ယဖိမုၣ်အကျါတဂၤန့ၣ် ယစံးဘၣ်အီၤလၢ “တချုးနမံန့ၣ် ဝံသးစူၤ မၤကဆှီတၢ်မဲာ်ညါဒၢးတထံၣ်” န့ၣ်ဒီး, စံးဆၢဝဲတဘျီဃီလၢ, “ဘၣ်မနုၤအဃိ အဝဲတဘၣ်မၤဝဲလဲၣ်” န့ၣ်လီၤ. ဖဲပဖိမုၣ်ဖိတဖၣ် အသးစၢ်ဒံးအကတီၢ် တၢ်ဂ့ၢ်လိာ်ဒ်သိးအံၤန့ၣ် အိၣ်ဝဲတလီၢ်လီၢ်န့ၣ်လီၤ. ထီဘိန့ၣ် ယတၢ်စံးဆၢမ့ၢ် တၢ်တမံၤဃီ, “လၢနဒီပုၢ်ဝဲၢ်မုၣ်တဖၣ်အဂီၢ် တဘၣ်ကိၢ်ဘၣ်ဂီၤနဲတဂ့ၤ, ယမၤနၢၤလီၤ” န့ၣ်လီၤ.
လံာ်ယိၤဟၣ် အဆၢဒိၣ် ၂၁ အပူၤ ပကထံၣ်ဘၣ် ပှၤဟီၣ်ခိၣ်ဖိအန့ဆၢၣ် ဒ်သိးအံၤန့ၣ်လီၤ. ဖဲစီၤပ့းတရူးသမၢအီၤသၢစုဝံၤန့ၣ် ကစၢ်ယ့ၣ်ရှူးဘၣ်မၤဂ့ၤမၤဘၣ်က့ၤ စီၤပ့းတရူးန့ၣ်လီၤ. (ကွၢ် ယိၤဟၣ် ၁၈:၁၅-၁၈,၂၅-၂၇). ခဲကနံၣ်အံၤ ယိၤ ၂၁:၁၉ အပူၤန့ၣ် ကစၢ်ယ့ၣ်ရှူး စံးဘၣ် စီၤပ့းတရူး “ပိာ်ယခံတက့ၢ်” န့ၣ် တမ့ၢ်တၢ်မၤလိာ် လီၤတိၢ်လီၤဆီဘၣ် ကဲထီၣ်တၢ်ဘၣ်ဒိဆါလၢအဂီၢ် န့ၣ်လီၤ. အဆၢဖိ ၁၈-၁၉ အပူၤန့ၣ် ကစၢ်ယ့ၣ်ရှူးဒုးသ့ၣ်ညါနၢ်ပၢၢ်အီၤ ဒ်သိးကပိာ်အခံ တုၤအသံတစုအဂီၢ်န့ၣ်လီၤ.
အဆၢဖိ ၂၁ အပူၤ ဖဲတချုးသံကွၢ် “တၢ်ကမၤအသးလၢအီၤဒ်လဲၣ်,” ဘၣ်ထွဲဒီး အပျဲၢ်အဘီၣ် လၢအလီၢ်ခံတဂၤအဂ့ၢ်ဒံးဘၣ်န့ၣ် ဒ်သိးကနၢ်ပၢၢ်ဝဲ ကစၢ်ယ့ၣ်ရှူးအတၢ်ကတိၤတဖၣ်န့ၣ် စီၤပ့းတရူး ကဆိကမိၣ်တၢ်အဂီၢ် တၢ်ဆၢကတီၢ်တအိၣ်အါအါလၢအဂီၢ်ဘၣ်. ယ့ၣ်ရှူးစံးဆၢအီၤ, “အဝဲတဂၤအံၤ ယသးမ့ၢ်အိၣ်လၢအကအိၣ်တုၤယဟဲက့ၤဒီး မ့ၢ်အဘၣ်ဃးဒီးနၤဒ်လဲၣ်” ဝံၤန့ၣ် အဆၢဖိ ၂၂ အပူၤ ကစၢ်ယ့ၣ်ရှူးစံးဘၣ်အီၤလၢ “နဲဒၣ်အံၤ ပိာ်ယခံတက့ၢ်” န့ၣ်လီၤ.
အါစူအါဘျီန့ၣ် ပလီၤဂာ်ဒီးစီၤပ့းတရူးန့ၣ်လီၤ. ပဟးဆိကမိၣ်ဒၣ်ထဲ ပှၤဂုၤပှၤဂၤ အတၢ်စူၢ်တၢ်နာ်အဂ့ၢ်အကျိၤ ဒီးတၢ်လၢကစၢ်ယွၤမၤတၢ်လၢပဂီၢ်န့ၣ် ပတဆိကမိၣ်ဘၣ်. အတၢ်အိၣ်မူလၢခံအကတီၢ်, ဖဲလၢကစၢ်ယ့ၣ်ရှူး ပာ်ဖျါဆိတ့ၢ်လံလၢကဘၣ်သံဟဲဘူးထီၣ်အဂ့ၢ်, ဖျါလၢ ယိၤဟၣ် ၂၁ အပူၤန့ၣ် စီၤပ့းတရူး ပာ်ဖျါဝဲလီၤတံၢ်လီၤဆဲး ဘၣ်ထွဲဒီး ကစၢ်ခရံာ်မၤလိာ်တၢ် လၢအတမ့ၢ်တၢ်လီၤတိၢ်လီၤဆီဖိအံၤ- လၢ ၁ ပ့း၁:၁၄-၁၅ အပူၤ, “ဒ်ဖိသၣ်လၢအနၢ်လိၤအသိးန့ၣ် ဒုးမၤက့ၤသုက့ၢ်သုဂီၤ ဒ်တၢ်သးကွံအခီၣ်ထံး လၢသုတသ့ၣ်ညါ ဘၣ်တၢ်ဘၣ်အပူၤအသိးန့ၣ်တဂ့ၤ, မ့မ့ၢ် ဒ်ပှၤလၢအကိးန့ၢ် သုမ့ၢ်အစီအဆှံအသိးန့ၣ် ကဲထီၣ်သုဝဲစ့ၢ်ကီး လၢအစီအဆှံ လၢသုမၤတၢ်ဖံးတၢ်မၤကိးအမံၤဒဲး အပူၤတက့ၢ်” န့ၣ်လီၤ. တၢ်ဂ့ၢ်အံၤ လၢဝဲလီၢ်ဝဲလၢ ပဝဲတဂၤဘၣ်တဂၤအဂီၢ် ဒ်သိးပကဖှိၣ်ဃီၤ ဆိကမိၣ်ထဲဒၣ်ဆူကစၢ်ယ့ၣ်ရှူးအအိၣ်, ဒီးတမ့ၢ်ပကဘၣ်ဆိကမိၣ် ပှၤလၢအိၣ်ဝးတရံးပှၤတဖၣ် အဂ့ၢ်ဘၣ်န့ၣ်လီၤ.
