အါန့ၢ် အနံၣ် ၆၀ အတီၢ်ပူၤ, ပှၤကွဲးတၢ်ကစီၣ်လၢ ကၠၣ်နဲၣ်အပူၤ လၢအမ့ၢ် ပီ(လ) ဟၣ်ဘ့ (Paul Harvey)န့ၣ် မ့ၢ်ၦၤကတိၤတၢ်လၢ အမဲရကၣ်အကွဲၤလ့လိၤတဂၤန့ၣ်လီၤ. ဒ်သိးကထုးန့ၢ် ပှၤဒိကနၣ်တၢ်ဖိ အသူၣ်အသးအဂီၢ် အဝဲစံးကတိၤဝဲသ့သ့ဘၣ်ဘၣ်, “တၢ်ကစီၣ်မနုၤလဲၣ်န့ၣ် သုသ့ၣ်ညါဘၣ်လံ… လၢတမံးနံးအတီၢ်ပူၤန့ၣ် နကနၢ်ဟူဘၣ် တၢ်ဂ့ၢ်လၢအအိၣ်လီၤတဲာ်တဖၣ်လီၤ”. တၢ်ဘိးဘၣ်သ့ၣ်ညါ ဖုၣ်ကိာ်ဝံၤအလီၤခံႇ အဝဲတဲဝဲ ပှၤမံၤဟူသၣ်ဖျါတဂၤ အတၢ်ဂ့ၢ်လၢ ၦၤတသ့ၣ်ညါတဖၣ် န့ၣ်လီၤ. ဘၣ်ဆၣ် အဝဲဟံးဃာ် ပှၤတဂၤအံၤအမံၤဒီး အဂ့ၢ်လၢ အကါဒိၣ်တဖၣ် တုၤအကတၢၢ်ဒီး မၤသးဖှံ ပှၤဒိကနၣ်တၢ်ဖိတဖၣ်လၢ အတၢ်ကတိၤလၢအညီနုာ်စံးဝဲ, “အခဲအံၤ နသ့ၣ်ညါ တၢ်ဂ့ၢ်လၢ အိၣ်လီၤတဲာ်တဖၣ်လံၤ န့ၣ်လီၤ”.

တၢ်မၢဖိ စီၤယိၤဟၣ် အတၢ်ထံၣ်လၢအပူၤကွံာ် ဒီးခါဆူညါ အိးထီၣ်အသးဒ် တၢ်အၢၣ်လီၤဒ်သိးအံၤ န့ၣ်လီၤ. ဘၣ်ဆၣ်, အဝဲအတၢ်ဂ့ၢ်အံၤ စးထီၣ်လၢ တၢ်လီၤသးအုးန့ၣ်လီၤ. တၢ်ကမၤအသးခါဆူညါအဂီၢ် ပှၤလၢကတဲဖျါတၢ်န့ၣ် ကယဲၢ်တၢ်ဘၣ်တ့လၢ မူခိၣ်မ့ၢ်ဂ့ၤ ဟီၣ်ခိၣ်မ့ၢ်ဂ့ၤ တအိၣ်ဘၣ်နီတဂၤအဃိ ဖဲအဝဲထံၣ်သ့ၣ်ညါဘၣ်ဝဲန့ၣ်ဒီး ဟီၣ်ဝဲတကတၢၢ်လၢၤဘၣ်န့ၣ်လီၤ(လီၣ်ဖျါ ၄:၁, ၅:၁-၄). ဝံၤအလီၤခံ, အဝဲနၢ်ဟူ တၢ်ကလုၢ်လၢအဟ့ၣ်ထီၣ်တၢ်မုၢ်လၢ်လၢ “ခ့ယုၢ်ဘၣ်ဃးဒီးယူဒၤအဒူၣ်” အပူၤန့ၣ်လီၤ (:၅). ဘၣ်ဆၣ် ဖဲစီၤယိၤဟၣ်ကွၢ်ဝဲအခါ, ခ့ယုၢ်လၢမၤနၢၤတၢ်အလီၢ်န့ၣ် အဝဲထံၣ် သိဖိ ဒ်အဘၣ်တၢ်မၤသံအီၤန့ၣ်လီၤ(:၅-၆). တၢ်ထံၣ်လၢ မၤအသးတသ့တခါအံၤ ဟဲဖျိးထီၣ် ဒ်လၢလပီအသိး လၢယွၤအလီၢ်ပစိာ် အိၣ်ဝးတရံးတၢ်အလီၢ်န့ၣ်လီၤ. ပှၤသူၣ်က့သးပှၢ်ခံဆံလွံၢ်ဂၤ ဒီးမူခိၣ်ကလူးလၢပဂံၢ်တန့ၢ်တဖၣ်ဃုာ်ဒီး ဟီၣ်ခိၣ်ဖိ, မူခိၣ်ဖိခဲလၢာ် ပာ်ဖှိၣ်ထီၣ်အသး ဒီးသးဝံၣ်စံးထီၣ်ပတြၢၤ မၤလၤကပီၤယွၤန့ၣ်လီၤ(:၈-၁၄).

တၢ်အုၣ်က့ၤခီၣ်က့ၤကစၢ်လၢ ဘၣ်တၢ်မၤသံအီၤတဂၤန့ၣ် ကမ့ၢ်ဝဲ တၢ်မုၢ်လၢ်လၢ တၢ်ဘၣ်တ့ခဲလၢာ်အဂီၢ်, ကစၢ်ယွၤအလၤကပီၤ ဒီးပတၢ်ဂ့ၢ်လၢ အအိၣ်လီၤတဲာ်တဖၣ်အဂီၢ်န့ၣ် မ့ၢ်မတၤတဂၤ ကဆိကမိၣ်ဝဲဒၣ်လဲၣ်.