ပှၤကွၢ်မဲာ်ချံကသံၣ်သရၣ်တဂၤ မၤစၢၤ အဲ(န)ဒရံၣ်ယဲး(Andreas)ဖိ လၢအသးအိၣ်သၢနံၣ်, ကဒိးထီၣ်ဝဲမဲာ်ကး အဆိကတၢၢ်တဘျီအဂီၢ်န့ၣ်လီၤ. ကသံၣ်သရၣ်မုၣ် စံးဘၣ်အီၤလၢ “ကွၢ်ဆူမဲာ်ထံကလၤ တက့ၢ်” န့ၣ်ဒီး, အဝဲ ကွၢ်လီၤအသးလၢမဲာ်ထံကလၤအပူၤဝံၤ ဃၣ်တရံးဆူအပၢ် လၢတၢ်နံၤကမှံ, ပာ်ဖျါထီၣ်အတၢ်သးခု လၢအလီၤအဲၣ်လီၤကွံ န့ၣ်လီၤ. ဝံၤ အပၢ်ထွါကွံာ် အမဲာ်ထံကဖီလီကပုာ်လုာ်ဖိ လၢအဟဲယွၤလီၤလၢ အဘိးပၤလိၤ ဒီးသံကွၢ်အီၤ “ဖိခွါဧၢ, ဘၣ်မနုၤအဃိလဲၣ်.” အဲ(န)ဒရံၣ်ယဲး ဖိးဟုအပၢ်အကိာ်ဒီး စံးဝဲ “ယထံၣ်ဘၣ်နၤလံ” န့ၣ်လီၤ. အဝဲသုးက့ၤအသး ဝံာ်အကိာ်ဒီး ကွၢ်စူၣ်ဝဲ အပၢ်အမဲာ်ချံလိၤလိၤ, ဒီးစံးဝဲ “ယထံၣ်ဘၣ်နၤလံ” န့ၣ်လီၤ.
ကလီး ၁:၁၅ ပာ်ဖျါဝဲ, ဖဲပမၤလိသ့ၣ်ညါနၢ်ပၢၢ်လံာ်စီဆှံ, လၢတၢ်ထုကဖၣ်သပှၢ်ပှၢ်အပူၤန့ၣ်, သးစီဆှံကဟ့ၣ်ပှၤ မဲာ်ချံလၢပကထံၣ်ကစၢ်ယ့ၣ်ရှူး, လၢအမ့ၢ် “ယွၤလၢပှၤထံၣ်အီၤ တသ့ဘၣ်တဂၤ အက့ၢ်အဂီၤ” န့ၣ်လီၤ. ခီဖျိသးစီဆှံအတၢ်မၤစၢၤပှၤအဃိ ပထံၣ်တၢ်မ့ၢ်ဆှဲဝဲဆှံဝဲ, ဒီးခီဖျိလၢကစၢ်ယွၤ အကလုၢ်ကထါအဃိ ပတၢ်သ့ၣ်ညါရ့လိာ်သးဒီးယွၤ ဒိၣ်ထီၣ်အါထီၣ်ကွ့ၢ်ကွ့ၢ်ဘၣ်ဆၣ်, ခဲကနံၣ်အံၤ လၢပတၢ်အိၣ်မူန့ၣ် ကစၢ်ယွၤအစိကမီၤ လၢအဒိၣ်အယိာ်, ဒီးအကတၢၢ်တအိၣ်, လၢအမ့ၢ်တၢ်အထူ အယိာ်န့ၣ် ပထံၣ်သ့ဒံးဒၣ်ထဲ တဖျးမဲာ်ဖိအဂီၢ်န့ၣ်လီၤ. ၁ ကရံၣ် ၁၃:၁၂ ပာ်ဖျါဝဲ ဖဲပတၢ်မၤ လၢဟီၣ်ခိၣ်အံၤမ့ၢ်ဝံၤ မ့တမ့ၢ်ဘၣ်ဒီး ဖဲကစၢ်ယ့ၣ်ရှူးမၤလၢပှဲၤအတၢ်အၢၣ်လီၤ လၢအကဟဲကဒီးဝဲ တဘျီန့ၣ်ဒီး ပကထံၣ်ဘၣ်အီၤ လၢမဲာ်သကိးမဲာ်ဆှဲဆှဲဆှံဆှံန့ၣ်လီၤ.
ဖဲပထံၣ်ဘၣ်ပကစၢ်ယ့ၣ်ရှူးခရံာ် လၢမဲာ်သကိးမဲာ်, ပသ့ၣ်ညါအီၤဒ်အဝဲသ့ၣ်ညါပဝဲတဂၤစူၢ်စူၢ်, တၢ်ရ့လိာ်သးလၢခရံာ်အနီၢ်ခိအပူၤ လၢအမ့ၢ်ခရံာ်တၢ်အိၣ်ဖှိၣ်, လၢအအဲၣ်ဘၣ်ဝဲန့ၣ် ကမ့ၢ်အကတီၢ် လၢအပှဲၤဒီးတၢ်သူၣ်ခုသးခုအဃိ ပတလိၣ်ဘၣ် မဲာ်ဒိးမဲာ်ကးလီၤလီၤဆီဆီလၢၤဘၣ်န့ၣ်လီၤ. သးစီဆှံ ကမၤပှဲၤ တၢ်နာ်, တၢ်မုၢ်လၢ်ဒီး တၢ်အဲၣ်တၢ်ကွံ, လၢပလိၣ်ဘၣ်တဖၣ်န့ၣ်လၢပပူၤ ဒ်သိးပကဆၢထၢၣ် ဂၢၢ်ကျၢၤတုၤလၢပထံၣ်ဘၣ် ကစၢ်ယ့ၣ်ရှူး, ပှၤလၢအုၣ်က့ၤခီၣ်က့ၤပှၤ, လၢပအဲၣ်ဘၣ်ဒီးမူဝဲတဂၤ လၢမဲာ်သကိးမဲာ် ဒီးစံးကတိၤပာ်ဖျါ “ယထံၣ်နၤလံ, ကစၢ်ယ့ၣ်ရှူးဧၢ, ယထံၣ်ဘၣ်နၤလံ” အဂီၢ်န့ၣ်လီၤ.
