နံၣ်ကယၤ ၁၉ အပှၤကွဲးထါ အဲမလံၣ်ဒ့းကစၢၣ် (Emily Dickinson) ကွဲးဝဲ “တၢ်သးအုး ကိးမံၤ ယထံၣ်/ ယထိၣ်တဲာ်ဒီး ဃုကွၢ်ထံ/ မ့ၢ်ဃၢ ဒ်ယတၢ်ဝံဧါ/ မ့တမ့ၢ် ဖှံညီဝဲဧါ”. ထါတယုၢ်အံၤ မ့ၢ်တၢ်လၢ အပာ်ဖျါထီၣ်က့ၤ ပှၤကညီတဖၣ် ဝံစိာ်အတၢ်ဘၣ်ဒိဘၣ်ထံးသ့ၣ်တဖၣ်လၢ အဝဲသ့ၣ်အသးသမူဒီစိၤ ဒ်လဲၣ်အဂ့ၢ်န့ၣ်လီၤ. လၢတၢ်တလီၤတံၢ်လီၤဆဲးကဲာ်ဆိးအပူၤ, ဒ့းကစၢၣ် မၤကတၢၢ်ဝဲအထါလၢ တၢ်မၤမုာ်ထီၣ်က့ၤအသး ထဲတမံၤဧိၤ, လၢအမ့ၢ် “တၢ်ဆဲးဖျိးအတၢ်မၤမုာ်” လၢအထံၣ်န့ၢ်ဝဲ လၢကရၤနံအဒီခိၣ်န့ၣ်လီၤ. အဝဲစံးဝဲဒၣ် အနီၢ်ကစၢ်ဒၣ်ဝဲ အပူၤလီၢ်တဖၣ်န့ၣ် အိၣ်ဖျါထီၣ်ဝဲဒၣ်လၢ ပှၤအုၣ်က့ၤခီၣ်က့ၤကစၢ်အပူၤလီၢ်, ဒီးတၢ်ဒုးဆိကမိၣ်အီၤလၢ ပှၤတနီၤအတၢ်သးအုးတဖၣ်န့ၣ် လီၤဂာ်ဒီးအတၢ်သးအုးန့ၣ်လီၤ.
လံာ်တၢ်လီၣ်ဖျါ ပာ်ဖျါထီၣ် ပှၤအုၣ်က့ၤခီၣ်က့ၤကစၢ် ဒ် “သိဖိ, ဒ်အဘၣ် တၢ်မၤသံအီၤအသိး” န့ၣ်လီၤ (၅:၆, ကွၢ်အဆၢဖိ ၁၂). အတၢ်ပူၤလီၢ်တဖၣ် ဘၣ်တၢ်ထံၣ်အီၤ သ့ဒံးဝဲန့ၣ်လီၤ. အဝဲဒိးတူၢ် တၢ်ပူၤလီၢ်တဖၣ်အံၤ ခီဖျိ တၢ်ဟံးထီၣ်အပှၤဂီၢ်မုၢ်အတၢ်ဒဲးဘးဒီး အတၢ်သးအုးလၢအလိၤ (၁ ပ့းတရူး ၂:၂၄-၂၅), ဒ်သိးအဝဲသ့ၣ် ကမၤန့ၢ် တၢ်မူဒီးတၢ်မုၢ်လၢ်အသီအဂီၢ်လီၤ.
ဒီးလံာ်တၢ်လီၣ်ဖျါ ပာ်ဖျါန့ၢ် မုၢ်နံၤလၢအကဟဲတဖၣ် ဖဲပှၤအုၣ်က့ၤခီၣ်က့ၤ ကစၢ်န့ၣ် က“ထွါကွံာ်အမဲာ်ထံခဲလၢာ်” လၢအဖိကိးဂၤဒဲးအမဲာ်န့ၣ်လီၤ (၂၁:၄). ကစၢ်ယ့ၣ်ရှူး တမၤဆံးလီၤစှၤလီၤ အဝဲသ့ၣ်အတၢ်ဆါဘၣ်, မ့မ့ၢ် ထံၣ်ဝဲဒီး သူၣ်အိၣ်သးအိၣ်ဝဲနီၢ်နီၢ် လၢပှၤတဂၤစုာ်စုာ် အတၢ်သးအုးလီၤဆီန့ၣ်လီၤ. ကစၢ်ကွဲမုာ် အဝဲသ့ၣ်ဆူ အဘီမုၢ်လၢအသီ ဒီးမၤဘျါက့ၤတၢ်, ဖဲ “တၢ်သံတအိၣ်လၢၤဘၣ်, ဒီးတၢ်သူၣ်အုးသးအုး တအိၣ်လၢၤဘၣ်, ဒီးတၢ်ဟီၣ်တၢ်ယၢၤ တအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်” (:၄), ဒီးဖဲန့ၣ်န့ၣ် ထံမၤဘျါက့ၤတၢ် ကယွၤလီၤဝဲဒီး “ပှၤလၢတၢ်သူအသးလၢထံ, ယကဟ့ၣ်လီၤအီၤလၢ ထံမူထီၣ်ပၢၢ်န့ၣ်လီၤ” (:၆, ကွၢ် ၂၂:၂).
