ဒီးကထၢၣ်ရ့ဘၢးခၣ်လံခရဲၣ်(မ)ပလၣ် (Dr. Rebecca Lee Crumpler) မ့ၢ် ပှၤအၤဖြံၤကၤ-အမဲရကၤမုၣ် (African American woman) အဆိကတၢၢ်တဂၤ လၢအမၤလိန့ၢ် ကသံၣ်သရၣ်အဒံၢ်ကရံၣ် (degree) န့ၣ်လီၤ. ဘၣ်ဆၣ်ဒီး လၢအတၢ်အိၣ်မူဒီတကတီၢ်ညါအပူၤ (၁၈၃၁-၉၅), အဝဲသ့ၣ်နီၣ်က့ၤဝဲလၢအဘၣ်“တၢ်တကနၣ်ဃုာ်အီၤ, တၢ်တဲဆါ, တဲဟးဂီၤအီၤ, ဒီးတၢ်တပာ်ဒိၣ်ပာ်ကဲအီၤ”န့ၣ်လီၤ. နာ်သက့ အဝဲဟ့ၣ်လီၤအသးလၢာ်လၢာ်ဆ့ဆ့ထီဘိ ဆူတၢ်ကူစါယါဘျါက့ၤတၢ် ဒီးမၤဝံၤမၤလၢထီၣ်ပှဲၤထီၣ် အတၢ်တိာ်န့ၣ်လီၤ. ခရဲၣ်(မ)ပလၣ် စံးသပှၢ်ပှၢ်လၢ ပှၤတနီၤ ဘၣ်သ့ၣ်သ့ၣ် ကဃုထၢစံၣ်ညီၣ်အီၤ လၢအပှၤကလုာ်ဒီး အတၢ်မ့ၢ်ပိာ်မုၣ်တဂၤအဖီခိၣ်ဘၣ်. ဘၣ်ဆၣ်, ထီဘိအဝဲအိၣ်ဒီး တၢ်ကတဲာ်ကတီၤ မၤသီထီၣ်သး ဒီးတၢ်သူၣ်ဒူသးဒူ ဒ်သိးကလဲၤဝဲ ကိးဆၢကတီၢ် ဆူတၢ်လီၢ်ကိးပူၤဒဲး ဒ်မူဒါလီၤဘၣ်အီၤအသိး ဒီးမၤတ့ၢ်ဝဲဒၣ်န့ၣ်လီၤ. အဝဲနာ်ဝဲလၢ တၢ်ကူစါပိာ်မုၣ်ပိာ်မၢၤ ဒီးဖိဒံဖိသၣ်တဖၣ် ဒီးတၢ်အံးထွဲကွၢ်ထွဲ ကုၢ်လၢအဘၣ်တၢ်ပျၢ်လီၤလံအီၤတဖၣ် အတၢ်အိၣ်ဆူၣ်အိၣ်ချ့န့ၣ် မ့ၢ်တၢ်မၤယွၤအတၢ်လၢကျဲတဘိန့ၣ်လီၤ. တၢ်လၢလီၤသးအုးဒိၣ်မးန့ၣ် မ့ၢ်လၢတဒိးန့ၢ်ဘၣ် တၢ်ပတြၢၤမၤလၤကပီၤအီၤ တၢ်မၤလၢ အမၤဝဲတဖၣ်အဂီၢ် တုၤလီၤလၢနံၣ်တကယၤဃၣ်ဃၣ် လဲၤပူၤကွံာ်ဝံၤအလီၢ်ခံန့ၣ်ဘၣ်.

ဆၢကတီၢ်တဖၣ်အိၣ်ဝဲ ဖဲပှၤလၢအအိၣ်ဝးတရံးပှၤတဖၣ် လဲၤကပာ်ပှၤ, တပာ်လုၢ်ပာ်ပှ့ၤပှၤ, မ့တမ့ၢ် တစံးဘျုးစံးဖှိၣ်ပှၤဘၣ်န့ၣ်လီၤ. နာ်သက့ လံာ်စီဆှံအတၢ်ကူၣ်သ့ ဒုးသ့ၣ်နီၣ်ပှၤလၢ ဖဲယွၤကိးပှၤဆူ တၢ်ဖံးတၢ်မၤတမံၤန့ၣ်, ပတကြၢးကွၢ်ဒၣ်ထဲလၢ ပကမၤန့ၢ် ဟီၣ်ခိၣ် အတၢ်ဘၣ်သူၣ်ဘၣ်သး ဒီးအတၢ်ပာ်ပနီၣ်ပှၤဧိၤဘၣ်. လၢအလီၢ်န့ၣ်, ဒ်ကလီး ၃:၂၃ ပာ်ဖျါဝဲအသိး ပကဘၣ် “မၤလၢသူၣ်ကံၢ်သးလဲ, ဒ်လၢကစၢ်အသိး”န့ၣ်လီၤ. ဖဲပသးစၢၢ်ဆၢဒၣ်လၢ တၢ်မၤယွၤအတၢ်အလိၤန့ၣ်, ပမၤကဲထီၣ်လိၣ်ထီၣ် တၢ်မၤအကီကတၢၢ်တဖၣ် ဒၣ်လဲာ်သ့ဝဲ, အိၣ်ဒီးတၢ်သူၣ်ဆူၣ်သးဂဲၤဒီးတၢ်သးခု လၢယွၤအစိကမီၤ ဒီးအတၢ်ဆှၢအပူၤန့ၣ်လီၤ. အဆၢဖိ ၂၄ န့ၣ် ပာ်ဖျါဝဲ, ပတကိၢ်ဂီၤဘၣ်ဝဲလၢ ပကဒိးန့ၢ် ဟီၣ်ခိၣ်အတၢ်ပာ်ပနီၣ်ပှၤဘၣ်, ဒီးပသးကဆူၣ်အါထီၣ်လၢ ပကမၤန့ၢ်ခိၣ်ဖး လၢကစၢ်ယွၤတဂၤဧိၤ ဟ့ၣ်ဝဲသ့န့ၣ်လီၤ.