မ့ၢ်နနၢ်ဟူဘၣ် “ဘျီၣ်ဒိၣ်လၢ တၢ်မၤလၤကပီၤတၢ်ဆးဆ့ကူဆ့က့ၤ” (The Sewing Hall of Fame) အဂ့ၢ်န့ၣ်ဧါ. တၢ်ကရၢကရိအံၤ ဘၣ်တၢ်စးထီၣ်ဒုးအိၣ်ထီၣ် ဖဲ ၂၀၀၁ နံၣ်, ဒ်သိးကပာ်ပနီၣ်မၤလၤကပီၤ ပှၤတဖၣ် “လၢကျိၤကျဲလီၤဆီအပူၤ မၤစၢၤဆီၣ်ထွဲ တၢ်ဆးတၢ်ကူတၢ်ကၤတၢ်ကူၣ်ဘၣ်ကူၣ်သ့, ဒီးထုးထီၣ် တၢ်ပိးတၢ်လီၤလၢအဂုၤထီၣ်ပသီထီၣ်တဖၣ်ဆူ ဟံၣ်ဃီပူၤတၢ်ဆးဆ့ကူဆ့ကၤတၢ်မၤ, အတၢ်ကဲဘျုး အါနံၣ်အါလါအဂီၢ်” န့ၣ်လီၤ. ပှၤလၢအဘၣ်တၢ်မၤလၤကပီၤတဖၣ်အကျါ ပာ်ဃုာ်ဒီးနီၢ်တဂၤစုာ်စုာ်, လၢအမ့ၢ် မၤသၢ်ဖူ(လ)လဲ(န) (Martha Pullen), ဒီးဘၣ်တၢ်မၤလၤကပီၤအီၤ ဖဲ ၂၀၀၅ နံၣ်န့ၣ်လီၤ. အဝဲဘၣ်တၢ်ပာ်ဖျါထီၣ်အီၤ ဒ်အမ့ၢ်ပိာ်မုၣ်လၢအဖျါဖဲ ကတိၤ ၃၁, “ပိာ်မုၣ်လၢ အအိၣ်ဒီးတၢ်ဂံၢ်တၢ်ဘါ, အိၣ်ဒီးတၢ်ဆိကမိၣ်လၢအပတီၢ်ထီ, ဒီးအတၢ်ဆိၣ်ဂ့ၤတဖၣ်န့ၣ် တလီၤတူာ်လီၤကၢ်လၢကမျၢၢ်အတၢ် သ့ၣ်ညါပာ်ပနီၣ်အီၤတဖၣ်န့ၣ်လီၤ.”

“ဘျီၣ်ဒိၣ်လၢ တၢ်မၤလၤကပီၤတၢ်ဆးဆ့ကူဆ့က့ၤ” အံၤ မ့ၢ်တၢ်ဒုးအိၣ်ထီၣ် ဖဲလၢနံၣ်ကယၤ ခံဆံတၢ ဘၣ်ဆၣ်, တၢ်ဒ်သိးအံၤ မ့ၢ်စးထီၣ်အိၣ်ဝဲလၢ နံၣ်ကယၤတၢအကတီၢ်, ဖဲအံၣ်စရ့လးအကီၢ်ပူၤန့ၣ်ဒီး, ပိာ်မုၢ်တဂၤလၢအမံၤမ့ၢ် နီၢ်တဘံၤသါန့ၣ် ကဘၣ်တၢ်မၤလၤကပီၤအီၤန့ၣ်လီၤ. မၤတၢ် ၉:၃၆,၃၉ ပာ်ဖျါဝဲ နီၢ်တဘံၤသါမ့ၢ်ပိာ်မုၣ်လၢ အစူၢ်က့ၤနာ်က့ၤကစၢ်ယ့ၣ်ရှူးခရံာ်, ဒီးမ့ၢ်ပှၤဆးတၢ်အကူအသိးတဂၤ, ဒီးသူဝဲ အတၢ်ဆၢကတီၢ်တဖၣ်လၢ တၢ်ဆးန့ၢ်ဆ့ဧိၤယၣ်ဧိၤလၢ ပှၤမုၣ်ကမဲအဖှီၣ်အယာ်အိၣ်ဆိးလၢအပှၤတဝၢတဖၣ်အဂီၢ်န့ၣ်လီၤ. ဖဲအဝဲဆိးက့ဒီးသံဝံၤန့ၣ်, ပှၤတၢ်မၢဖိတဖၣ်လဲၤကိး စီၤပ့းတရူး မ့ၢ်ဒ်သိးကစၢ်ယွၤကမၤ တၢ်လီၤလးခီဖျိလၢအီၤန့ၣ်လီၤ. အဆၢဖိ ၃၉ ပာ်ဖျါဝဲ ဖဲစီၤပ့းတရူးလဲၤတုၤန့ၣ်, မုၣ်ကမဲတဖၣ်ဟီၣ်ဝဲဒီး ဒုးနဲၣ်အီၤလၢ ဆ့ဒီးယၣ်တဖၣ် လၢနီၢ်တဘံၤသါ ဆးန့ၢ်အဝဲသ့ၣ်န့ၣ်လီၤ. ဆ့ကူဆ့ကၤတဖၣ်အံၤမ့ၢ် တၢ်အုၣ်သးလၢ နီၢ်တဘံၤသါန့ၣ် ဒ်အဆၢဖိ ၃၆ ပာ်ဖျါဝဲအသိး မ့ၢ်ပှၤ “လၢထီၣ်ပှဲၤထီၣ် ဒီးတၢ်မၤဂ့ၤ” လၢ ပှၤဖှီၣ်ဖိယာ်ဖိလၢဝ့ၢ်ပူၤတဖၣ်အဂီၢ်န့ၣ်လီၤ. ခီဖျိယွၤအစိကမီၤ, နီၢ်တဘံၤသါမူထီၣ်က့ၤလၢတၢ်သံန့ၣ်လီၤ.

ကစၢ်ယွၤကိးပှၤ, ဒီးကတဲာ်ကတီၤပှၤ ဒ်သိးပကစူးကါ ပတၤလၣ်တဖၣ်လၢ ပကမၤဂ့ၤမၤပှဲၤပှၤလၢ အလိၣ်ဘၣ်တၢ်မၤစၢၤ လၢပပှၤတဝၢ ဒီးလၢဟီၣ်ခိၣ်အံၤန့ၣ်လီၤ. လၢကစၢ်ယ့ၣ်ရှူး အတၢ်မၤအဂီၢ် မ်ပသူပတၢ်သ့တၢ်ဘၣ်တဖၣ်, ဒီးခိးကွၢ်တၢ်လၢ အဝဲကစူးကါ ပတၢ်အဲၣ်တၢ်ကွံအတၢ်မၤ လၢတၢ်ကမၤဂ့ၤ ထီၣ်က့ၤသးလၢအလီၤကလဲတဖၣ်, ဒီးတၢ်အိၣ်မူလၢအဟးဂီၤတဖၣ်ဒ်လဲၣ်န့ၣ်တက့ၢ် (အ့း ၄:၁၆).