တနံၣ်အဂီၢ် နံၤသဘျ့တဖၣ် ဘူးထီၣ်ကဟဲတုၤအခါ ပှၤပှ့ၤတၢ်ဖိတၢ်လံၤလၢဆဲးကျိးန့ၢ်တီၤ အီၣ်လဲ(online) ဘၣ်ကွၢ်ဆၢၣ်မဲာ်တၢ်ကီတၢ်ခဲလၢအမ့ၢ် တၢ်ဖိတၢ်လံၤလၢအဝဲသ့ၣ်ပှ့ၤဝဲတဖၣ် တဟဲတုၤဝဲဘၣ်ဆၢဘၣ်ကတီၤ ခီဖျိ တၢ်ဂ့ၢ်ကီလၢ တၢ်ဆှၢထီၣ်ဆှၢလီၤ တၢ်အကျိၤအကွာ်တဖၣ်အဃိန့ၣ်လီၤ. ယသ့ၣ်နီၣ်ထီၣ်က့ၤ တၢ်ဆၢကတီၢ်လၢပဟံၣ်ဖိဃီဖိတဖၣ် သးအိၣ်ပှ့ၤသ့ၣ်အမုၢ်ဖိ လၢပှၤဆါတၢ် တၢ်သူၣ်ထီၣ်ဖၠါဖးဒိၣ်အပူၤန့ၣ်လီၤ. ပသ့ၣ်ညါပာ်လၢ တၢ်ဆှၢထီၣ်ဆှၢလီၤ တၢ်ဖိတၢ်လံၤကျဲအကျိၤအကွာ်တဖၣ်န့ၣ် မ့ၢ်ကချ့ဧါ, ကစဲၤခံဧါန့ၣ် ပတဲလီၤတံၢ်တသ့အဃိန့ၣ်လီၤ. ဘၣ်ဆၣ် ဖဲယမိၢ်ပှ့ၤဝဲ တၢ်လၢ ဆဲးကျိးန့ၢ်တီၤအီၣ်လဲ ဃုာ်ဒီး တၢ်ကဟဲဆှၢတၢ်လၢအချ့န့ၣ်အဂီၢ်အခါ ပတၢ်ဆၢမုၢ်လၢ်တၢ်တဖၣ် ဆီတလဲကွံာ်အသးန့ၣ်လီၤ. ပဘၣ်တၢ်အၢၣ်လီၤပှၤ လီၤတံၢ်လီၤဆဲးလၢ တၢ်ဖိတၢ်လံၤကဟဲတုၤဝဲခံသီအတီၢ်ပူၤ ဒီးပဆိကမိၣ် လၢဟဲကတုၤဝဲချ့ချ့ ဘၣ်ဆၣ်ကဲထီၣ်တၢ်သးတံာ်တာ်လၢ ပဂီၢ်မ့ၢ်လၢပပှ့ၤ တၢ်တဖၣ် တဟဲတုၤဘၣ်ဆၢဘၣ်ကတီၢ်အဃိန့ၣ်လီၤ.

