အပူၤကွံာ် တဘျုးနံၣ်န့ၣ်, ပဟံၣ်ဖိဃီဖိတဖၣ်လဲၤဟးဆူ “သနၢၣ်လွံၢ်သနၢၣ်” (Four Corners) မ့ၢ်တၢ်လီၢ်ထဲတတီၤဧိၤ လၢကီၢ်အမဲရကၤအပူၤ, ဖဲကီၢ်စဲၣ် လွံၢ်ဘ့ၣ်အဆၢ ထံၣ်လိာ်သးလၢ တၢ်လီၢ်တတီၤဃီန့ၣ်လီၤ. ယဝၤသးဘိ ဆၢထၢၣ်ဝဲတၢ်လီၢ်လၢ တၢ်မၤနီၣ်ဃာ် ကီၢ်စဲၣ် အရံၣ်စိနၤ (Arizona) န့ၣ်လီၤ. ပဖိခွါ အဒိၣ်ကတၢၢ် အ့ၣ်. ကၠ့ၣ် (A.J) စံၣ်ခီနုာ်လီၤဆူ ကီၢ်စဲၣ် အူတါ (Utah) န့ၣ်လီၤ. ယဖိခွါအဆံးကတၢၢ် စ့ဘံၣ်ယၤ (Xavier)ဖီၣ်ဃာ်ယစု ဖဲပလဲၤခါနုာ်ဆူ ကီၢ်စဲၣ် ကိၣ်လိၣ်ရၤဒိၣ် (Colorado) န့ၣ်လီၤ. ဖဲယလဲၤနုာ်လီၤချ့ချ့ဆူ ကီၢ်စဲၣ် နယူမဲးစံၣ်ကိၣ် (New Mexico) အကတီၢ်, စ့ဘံၣ်ယၤ စံးဝဲ “မိဧၢ, နပာ်တ့ၢ်ယၤ လၢကီၢ်စဲၣ် ကိၣ်လိၣ်ရၤဒိၣ် န့ၣ် ယတူၢ်လိာ်တသ့ဘၣ်” န့ၣ်လီၤ. ပအိၣ်တၢ်လီၢ်တပူၤဃီ ‘ဒီး’ အိၣ်စီၤစုၤလိာ်သး လၢကီၢ်စဲၣ် လွံၢ်ဘ့ၣ် အပူၤဘၣ်ဆၣ်, ပတၢ်နံၤတၢ်အ့ ဟူထီၣ်ဝဲဒၣ်န့ၣ်လီၤ. ခဲအံၤ ပဖိခွါတဖၣ်ဒိၣ်ထီၣ်, ဒီးဟးဖးဒီး ဟံၣ်လံအဃိဒီး, ယသ့ၣ်ညါနၢ်ပၢၢ် အါထီၣ်ယိာ်ထီၣ် ကစၢ်ယွၤအတၢ်အၢၣ်လီၤ အီလီၤလၢ အကအိၣ်ဘူးဒီးအပှၤဂီၢ်မုၢ်ခဲလၢာ်, ဖဲအဝဲသ့ၣ်လဲၤတၢ်တပူၤလၢ်လၢ်န့ၣ်လီၤ.

ယိၤရှူ ၁:၁-၄ ပာ်ဖျါဝဲ စီၤမိၤရှ့ သံဝံၤအလီၢ်ခံ, ယွၤကိးထီၣ် စီၤယိၤရှူ ဒ်အမ့ၢ်ခိၣ်နၢ် ပၢဆှၢတၢ်, ဒီးအၢၣ်လီၤဝဲလၢ အကအိၣ်ဒီးအီၤ လၢယွၤအတၢ်မၤလဲၢ်ထီၣ် ပှၤအံၣ်စရ့လးဖိ အလီၢ် အကျဲန့ၣ်လီၤ. အဆၢဖိ ၅ အပူၤန့ၣ် ကစၢ်ယွၤစံးဝဲဒၣ် “ဒ်ယအိၣ်ဒီး စီၤမိၤရှ့အသိးန့ၣ် ယကအိၣ်ဒီးနၤလီၤ. ယတလီၤစၢ်ဘၣ်လၢနဂီၢ်ဘၣ်, ယတလဲၤသဒၣ်ဘၣ်နၤဘၣ်” န့ၣ်လီၤ. ဒ်အမ့ၢ်ခိၣ်နၢ်အသီတဂၤလၢအပှၤဂီၢ်မုၢ်အဂီၢ်အဃိ ကစၢ်ယွၤသ့ၣ်ညါလၢ စီၤယိၤရှူကဘၣ် ဂဲၤလိာ်သးဒီး တၢ်သးဒ့ဒီဒီး တၢ်ပျံၤတၢ်ဖုးန့ၣ်လီၤ. လၢတၢ်န့ၣ်အဃိ ခီဖျိအတၢ်ကတိၤ လၢအဆၢဖိ ၉ အပူၤ, “ယမၤလိာ်လံနၤလံ, တမ့ၢ်ဘၣ်ဧါ. ပာ်ဆူၣ်နသးဒီး တံးတဟီၣ်တက့ၢ်. ပျံၤတၢ်တဂ့ၤ, ဘၣ်ယိၣ်တၢ်တဂ့ၤ. အဂ့ၢ်ဒ်အံၤ, ယွၤနကစၢ် အိၣ်ဒီးနၤ ဖဲနလဲၤတၢ်တပူၤလၢ်လၢ်လီၤ” အသိး ကစၢ်ယွၤသူၣ်ထီၣ်န့ၢ် တၢ်မုၢ်လၢ်အခီၣ်ထံး လၢစီၤယိၤရှူအဂီၢ်န့ၣ်လီၤ.

ပဝဲနၤယၤဃုာ်ဒီး ပှၤလၢပအဲၣ်ဘၣ်အီၤတဖၣ် လၢတၢ်ကီတၢ်ခဲအကတီၢ်တဖၣ်အပူၤဒၣ်လဲာ်, ကစၢ်ယွၤမ့ၢ်နဲၣ်ဆှၢပှၤ ဖဲလဲၣ်ဂ့ၤဖဲလဲၣ်ဂ့ၤ, , ယွၤအတၢ်အၢၣ်လီၤအီၤလီၤ လၢအမၤမုာ်ပသးအဒိၣ် ကတၢၢ်န့ၣ် မ့ၢ်တၢ်မၤလီၤတံၢ်ပှၤလၢ ‘ထီဘိ’ ကအိၣ်ဒီးပှၤန့ၣ်လီၤ.