လူဝံး(စ) ဖိ(Louise)မ့ၢ် ပိာ်မုၣ်ဖိသၣ်တဂၤလၢ အပ့ၢ်ဆှါ, လိာ်ကွဲဆူၣ်အဃိ ကယဲၢ် ပှၤလၢအထံၣ်လိာ်သးဒီးအီၤ တဂၤလၢ်လၢ်အဂီၢ် ဟဲစိာ်န့ၢ်ဝဲ တၢ်နံၤကမှံန့ၣ်လီၤ. ဖဲအသးအိၣ်ယဲၢ်နံၣ်န့ၣ် ဒိးန့ၢ်ဝဲတၢ်ဆါလၢအတညီနုာ်မၤအသးတမံၤအဃိ အသးသမူလီၤမၢ်ကွံာ်ဝဲဒၣ်ဒီး ကဲထီၣ်တၢ်လီၤသးအုးလၢ ပှၤအါဂၤအဂီၢ်န့ၣ်လီၤ. လၢတၢ်သတူၢ်ကလာ်အပူၤ အတၢ်လဲၤပူၤကွံာ် ဟီၣ်ခိၣ်အံၤ ကဲထီၣ် တၢ်ဖုးသံပျီၢ်သံလၢ အမိၢ်အပၢ်ခံဂၤလၢအမ့ၢ် ဒ့ဒ့ (Day Day)ဒီး ဖံထၢၣ်(Peter) ဃုာ်ဒီးပဝဲလၢအမၤသကိးတၢ်ဒီး အဝဲသ့ၣ်အဂီၢ်န့ၣ်လီၤ. ပသူၣ်အုးသးအုးဃုာ်ဒီး အဝဲသ့ၣ်န့ၣ်လီၤ.
တၢ်မၤအသးဒ်သိးအံၤ အပူၤဒၣ်လဲာ် ဒ့ဒ့ဒီးဖံထၢၣ် ဃုထံၣ်န့ၢ်ဂံၢ်ဘါလၢ ကလဲၤတၢ်ဆူညါအဂီၢ်န့ၣ်လီၤ. ယသံကွၢ်ဒ့ဒ့လၢ တၢ်မၤအသးဒ်သိးအံၤန့ၣ် မ့ၢ်အဝဲသ့ၣ် လဲၤခီဖျိဝဲ ဒ်လဲၣ်အဂ့ၢ်န့ၣ်ဒီး အဝဲစံးဆၢလၢ “အဝဲသ့ၣ် ဟံးန့ၢ်တၢ်ဂံၢ်တၢ်ဘါ ခီဖျိဆိကမိၣ်ပညိၣ်ဒၣ်ထဲလၢ လူဝံး(စ)ဖိ ကအိၣ်တၢ်အလီၢ်, လၢအမ့ၢ်ကစၢ်ယ့ၣ်ရှူးအတၢ်အဲၣ်အစုပူၤ”န့ၣ်လီၤ. ဒ့ဒ့စံးဝဲဒၣ် “ပဖိမုၣ်ဖိတဂၤအံၤ အဆၢကတီၢ်ဘၣ်ဝဲဒီး လဲၤတုၤဆူ တၢ်မူအထူအယိာ်အဃိ ပသးခုလၢအဂီၢ်န့ၣ်လီၤ. မ့ၢ်လၢယွၤအဘျုးအဖှိၣ်ဒီးအဂံၢ်အဘါအဃိ ပလဲၤခီဖျိန့ၢ်ဘၣ် ပတၢ်သူၣ်အုးသးအုးဒီး တၢ်မၤလၢကစၢ်ယွၤနာ်လီၤန့ၢ်ပှၤတဖၣ် ပကမၤဒံးဆူညါ”န့ၣ်လီၤ.
ဒ့ဒ့ဃုထံၣ်န့ၣ် တၢ်မၤမုာ်ထီၣ်က့ၤအီၤ ခီဖျိလၢ အတၢ်နာ်ကစၢ်ယွၤအသး, လၢအလီၣ်ဖျါထီၣ်အသးလၢ ကစၢ်ယ့ၣ်ရှူးအပူၤန့ၣ်လီၤ. လံာ်စီဆှံအတၢ်ပာ်ဖျါ တၢ်မုၢ်လၢ်စံးတၢ်န့ၣ် ဒိၣ်န့ၢ်ယိာ်န့ၢ် တၢ်ထံၣ်တၢ်လၢ အဂ့ၤတကပၤန့ၣ်လီၤ. တၢ်မုၢ်လၢ်အံၤ အိၣ်သူၣ်လီၤအသး လီၤတံၢ်လီၤဆဲးလၢ ကစၢ်ယွၤအတၢ်အၢၣ်လီၤ, တၢ်အၢၣ်လီၤလၢ ယွၤတမၤဟးဂီၤ နီတဘျီဘၣ်န့ၣ်လီၤ. ၁ သ့း ၄:၄ အပူၤ စီၤပီလူးဟ့ၣ်ဂံၢ်ဟ့ၣ်ဘါဝဲ ပှၤသူၣ်အုးသးအုး တၢ်ခီဖျိလၢ အတံၤသကိးတဖၣ် လဲၤပူၤကွံာ် ဟီၣ်ခိၣ်တဖၣ်အဂီၢ် “ပမ့ၢ်စူၢ်က့ၤနာ်က့ၤလၢ ယ့ၣ်ရှူးသံဝဲ, ဒီးဂဲၤဆၢထၢၣ်က့ၤဝဲ ဒီးပှၤလၢအမံလၢ ယ့ၣ်ရှူးအပူၤတဖၣ်န့ၣ်, ယွၤကဒုးဟဲက့ၤထီၣ်အီၤလၢအသိး ဒ်န့ၣ်အသိးစ့ၢ်ကီးလီၤ”န့ၣ်လီၤ. ဒ်န့ၣ်အသိး လၢပတၢ်သူၣ်အုးသးအုးတဖၣ်အပူၤ ပဟံးဃာ်ဂၢၢ်ကျၢၤတၢ်မ့ၢ်တၢ်တီ လၢအအိၣ်ဒီးအစိအကမီၤ သ့ဝဲန့ၣ်လီၤ. မ်တၢ်မုၢ်လၢ်လီၤတံၢ်လီၤဆဲးတထံၣ်အံၤ လၢပတၢ်သူၣ်အုးသးအုးတၢ်တဖၣ်အပူၤဒၣ်လဲာ် ကဟ့ၣ်ပှၤ တၢ်ဂံၢ်တၢ်ဘါဒီး တၢ်မၤမုာ်ထီၣ်က့ၤပသးလၢ မုၢ်တနံၤအံၤန့ၣ်တက့ၢ်.
