တနံၤအံၤ အံၣ်ဖံးဖနံၣ် (Epiphany) အမုၢ်နံၤ, လၢတၢ်မၤလၤကပီၤ ပှၤတခီဘီမုၢ်ဖိ ပှၤကူၣ်ဘၣ်ကူၣ်သ့တဖၣ် ဟဲအိၣ်သကိးဖိသၣ်ယ့ၣ်ရှူးအဂ့ၢ်အကျိၤ ဖျါလၢတၢ်သးဝံၣ်, “ပဝဲမုၢ်ထီၣ် စီၤပၤသၢဂၤ” အပူၤန့ၣ်လီၤ. အဝဲသ့ၣ်တမ့ၢ်စီၤပၤဘၣ်, အဝဲသ့ၣ်တမ့ၢ်လၢမုၢ်ထီၣ်အကတၢၢ်တကပၤ (ဒ်လၢသီ ပှၤဆိကမိၣ်မုၢ်ထီၣ်) န့ၣ်ဘၣ်, ဒီးတမ့ၢ်ထဲ အဝဲသ့ၣ်ပှၤသၢဂၤဘၣ်န့ၣ်လီၤ.

ကွၢ်ဖဲကမ့ၢ်ဒၣ်ဝဲ, တၢ်ဟ့ၣ်အိၣ်ဝဲသၢမံၤ, ဒီးတၢ်သးဝံၣ်ပာ်ဖျါ တမံၤဘၣ်တမံၤအဂ့ၢ်န့ၣ်လီၤ. ဖဲပှၤမၢ်ကူးတဖၣ် ဟဲတုၤဝဲ ဘ့ၤသလ့ၤဃၣ်န့ၣ် မး ၂:၁၁ စံးဘၣ်ပှၤ “အဝဲသ့ၣ်အိးထီၣ် အတၢ်လုၢ်ဒိၣ်ပှ့ၤဒိၣ် ဒီးမၤဘူၣ်အီၤလၢ ထူ, လီၢ်ဘၣ်ဒီးမူရၣ်လီၤ” န့ၣ်လီၤ. တၢ်ဟ့ၣ်တဖၣ်အံၤ မ့ၢ်တၢ်ဟ့ၣ်ဒိလၢ ကစၢ်ယ့ၣ်ရှူးအတၢ်မၤအဂီၢ်န့ၣ်လီၤ. ထူပာ်ဖျါထီၣ် ကစၢ်ယ့ၣ်ရှူးအလီၢ်အလၤ ဒ်စီၤပၤအသိး, လီၢ်ဘၣ် မ့ၢ်တၢ်နၢမူလၢဃါဃုာ်အသး လၢပှၤလုၢ်ထီၣ်တၢ်လုၢ်နၢမူ လၢတၢ်လုၢ်လီၢ်ဒီး, မ့ၢ်တၢ်အဒိ ဒ်မူခိၣ်ကစၢ်အသိး, ဒီးမူရၣ် မ့ၢ်တၢ်နၢမူလၢပှၤဘိၣ်ဘံပှၤသံအဃိ အလီၢ်အိၣ်လၢ ပကဘၣ်ဆိကမိၣ်အဂ့ၢ်န့ၣ်လီၤ.

တၢ်သးဝံၣ် လွံၢ်ဆၢတဆၢစံးဝဲ, “မ့မ့ၢ် ယၤယဟဲဆှၢမူရၣ်, အတၢ်နၢမူမ့ၢ်ထဲတၢ်ခၣ်, ဘၣ်သးအုးသံဒီးဂၢ်လီၤသွံၣ်, လၢသွၣ်ခိၣ်ဘၣ်ကျၢ်တံၢ်” န့ၣ်လီၤ. ပတကွဲးပာ်ဖျါ တၢ်ဂ့ၢ်တၢ်ကျိၤ ဒ်သိးအံၤလၢ တၢ်တဲပူအပူၤဘၣ်, ဘၣ်ဆၣ်, ကစၢ်ယွၤကွဲးဝဲလီၤ. ကစၢ်ယ့ၣ်ရှူးအတၢ်သံကဲထီၣ် ပတၢ်အုၣ်က့ၤခီၣ်က့ၤအကံၢ်အလဲန့ၣ်လီၤ. အဆၢဖိ ၁၃ ပာ်ဖျါဝဲ စီၤပၤဟ့ၤရိာ်ဒၣ်လဲာ် ဂုာ်မၤသံ ကစၢ်ယ့ၣ်ရှူး, ဖဲလၢအမ့ၢ်ဒံးဒၣ်ဖိသၣ်အကတီၢ်န့ၣ်လီၤ.

တၢ်သးဝံၣ်အကတၢၢ်တဆၢန့ၣ် ပာ်ဖှိၣ်တၢ်ဂ့ၢ်တဖၣ်လၢထးခဲလၢာ်- “စီၤပၤဒီးယွၤအတၢ်တူၢ်သံ, ကွၢ်ကွၢ်ခဲအံၤ မူထီၣ်က့ၤလံ,” ဒီးတၢ်အံၤမ့ၢ်ခရံာ်အိၣ်ဖျဲၣ်အပူ အတၢ်လၢတၢ်ပှဲၤ, ဒီးသဆၣ်ထီၣ်ဝဲလၢ ပကစံးဆၢသးဝံၣ်ဆၢ “ဟါလ့လူၤယၤ ကိးထီၣ်ဖးဒိၣ်, ဟီၣ်ခိၣ်ဒီးဆူမူခိၣ်” န့ၣ်လီၤ.