ယဖီၣ်တၢ်ဂီၤတဘ့ၣ် လၢအပာ်ဖျါပှၤကညီတဖၣ်မံဝဲဒၣ်လၢ စးခိအက့အခီတီၣ်တီၣ်တဖၣ်အဖီလာ် လၢကျဲကဆူးတၢ်ကပီၤကဒုကယီၢ်အဖီလာ်န့ၣ်ဒီး, ယသံကွၢ် ပှၤဃုတီၤအိၣ်ဘှံးနံၤတၢ်မၤလိကၠိဖိတဖၣ် လၢ “မ့ၢ်အဝဲသ့ၣ်ကလိၣ်ဘၣ်တၢ်မနုၤလဲၣ်” န့ၣ်လီၤ. ကၠိဖိတဂၤစံးဆၢ “တၢ်အီၣ်,” အတဂၤစံးဝဲ “ကျိၣ်စ့,” ဒီးမ့မ့ၢ်ပိာ်ခွါဖိတဂၤန့ၣ် စံးဆၢဝဲလၢတၢ်ဆိကမိၣ်ယိာ်ယိာ်အပူၤ “တၢ်လီၢ်လၢကအိၣ်ဘၣ် ဘံၣ်ဘံၣ်ဘၢဘၢတလီၢ်” န့ၣ်လီၤ. ဝံၤအလီၢ်ခံ, ပိာ်မုၣ်ဖိတဂၤ စံးပိာ်ထွဲဝဲလၢ “တၢ်မုၢ်လၢ်” န့ၣ်လီၤ.

အဝဲပာ်ဖျါဆှဲဝဲဒၣ် “တၢ်မုၢ်လၢ် မ့ၢ်တၢ်တမံၤလၢ တၢ်အိၣ်ခိးကွၢ်လၢ်တၢ်အဂ့ၤအဝါ ကဟဲအိၣ်ထီၣ်, ကဲထီၣ်အသး” န့ၣ်လီၤ. ခီဖျိလၢတၢ်တၤတၢ်တဖၣ်အဃိ, တၢ်အိၣ်ခိးကွၢ်လၢ် တၢ်အဂ့ၤအဝါကလီၤဘၣ် ပှၤလၢပတၢ်အိၣ်မူအပူၤန့ၣ် တမ့ၢ်တၢ်လၢအညီဘၣ်ဆၣ် အတၢ်ကတိၤဖိလၢအမ့ၢ် “တၢ်အိၣ်ခိးကွၢ်လၢ်” တၢ်အဂ့ၤအဝါစံးတၢ်န့ၣ် ထုးန့ၢ်သူၣ်န့ၢ်သးလၢယဂီၢ်န့ၣ်လီၤ. ဘၣ်ဆၣ်, လံာ်စီဆှံအတၢ်ပာ်ဖျါ တၢ်မုၢ်လၢ် အဂ့ၢ်န့ၣ် လီၤပလိာ်အသးဒီး ယပျဲၢ်ဖိအတၢ်ပာ်ဖျါန့ၣ်လီၤ. ဒ်လံာ်ဧ့ၤဘြံၤ ၁၁:၁ ပာ်ဖျါဝဲအသိး ပမ့ၢ်စံးလၢ “တၢ်စူၢ်တၢ်နာ်မ့ၢ်တၢ်မုၢ်လၢ်အတၢ်သန့ၤပသး” အဃိန့ၣ်ဒီး ပဝဲလၢ အစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ပမုၢ်လၢ်တၢ်အဂ့ၤအဝါတဖၣ် ကဟဲအိၣ်ထီၣ်လၢပဂီၢ် သ့ဝဲဒၣ်န့ၣ်လီၤ.

တၢ်အဂ့ၤအဝါအဒိၣ်ကတၢၢ်လၢ ပှၤစူၢ်က့ၤနာ်က့ၤခရံာ်တဖၣ် မုၢ်လၢ်ဝဲ လၢတၢ်နာ်န့ၢ်လီၤသး အပူၤသ့န့ၣ် ကမ့ၢ်တၢ်မနုၤလဲၣ်. ဧ့ဘြံၤ ၄:၁ စံးဘၣ်ပှၤလၢ “တၢ်စံးပာ်အိၣ်လီၤတဲာ်လၢ ပကနုာ်ဘၣ်လၢ အတၢ်အိၣ်ဘှံးအပူၤ” န့ၣ်လီၤ. ပှၤစူၢ်က့ၤနာ်က့ၤတၢ်တဖၣ်အဂီၢ်, ကစၢ်ယွၤအတၢ်အိၣ်ဘှံးအပူၤန့ၣ် ပာ်ဃုာ်ဒီး ယွၤအတၢ်မုာ်တၢ်ပၢၤ, တၢ်နာ်န့ၢ်တၢ်လၢတၢ်အုၣ်က့ၤခီၣ်က့ၤ, တၢ်သန့ၤသးလၢယွၤအဂံၢ်အဘါ, ဒီးတၢ်အုၣ်ကီၤလၢ ခါဆူညါတၢ်အိၣ်ဆိးဟံၣ်လၢမူခိၣ်န့ၣ်လီၤ.

ကစၢ်ယွၤအတၢ်အုၣ်ကီၤ, ဒီးတၢ်အုၣ်က့ၤခီၣ်က့ၤလၢ ကစၢ်ယ့ၣ်ရှူးဟ့ၣ်ဝဲတဖၣ်အဃိ လံာ်ဧ့ၤဘြံၤ ၆:၁၈-၂၀ ပာ်ဖျါဝဲအသိး တၢ်မုၢ်လၢ်န့ၣ်, ဟံးဃာ်ပၢၤဃာ်ပှၤ ဖဲလၢပလိၣ်ဘၣ်တၢ်အကတီၢ်န့ၣ်အဃိဒီး တၢ်မုၢ်လၢ်န့ၣ်ကဲထီၣ် ပနီၣ်သက့ၤသ့ဝဲဒၣ်န့ၣ်လီၤ. ဟီၣ်ခိၣ်အံၤလိၣ်ဘၣ်တၢ်မုၢ်လၢ်နီၢ်နီၢ်, အကတီၢ်လၢ အဂ့ၤ, ဒီးအကီအခဲတဖၣ်အဂီၢ်, ကစၢ်ယွၤမ့ၢ်ပှၤလၢကစံၣ်ညီၣ်တဲာ်တၢ်, ဒီးတမၤဟးဂီၤပသးအဃိ အလီၢ်အိၣ်လၢ တၢ်အိၣ်ခိးကွၢ်လၢ် ကစၢ်ယွၤအတၢ်အုၣ်ကီၤအမ့ၢ်အတီၤ, ဒီးလၢအလီၤတံၢ်တမံၤအံၤ န့ၣ်လီၤ. ပမ့ၢ်နာ်သန့ၤပသးလၢယွၤန့ၣ်ဒီး, လၢပဂီၢ်ယွၤကမၤဂ့ၤ, မၤဘၣ်လိာ်ဘၣ်စးက့ၤတၢ်ကိးမံၤ လၢအဆၢကတီၢ်ဒၣ်ဝဲအပူၤန့ၣ်လီၤ.