ဖဲပလဲၤဟးကသုၣ်ကသီတၢ်အဆၢကတီၢ်, ယမါသးဘိဒီးယၤ ပလဲၤဟးဒိးလ့ၣ်ယီၢ်ခီၣ် လၢဂီၤသီသီအကတီၢ်န့ၣ် မုာ်ဒိၣ်မးလၢပဂီၢ်န့ၣ်လီၤ. ပလဲၤတၢ်ကျဲတဘိန့ၣ် အိၣ်ဒီးဟံၣ်တဖၣ် အလုၢ်အပှ့ၤအိၣ် လၢဒီလၣ်အကကွဲၢ်တဖၣ်အကကွဲၢ်န့ၣ်လီၤ. ပထံၣ်ပှၤအိၣ်အကလုာ်အကလုာ်- ပှၤအိၣ်ဆိးဖဲန့ၣ်တဖၣ် လၢအဟးယူၤအထွံၣ်တဖၣ်, ပှၤဒိးလ့ၣ်ယီၢ်ခီၣ် ဒ်ပဝဲအသိးတဖၣ်, ဒီးတနီၤမ့ၢ်ပှၤမၤတၢ်ဖိအါဒံအါဂၤ လၢအသူၣ်ထီၣ်ဘှီထီၣ် ဟံၣ်အသီတဖၣ် မ့ၢ်ဂ့ၤ ပှၤလၢအအံးထွဲ ကွၢ်ထွဲ ဟီၣ်ခိၣ်လီၢ်ကဝီၤအက့ၢ်အဂီၤလၢ အဘၣ်တၢ်ပၢၤဃာ်အီၤဂ့ၤဂ့ၤတဖၣ်န့ၣ်လီၤ. လၢပသိး ပကျါန့ၣ်တၢ်လီၤတိၢ်လီၤဆီလိာ်သးနီၢ်နီၢ် တအိၣ်နီတမံၤဘၣ်. ပှၤကဲဒိၣ်မ့ၢ်ဂ့ၤ ပှၤဖှီၣ်ဖိယာ်ဖိမ့ၢ်ဂ့ၤ, ပှၤထူးပှၤတီၤမ့ၢ်ဂ့ၤ ပှၤမၤတၢ်ဖိမ့ၢ်ဂ့ၤ, ပှၤလၢပှၤသ့ၣ်ညါအီၤမ့ၢ်ဂ့ၤ, ပှၤတသ့ၣ်ညါမ့ၢ်ဂ့ၤ, ဖဲမုၢ်ဂီၤ အကတီၢ်အံၤန့ၣ် ကယဲၢ်ပှၤအိၣ်လၢကျဲတဘိအံၤအလိၤတဖၣ် မ့ၢ်တၢ်တမံၤဃီန့ၣ်လီၤ. ကတိၤဒိ ၂၂:၂ ခ့ခါ အပူၤပာ်ဖျါဝဲ “ပှၤထူးပှၤတီၤ, ဒီးပှၤဖှီၣ်ပှၤယာ်ဖိ အိၣ်ဒီး တၢ်အံၤတမံၤဃီန့ၣ်လီၤ. ယွၤတ့ လီၤအဝဲသ့ၣ် ခံဖုလိာ်လီၤ” န့ၣ်လီၤ. တၢ်တဒ်သိးလိာ်သးတဖၣ် မ့ၢ်အိၣ်ဘၣ်ဆၣ်, ၁မိၤ ၁:၂၇ စံးဘၣ်ပှၤလၢ ပဝဲခဲလၢာ်န့ၣ် ပဘၣ်တၢ်တ့လီၤပှၤလၢကစၢ်ယွၤအက့ၢ်အဂီၤန့ၣ်လီၤ.
ဘၣ်ဆၣ်, အမ့ၢ်တၢ်ဒ်သိးသိး လၢယွၤအမဲာ်ညါစံးတၢ်န့ၣ် အခီပညီအိၣ်ဝဲအါမးန့ၣ်လီၤ. ပတၢ်အိၣ်အသးဘၣ်ဃးဒီး မုၢ်ကျိၤဝဲကွာ်, ပတၢ်ရ့လိာ်ဘၣ်ထွဲလိာ်သး, ဒီးကလုာ်ဒူၣ် ကမ့ၢ်ဝဲဒ်လဲၣ်ဂ့ၤ ဒ်လဲၣ်ဂ့ၤ, ပဝဲခဲလၢာ်န့ၣ် ပမ့ၢ်ပှၤတၢ်ဒဲးဘးဖိတဖၣ်န့ၣ်လီၤ. ရိမ့ၤ ၃:၂၃ စံးဝဲ “ပှၤခဲလၢာ် မၤတၢ်ဒဲးဘး, ဒီးတချုးန့ၢ်ဘၣ်ယွၤအလၤအကပီၤဘၣ်” န့ၣ်လီၤ. ပဝဲခဲလၢာ် ပတဒိကနၣ်တၢ်, ဒီးပတၢ်ဒဲးဘးအိၣ်လၢယွၤအမဲာ်ညါ ဒ်သိးသိးအဃိ, ပလိၣ်ဘၣ် ကစၢ်ယ့ၣ်ရှူး န့ၣ်လီၤ.
အါစုအါဘျီ ပနီၤဖးပဲာ်ဖးပှၤကညီတဖၣ် ဆူကရူၢ်တဖၣ် လၢတၢ်ဂ့ၢ်အကလုာ်ကလုာ်အဖီခိၣ် န့ၣ်လီၤ. ဘၣ်ဆၣ်, တၢ်နီၢ်နီၢ်န့ၣ် ပဝဲခဲလၢာ် ပမ့ၢ်ပှၤဟီၣ်ခိၣ်ဖိတဖၣ်လီၤ. ပမ့ၢ်ပှၤတၢ်ဒဲးဘးဖိတဖၣ် လၢအလိၣ်ဘၣ် တၢ်အုၣ်က့ၤခီၣ်က့ၤကစၢ်န့ၣ်လီၤ. ဘၣ်ဆၣ် အဆၢဖိ ၂၄ ပာ်ဖျါဝဲ ပဘၣ် “တၢ်ပာ်တီပာ်လိၤပှၤ ကလီကလီ” (ဘၣ်တၢ်မၤဃူမၤဖိးက့ၤဒီးယွၤ) ခီဖျိလၢယွၤအဘျုးအဖှိၣ်သ့ဝဲ န့ၣ်လီၤ.
