ဖဲ ၁၉၀၅ နံၣ်န့ၣ် ပှၤအမဲရကၤဖိပှၤကွဲးလံာ် အိၣ်.ဟဲနရံၣ် (O. Henry) ကွဲးဝဲ ခရံာ်အိၣ်ဖျဲၣ်အပူ လၢဘၣ်အသးတယုၢ် “ပှၤမၢ်ကူးတဖၣ် အတၢ်ဟ့ၣ်” (The Gift of the Magi) အကတီၢ်န့ၣ်, အနီၢ်ကစၢ် ဘၣ်ဂဲၤလိာ်ဝဲဒၣ်ဒီး အတၢ်ကီတၢ်ခဲတဖၣ်န့ၣ်လီၤ. တၢ်မၤအသးဒ်သိးအံၤအပူၤဒၣ်လဲာ်, အဝဲကွဲး ပူလၢအထိၣ်ဂဲၤပသးတယုၢ်, ဒုးနဲၣ်ဖျါသကဲာ်ပဝးဃံလၤလၢ အလီၤဂာ်ဒီးခရံာ်, လၢအမ့ၢ် “တၢ်စူးကွံာ်ညိကွံာ်သး” န့ၣ်လီၤ. လၢပူအပူၤန့ၣ်, မါလၢအဖှီၣ်ယာ်ဒိၣ်မးတဂၤ ဆါကွံာ်အခိၣ်သူဖးထီဃံလၤ ဖဲခရံာ်အိၣ်ဖျဲၣ်တချုးဘၣ်အနၤ, ဒ်သိးအကပှ့ၤန့ၢ် ထၢၣ်နၣ်ရံၣ်အပျံၤထူဖိလၢ အဝၤသးဘိအဂီၢ်န့ၣ်လီၤ. ဘၣ်ဆၣ်, လၢခံန့ၣ် သ့ၣ်ညါထွဲဝဲလၢ အဝၤသးဘိဆါကွံာ် အထၢၣ်နၣ်ရံၣ်ဖိ ဒ်သိးကပှ့ၤန့ၢ် သံၣ်တကရူၢ်လၢ အမါအခိၣ်သူဃံလၤအဂီၢ်န့ၣ်လီၤ.
တၢ်ဟ့ၣ်အဒိၣ်ကတၢၢ်လၢ အဝဲသ့ၣ်ဟ့ၣ်တဂၤဒီးတဂၤအဂီၢ်န့ၣ် မ့ၢ်ဝဲတၢ်စူးကွံာ်ညိကွံာ်သးန့ၣ်လီၤ. အဝဲသ့ၣ်မၤတၢ်န့ၣ် ပာ်ဖျါထီၣ် တၢ်အဲၣ်အဒိၣ်အယိာ်န့ၣ်လီၤ.
ဒ်န့ၣ်အသိး, ပူဖိအံၤ ပာ်ဖျါထီၣ် ပှၤမၢ်ကူးတဖၣ် (ပှၤကူၣ်ဘၣ်ကူၣ်သ့တဖၣ်) အတၢ်အဲၣ်အတၢ်ဟ့ၣ်ဆူ ဖိသၣ်ယ့ၣ်ရှူးခရံာ်အဂီၢ်, ဖဲလၢအတၢ်အိၣ်ဖျဲၣ်စီဆှံဝံၤအကတီၢ်န့ၣ်လီၤ (ကွၢ် မး ၂:၁,၁၁). ဘၣ်ဆၣ် တၢ်ဟ့ၣ်ဂ့ၤန့ၢ်ဒိၣ်န့ၢ် တၢ်ဟ့ၣ်တဖၣ်အံၤန့ၣ် မ့ၢ်ဝဲလၢ ကစၢ်ယ့ၣ်ရှူးခရံာ်ဒိၣ်ထီၣ်, ဒီးမုၢ်တနံၤန့ၣ် ဟ့ၣ်လီၤကွံာ်အသးသမူ လၢပှၤဟီၣ်ခိၣ်ဖိတဖၣ်အဂီၢ်န့ၣ်လီၤ.
လၢပတၢ်အိၣ်မူကိးမုၢ်နံၤအပူၤန့ၣ်, ပှၤစူၢ်က့ၤနာ်က့ၤခရံာ်တဖၣ် မၤဖျါထီၣ်က့ၤ ကစၢ်ယွၤ အတၢ်ဟ့ၣ်ဖးဒိၣ်အံၤသ့ဝဲ, ခီဖျိတၢ်ဟ့ၣ်လီၤ ပတၢ်ဆၢကတီၢ်, ပတၢ်ထူးတၢ်တီၤတဖၣ်, ဒီးပတၢ်ပာ်သူၣ်ပာ်သး လၢအပာ်ဖျါတၢ်အဲၣ်တၢ်ကွံအလၢအပှဲၤန့ၣ်လီၤ. တၢ်မၢဖိစီၤပီလူး ကွဲးဝဲလၢ ရိ ၁၂:၁ အပူၤ – “မၤသးဒ်န့ၣ်ဒီး, ပုၢ်သ့ၣ်ဝဲၢ်သ့ၣ်ဧၢ, ယဃ့ကညးသုလၢ ယွၤအတၢ်သးကညီတဖၣ်အဃိ, ဒ်သိးသုကပာ်သုနီၢ်ခိ လၢတၢ်လုၢ်မူစီဆှံ, တၢ်ဘၣ်ယွၤအသး လၢအမ့ၢ်သုတၢ်မၤအဂ့ၤအဘၣ်လီၤ” အသိး, တၢ်ဟ့ၣ်ဂ့ၤန့ၢ်ဒိၣ်န့ၢ် တၢ်လုၢ်ထီၣ်သးသမူလၢပှၤဂၤအဂီၢ် ခီဖျိကစၢ်ယ့ၣ်ရှူး အတၢ်အဲၣ်န့ၣ်, တအိၣ်ဝဲဘၣ်န့ၣ်လီၤ.
