီၤတဖၣ်န့ၣ်လီၤ. ပှၤတဖၣ်လၢ အဟ့ၣ်လီၤအးလီၤ အတၢ်အိၣ်မူခါဆူညါ, အတၢ်မုၢ်လၢ်တဖၣ်ဃုာ်ဒီးအတၢ်ဘၣ်ယိၣ်ဘၣ်ဘီတဖၣ် ဆူကစၢ်ယွၤအစုပူၤန့ၣ်ဒီး သးစီဆှံကမၤစၢၤ တၢ်အိၣ်မူကျိၤကျဲအသီခဲလၢာ် လၢအဝဲသ့ၣ်အဂီၢ် န့ၣ်လီၤ.