ပှၤကူၣ်ဘၣ်ကူၣ်သ့ ကဲနၢး အံ. ဘ့လ့ၣ် (Kenneth E. Bailey) ကတိၤပာ်ဖျါထီၣ် အၤဖြံၤကၤထံကီၢ်ခိၣ်နၢ်တဂၤလၢ အမၤလိန့ၢ်ဝဲ တၢ်ကဘၣ်ဟံးဃၥ်ပၢၤဃာ်, တၢ်အိၣ်အသးက့ၢ်ဂီၤ လီၤဆီတမံၤမံၤ လၢဟီၣ်ခိၣ်ဒီဘ့ၣ် ထံကီၢ်တဖၣ် အတၢ်ရ့လိာ်ဘၣ်ထွဲလိာ်သး အတဝၢပူၤ အဂီၢ်န့ၣ်လီၤ. အဝဲဒုးအိၣ်ထီၣ်တၢ်ရ့လိာ်ဘၣ်ထွဲလိာ်သး အဂ့ၤအဝါဒီး ကီၢ်အံၣ်စရ့လး ဃုာ်ဒီးထံကီၢ်တဖၣ်လၢ အိၣ်ကဝီၤဃာ် ကီၢ်အံၣ်စရ့လးန့ၣ်လီၤ. ဖဲပှၤတဂၤသံကွၢ်အီၤလၢ မ့ၢ်အထံကီၢ်ဂၢၤဃာ် တၢ်ရ့လိာ်ဘၣ်ထွဲလိာ်သးဒီး ထံကီၢ်တဖၣ်အံၤ လၢအဘၣ်ဒိဘၣ်ထံးဟးဂီၤညီန့ၣ် မ့ၢ်မၤဝဲ ဒ်လဲၣ်န့ၣ် ဒီးစံးဆၢဝဲ “ပဃုထၢ ပတံၤသကိးတဖၣ်န့ၣ်လီၤ. ပတဟ့ၣ်ဂံၢ်ဟ့ၣ်ဘါ ပတံၤသကိးတဖၣ် လၢကဃုထၢ ပဒုၣ်ပဒါလၢ ပဂီၢ်န့ၣ်ဘၣ်”လီၤ.

တၢ်အံၤ မ့ၢ်တၢ်ကူၣ်လၢအဂ့ၤ ဒီးကဲဘျုးဝဲနီၢ်နီၢ်န့ၣ်လီၤ. တၢ်လၢအၤဖြံၤကၤ ထံကီၢ်တဘ့ၣ်အံၤ ဒုးနဲၣ်ဒိလီၤဝဲလၢ ထံကီၢ်တဖၣ်လၢ ဟီၣ်ခိၣ်ဒီဘ့ၣ် အပတီၢ်န့ၣ် မ့ၢ်တၢ်လၢ စီၤပီလူး ဟ့ၣ်ဂံၢ်ဟ့ၣ်ဘါဝဲ အပှၤဖးလံာ်ဖိတဖၣ် ဒ်သိးကမၤဝဲ အိၣ်မူဝဲလၢ အနီၢ်ကစၢ်နီၢ်တဂၤ အပတီၢ်အဂီၢ်န့ၣ်လီၤ. အတၢ်ကွဲးဖးထီအံၤအပူၤ လၢပာ်ဖျါထီၣ် ခီဖျိလၢ ကစၢ်ယ့ၣ်ရှူးခရံာ် အဃိ တၢ်အိၣ်မူလဲလိာ်သးတထံၣ်အံၤ အက့ၢ်အဂီၤ သကဲာ်ပဝးတဖၣ်အကျါ ရိမ့ၤ ၁၂:၁၈ အပူၤ စီၤပီလူးကွဲးဝဲ “ဖဲသုသ့န့ၣ် မ့ၢ်သ့ဒီး အိၣ်ဃူလိာ်ဖိးလိာ်သုသး ဒီးပှၤကိးဂၤဒဲးတက့ၢ်”န့ၣ်လီၤ. အဆၢဖိ ၂၀-၂၁ အပူၤ ပာ်ဖျါအါထီၣ်ဆူညါ ဒ်အမ့ၢ်လၢ ပတၢ်ရ့လိာ်ဘၣ်ထွဲလိာ်သးဒီး ပဒူၣ်ပဒါတဖၣ်န့ၣ် ပာ်ဖျါထီၣ် ပတၢ်စူၢ်တၢ်နာ်ကစၢ်ယွၤ ဃုာ်ဒီးအတၢ်ကဟုကယာ် တၢ်လၢဒိၣ်ဝဲတုာ်ဝဲဒၣ်တၢ်န့ၣ် မ့ၢ်တၢ်ဟံၣ်ပလီၢ်ပှၤဒီး ပတၢ်ရ့လိာ်ဘၣ်ထွဲလိာ်သးဒီး ပှၤဂုၤပှၤဂၤန့ၣ် မ့ၢ်တၢ်အကါဒိၣ်စ့ၢ်ကီးလီၤန့ၣ် ပာ်ဖျါဝဲလီၤလီၤဆီဆီန့ၣ်လီၤ.

တၢ်အိၣ်ဃူအိၣ်ဖိးလိာ်သးဒီး ပှၤကိးဂၤဒဲးန့ၣ် တမ့ၢ်တၢ်လၢ မၤအသးကသ့ထီဘိ တပယူာ်ဃီဘၣ်. (စီၤပီလူးအကစၢ်ဒၣ်လဲၣ်စံးဝဲ “မ့ၢ်သ့န့ၣ်”န့ၣ်လီၤ). ဘၣ်ဆၣ် ယၤ ၃:၁၇-၁၈ ပာ်ဖျါဝဲ ဒ်ပမ့ၢ်ပှၤစူၢ်က့ၤနာ်က့ၤကစၢ်ယ့ၣ်ရှူးန့ၣ်ဒီး ပအိၣ်ဒီး မူဒါလၢ ပကပျဲယွၤ အတၢ်ကူၣ်သ့ ဒုးနဲၣ်ဆှၢ ပတၢ်အိၣ်မူအိၣ်ဂဲၤဒီး ဒ်လၢ မး ၅:၉ စံးဘၣ်ပှၤအသိး ပကရ့လိာ်ဘၣ်ထွဲလိာ်သးဒီး ပှၤလၢ ပခိၣ်ပဃၢၤတဖၣ် ဒ်ပှၤမၤဃူမၤဖိး တၢ်အသိးအဂီၢ်န့ၣ်လီၤ. ကျဲအကျိၤအကွၢ်ဂ့ၤဒိၣ်န့ၢ် တၢ်အံၤ လၢပကမၤလၤကပီၤ “တၢ်ဃူတၢ်ဖိးအကစၢ်” ဘၣ်ကအိၣ်ဝဲဒၣ်ဒ်ဧါ.