ခ့ခါအဆၢကတီၢ် ညီနုၢ် ပဘၣ်အိၣ်ဆိးဝဲဒၣ်လၢ တၢ်မၤန့ၢ်တၢ်တမံၤမံၤလၢအဆိအချ့ ဒီးတဘျီဃီန့ၣ်လီၤ. တၢ်ဝံသးစူၤအိၣ်ခိးတၢ်န့ၣ် ကဲထီၣ်တၢ်ကီတၢ်ခဲလၢပဂီၢ်န့ၣ်လီၤ. ဘၣ်ဆၣ် ပမ့ၢ်ကွၢ်လၢနီၢ်သးတကပၤန့ၣ်ဒီး တၢ်သူၣ်စူၤသးစူၤန့ၣ် မ့ၢ်တၢ်ဟ့ၣ်ခိၣ်ဖး လၢပဂီၢ်န့ၣ်လီၤ. ဖဲလံာ်သးသယုၢ်တၢ်ဘၣ်တၢ်ကွဲးအီၤအဆၢကတီၢ် ယွၤအပှၤဂီၢ်မုၢ်တဖၣ် သူၣ်အုးသးအုးဝဲဒၣ်လၢဝ့ၢ်ယရူၤရှလ့ၣ် ဘၣ်တၢ်မၤဟးဂီၤအီၤလၢ ပှၤဘၤဘူၤလိၣ်ဖိတဖၣ် ဒီးဘၣ်ကွၢ်ဆၢၣ်မဲာ်ဝဲ တၢ်တၤတၢ်တမံၤဘၣ်တမံၤန့ၣ်လီၤ. ဘၣ်ဆၣ်ဖဲတၢ်သဘံၣ်ဘုၣ်အိၣ်ပှဲၤအပူၤဒၣ်လဲၣ်န့ၣ် ပှၤကွဲးထါမၤဂၢၢ်မၤကျၢၤတၢ်ဒူဒူ လၢအတၢ်နာ်န့ၢ်လီၤတၢ်ဘၣ်ဃးဒီး ယွၤကမၤလၢပှဲၤ အတၢ်လိၣ်သ့ၣ်တဖၣ်အဃိန့ၣ်လီၤ.

သးသယုၢ်တၢ် ၃:၂၄ ပာ်ဖျါဝဲ “ယမုၢ်လၢ်တၢ်လၢအီၤ”န့ၣ်လီၤ. ယွၤသ့ၣ်ညါဝဲဒၣ် လၢပတၢ်ထုကဖၣ်တၢ်တဖၣ် မ့ၢ်တဘၣ် တၢ်စံးဆၢအီၤလၢယွၤ ဒီးပမ့ၢ်တဒိးန့ၢ်ဘၣ်ဆၢဘၣ်ကတီၢ်န့ၣ်ဒီး ကဲထီၣ်တၢ်သူၣ်ကိၢ်သးဂီၤလၢပဂီၢ်န့ၣ်လီၤ. ယွၤကလုၢ်ကထါဟ့ၣ်ဂံၢ်ဟ့ၣ်ဘါပှၤဒီး ဒုးသ့ၣ်ညါက့ၤပှၤလၢ ပကဘၣ်အိၣ်ခိးကွၢ်လၢ်, မုၢ်လၢ်တၢ်လၢယွၤန့ၣ်လီၤ. တၢ်သးဘၣ်ယိၣ်, တၢ်သးအ့န့အလီၢ် တကြၢးအိၣ်ဝဲလၢပပူၤဘၣ်. အဂ့ၢ်ဒ်အံၤ အဆၢဖိ ၂၂ ပာ်ဖျါဝဲ “မ့ၢ်အသးတတူာ်ဘၣ်သတးဒီး ပတတုၤဘၣ်လၢ တၢ်ဟးဂုာ်ဟးဂီၤဘၣ်” န့ၣ်လီၤ. ယွၤအတၢ်မၤစၢၤန့ၣ် စံး ၃၇:၇ ပာ်ဖျါဝဲ “အိၣ်ဘှီၣ်ကလာ်လၢယွၤအပူၤ, ဒီးကွၢ်လၢ်အကျဲတက့ၢ်”န့ၣ်လီၤ. မ်ပကခိးကွၢ်လၢ်, မုၢ်လၢ်တၢ်လၢယွၤ, ဖဲပဘၣ်ကိၢ်ဂီၤ, ဘၣ်ယိၣ်တၢ်လၢ ပတၢ်မိၢ်န့ၢ်သးလီတၢ်တဖၣ်, ပတၢ်ထုကဖၣ်လၢတဘၣ်တၢ်စံးဆၢအခါဒၣ်လဲာ် ပကနာ် ယွၤအတၢ်အဲၣ်အတၢ်တီတၢ်လိၤန့ၣ်တက့ၢ်.