လၢတၢးဖးထီပဟံၣ်ဒၢးအကပၤ ထံကမါအပူၤန့ၣ် ခဲနဒၣ်ထိၣ်တၤ (Canada goose) အဒူၣ်အထၢ တနီၤဃုာ်ဒီး ထိၣ်တၤဖိတဖၣ် အိၣ်ဆိးဝဲဒၣ်န့ၣ်လီၤ. အဆူၣ်ထီၣ်သီ ထိၣ်တၤဆံးဆံးဖိတဖၣ်န့ၣ် ဖျါလီၤအဲၣ်လီၤကွံဝဲဒၣ်န့ၣ်လီၤ. ဖဲယလဲၤဟးမ့တမ့ၢ်ဃ့ၢ်တရံးကမါအကတီၢ်, ယတကွၢ်ဘၣ်အဝဲသ့ၣ် ယအိၣ်တသ့ဘၣ်န့ၣ်လီၤ. ဘၣ်ဆၣ်, ယသ့ၣ်ညါလၢ ယတဘၣ်ကွၢ်စူၢ် ထိၣ်တၤအဒိၣ်တဖၣ်န့ၣ်လီၤ. မ့တမ့ၢ်ဘၣ်ဒီး ထိၣ်တၤမိၢ်ပၢ်တဖၣ် လၢအဲၣ်ဒီတဒၢအဖိတဖၣ် ကဆိကမိၣ်လၢ ယကမၤဘၣ်ဒိဆါ အဖိတဖၣ်အဃိ ကမၤသီၣ်အကလုၢ်, ဒီးကလူၤတရီၣ်ယၤန့ၣ်လီၤ.

တၢ်အက့ၢ်အဂီၤလၢ ထိၣ်တၤ ဒီတဒၢကဟုကယာ်အဖိဆံးအံၤ မ့ၢ်တၢ်တမံၤလၢ လံာ်စီဆှံအပူၤ (စံး ၉၁:၄) ပာ်ဖျါဝဲ ကစၢ်ယွၤ အတၢ်ဒီတဒၢကဟုကယာ်, ဒီးအတၢ်အဲၣ်တၢ်ကွံလၢ အဖိတဖၣ်အဂီၢ် န့ၣ်လီၤ. စံး ၆၁ အပူၤ, ဒ်သိးစီၤဒၤဝံး ကလဲၤခီဖျိကလၢၢ်ဘၣ် ကစၢ်ယွၤအတၢ်ကဟုကယာ်အဂီၢ်, ဖျါလၢ အကစၢ်ဘၣ်ဂဲၤလိာ်ဝဲလၢ ကျဲဒ်သိးအံၤန့ၣ်လီၤ. စီၤဒၤဝံးလဲၤခီဖျိကလၢၢ်ဘၣ် ကစၢ်ယွၤအဂ့ၢ်န့ၣ် အဆၢဖိ ၃ ပာ်ဖျါ ဒ်အမ့ၢ် ‘တၢ်ပူၤဖျဲးအလီၢ်, ဒီးတၢးထီခၢၣ်သနၢၢ်’, ဘၣ်ဆၣ်, ခဲကနံၣ်အံၤ အဆၢဖိ ၂ စံးဘၣ်ပှၤလၢ “ယကိးထီၣ်နၤ လၢဟီၣ်ခိၣ်အကတၢၢ်ပူၤန့ၣ်လီၤ. ဆှၢယၤဆူလၢၢ်လၢ အထီန့ၢ်ယၤအအိၣ်န့ၣ်တက့ၢ်” န့ၣ်လီၤ. အဆၢဖိ ၄ ပာ်ဖျါဝဲ စီၤဒၤဝံးအတၢ်ဆၢမုၢ်လၢ် “ယကဃ့ၢ်အိၣ်ခူသူၣ်လၢနဒံးဆ့အဖီလာ်” န့ၣ်လီၤ.

စီၤဒၤဝံးစိာ်ဆှၢထီၣ် အတၢ်နးတၢ်ဖှီၣ်, ဒီးအတၢ်ဆၢမုၢ်လၢ်လၢ ကစၢ်ယွၤကမၤဘျါက့ၤအီၤအဂီၢ်န့ၣ်, အဆၢဖိ ၅ စံးဘၣ်ပှၤ, အဝဲသ့ၣ်ညါလၢ ကစၢ်ယွၤနၢ်ဟူလံအဃိ, စီၤဒၤဝံးဒိးန့ၢ်သးအတၢ်မုာ်တၢ်ပၢၤ န့ၣ်လီၤ. အဆၢဖိ ၈ ပာ်ဖျါထီၣ် ခီဖျိလၢကစၢ်ယွၤအတၢ်တီတၢ်လိၤအဃိ, စီၤဒၤဝံးစံးထီၣ်ပတြၢၤယွၤလၢ “ယသးဝံၣ်ထီၣ်နမံၤလီၤစိၤလီၤထီ” န့ၣ်လီၤ.

ဒ်ပှၤကွဲးထါစံးထီၣ်ပတြၢၤအံၤအသိး, ဖဲပသးကလၢၢ်ဘၣ်လၢ ပအိၣ်ယံၤဒီးကစၢ်ယွၤအတၢ်အဲၣ် အဆၢကတီၢ်, ပမ့ၢ်တူၢ်ဘၣ်ခီၣ်ဘၣ်တၢ်နးတၢ်ဖှီၣ်ဒၣ်လဲာ်, လၢတၢ်ကမၤမုာ်ထီၣ်က့ၤပှၤအဂီၢ် ပဃ့ၢ်ကဒါ က့ၤဆူ ကစၢ်ယွၤအစုတီၤဖီလာ်သ့ဝဲဒၣ်န့ၣ်လီၤ. ယွၤအိၣ်ဒီးပှၤ, ဒီတဒၢပှၤ, ဒီးကဟုကယာ်ပှၤ ဒ်သိး ထိၣ်တၤအမိၢ်တဘ့ၣ် လၢအံးထွဲကွၢ်ထွဲအဖိဆံးတဖၣ် လၢတၢ်စုဆူၣ်ခီၣ်တကးအပူၤအသိးန့ၣ်လီၤ.