ဖဲယကတဲာ်ကတီၤယသးလၢ ယကဒိးပျံၤမူဖးဖီပျံၤ(Zip Line) လၢအအိၣ်ဖဲ ကီး စ့းလူးစံယၤ (St. Lucia) လၢ ပီၣ်လဲၣ်ခါရ့းဘံၣ်ယၢၣ်(Caribbean) တၢ်ကိၢ်လီၢ်ကဝီၤ တၢ်စူၤသ့ၣ်ၦၢ်အခါ တၢ်ပျံၤတၢ်ဖုးအိၣ်ၦဲၤလၢယသးပူၤန့ၣ်လီၤ. တချုးယစံၣ်လီၤလၢစိၤမိၤခိၣ်အခါ တၢ်သ့ၣ်ညါလၢ တၢ်တဘၣ်လိာ်ဘၣ်စးတဖၣ်ကဲထီၣ်သ့ဝဲန့ၣ် ဟဲပၢၢ်ထီၣ်ဝဲလၢယသးပူၤန့ၣ်လီၤ. ဘၣ်ဆၣ် လၢယကဃာ်ကဒါက့ၤယသးအဂီၢ် ကျဲၤစှၤဝဲဒၣ်အဃိ ယထဲးဂံၢ်ထဲးဘါ ဒီးယပျဲၤလီၤယသးန့ၣ်လီၤ. ယလီၤတဲာ်လၢ သ့ၣ်ၦၢ်အစိးနါ, ဒီးယပလၢၢ်ဘၣ်လၢယလဲၤတၢ်လၢ ကလံၤကျါချ့သဒံး, လဲၤခီဖျိသ့ၣ်ထူၣ်လါဟ့သ့ၣ်တဖၣ် အကဆူး, ကလံၤအူဘၣ် ယခိၣ်သူအဘိတဖၣ်အခါန့ၣ် ယတၢ်ဘၣ်ယိၣ်ဘၣ်ဘီတဖၣ် စှၤလီၤကယီကယီန့ၣ်လီၤ. ဖဲယပျဲလီၤယသးလၢ ကလံၤကျါ ဒီးပျဲဟီၣ်ခိၣ်အတၢ်ထုးဃၢစိာ်ဆှၢယၤအခါ, ယထံၣ်ဘၣ်စိၤမိၤခိၣ် လၢယကဘၣ်လဲၤတုၤဝဲန့ၣ် ဖျါဂ့ၤထီၣ်တစဲးဘၣ်တစဲး ဒီးလၢတၢ်အိၣ်ပတုာ်ကဖီလီအပူၤ ယသ့ၣ်ညါလၢ ယလဲၤတုၤဂ့ၤဂ့ၤဘၣ်ဘၣ်န့ၣ်လီၤ.

ဆၢကတီၢ်လၢယအိၣ်လၢ မူဖးဖီပျံၤအဖီခိၣ်န့ၣ် ဒုးထံၣ်မှံယၤ တၢ်ဆၢကတီၢ်လၢကစၢ်ယွၤ မၢပမၤတၢ်မၤႇ တၢ်ဂုာ်ကျဲးစၢးအသီလၢအတၤၦၤန့ၣ်လီၤ. ယွၤအကလုၢ်ကထါသိၣ်လိၦၤ ဒ်သိးပကနာ်ယွၤဒီး ဖဲ ကတိၤ ၃:၅ စံးဘၣ်ပှၤလၢ “ပသုတသန့ၤပသးလၢ ပတၢ်ကူၣ် တၢ်ဆးဒၣ်ဝဲတဂ့ၤ”, ဖဲလၢ ပသးဒ့ဒီဒီး ပတသ့ၣ်ညါ တၢ်လီၤတံၢ်လီၤဆဲးအခါန့ၣ်လီၤ. ဖဲပသးပူၤၦဲၤဒီး တၢ်ပျံၤဒီးတၢ်သးဒ့ဒီန့ၣ် ပကျဲတဖၣ် တဘျၢဝဲ ဒီးတဖျါဆှံဆှံဘၣ်. ဘၣ်ဆၣ်ဖဲပဆၢတဲာ်လီၤပသးလၢ ပကထွဲထီၣ်ပခီၣ်ခါ လၢတၢ်နာ် ခီဖျိတၢ်အးလီၤ ပကျဲဆူယွၤအအိၣ်အခါ, ကတိၤ ၃:၆ စံးဘၣ်ပှၤလၢ “အဝဲဒၣ် ကမၤလိၤပကျဲလီၤ”. ပတၢ်နာ်န့ၢ်လီၤသးကအါထီၣ် လၢပကစံၣ်ခီတၢ်လၢ တၢ်နာ်အပူၤအဂီၢ် မ့ၢ်တၢ်မၤလိန့ၢ်ယွၤအတၢ်မ့ၢ်တၢ် ဖဲလၢပထုကဖၣ်ဒီး ဖးယွၤအကလုၢ်ကထါသ့ၣ်တဖၣ်န့ၣ်လီၤ.

ပထံၣ်န့ၢ် တၢ်သဘျ့, တၢ်ထူၣ်ဖျဲးဒီးတၢ်အမုာ် လၢသးသမူတၢ်တၤသ့ၣ်တဖၣ်အကျါ သ့ဝဲလၢ လၢပသန့ၤသးလၢယွၤ ဒီးပျဲအဝဲဆှၢၦၤ ခီဖျီသးသမူအတၢ်ဆီတလဲသ့ၣ်တဖၣ်အပူၤန့ၣ်လီၤ.