တၢ်တမံၤမံၤ အီၣ်ယဖီဖိတဖၣ်န့ၣ်လီၤ. ဖဲအပူၤကွံာ်အနံၤအခါ, ဖီတဖၣ် ကတြီဂ့ၤမး ယူာ်ထီၣ် အခိၣ်ဆူထးလီၤ. ခဲအံၤ, အဝဲသ့ၣ်ကဲထီၣ်ဖီအမုၢ်လၢအခိၣ်တအိၣ်လံလီၤ. ယစီၤဟးတရံးကွၢ် ယကရၢၢ်ဟီၣ်ခိၣ်ကဝီၤကနူၤချၢ ဒီးထံၣ်တၢ်အပူၤလၢ အတြီၢ်ပဒဲတဒုလၢ ယသ့ၣ်ဘၣ်ကရၢၢ်လိၤလီၤ. ပဒဲဖိတဖၣ် လီၤအဲၣ်ဒိၣ်မး, ဘၣ်ဆၣ် မ့ၢ်ဆၣ်ဖိကီၢ်ဖိလၢ အမၤကီမၤခဲတၢ်တဖၣ် ဒီးဟးဂီၤဖီတဖၣ်ဒီကရၢၢ်လၢမံးနံးအတီၢ်ပူၤလီၤ.

ယဆိကမိၣ်ထံကွၢ်, မ့ၢ်ပှၤဟုၣ်နုာ်လီၤတၢ်လၢ အမၤဟးဂီၤကွံာ် ယွၤအက့ၢ်ဂီၤလၢ ဘိၣ်ထီၣ်ဖးထီၣ်လၢ ယတၢ်အိၣ်မူပူၤ ကအိၣ်ဧါ. ကတိၤဒိ ၂၅:၂၈ စံးဝဲ “ပှၤလၢ အတပၢဘၣ်အသးဒၣ်ဝဲန့ၣ်, မၤသးဒ်ဝ့ၢ်လၢအလီၤပှီၢ်ဝဲ, အခိၣ်ဒူတအိၣ်ဘၣ်အသိးန့ၣ်လီၤ”. လၢပျၢၤမုၢ်နံၤမုၢ်သီအခါ, ဝ့ၢ်အတၢ်ဒူၣ်န့ၣ် ဒီသဒၢန့ၢ်တၢ်လၢ ဒုၣ်ဒါအတၢ်ဟဲဂုာ်နုာ်ဆူၣ်တၢ်အဂီၢ်လီၤ. တၢ်အပူၤဆံးကိာ်ဖိလၢ တၢ်ဒူၣ်လိၤဒၣ်လဲာ်, အခီပညီထီၣ်လၢ ဝ့ၢ်ဒီဝ့ၢ်အိၣ်အိးထီၣ်ပာ်သး လၢတၢ်ကဟဲဒုးအီၤအဂီၢ်လီၤ.

လံာ်တၢ်ကတိၤဒိအါမးအဂ့ၢ်န့ၣ် မ့ၢ်တၢ်ပၢၤပသးလီၤ “နထံၣ်န့ၢ်ကနဲစီစ့ၢ်ကီးဧါ. အီၣ်ဖဲအကြၢးတက့ၢ်” ပှၤကူၣ်တၢ်သ့ကွဲးဝဲ ဒ်န့ၣ်လီၤ(၂၅:၁၆). တၢ်ကီၤသူၣ်ပၢၤသးမ့ၢ် သးအတၤသၣ်တဖျၢၣ်လၢ အအိၣ်ခိးပၢၤဃာ်ပှၤ, လၢအဒီဒၣ်န့ၢ် ပှၤလၢ မ်ပသုတသးစူၤတဂ့ၤ, တၢ်အိၣ်မူအတၢ်ခၣ်, တၢ်သးကွံတၢ်ဒီး တၢ်ဖိဃၢ်လၢ အမၤဟးဂီၤတၢ်အဂုၤအဂၤတဖၣ်, လၢအဆွံနုာ်ဆူၣ်အသးဒီး မၤဟးဂီၤကစၢ်ယွၤအတၢ်ဂၢ်ဖှိၣ် လၢပတၢ်အိၣ်မူပူၤလီၤ (ကွၢ် ကလၤတံ ၅:၂၂-၂၃). တၢ်ကီၤသူၣ်ပၢၤလီၤက့ၤပသးအံၤ မ့ၢ်တၢ်ပာ်သူၣ်ပာ်သးလၢ အိၣ်ဆူၣ်အိၣ်ချ့, လၢအအိၣ်ခိးကွၢ်တၢ်အပူၤလၢပတၢ်အိၣ်မူအတၢ်ဒူၣ်လိၤတဖၣ် ဒီးမၤဘၢတၢ်ပူၤဟိလီၤ.

ဖဲယဃုကွၢ် ယတၢ်အိၣ်မူအကနူၤချၢန့ၣ်, ယထံၣ်တၢ်ပူၤဟိလၢ တၢ်ဒီတဒၢ တအိၣ်တဖၣ်လီၤ. တၢ်လီၢ်ကဝီၤတတီၤ ဖဲယဃၣ်ကွံာ်လၢ တၢ်လ့ပစီ တဘျီဝံၤတဘျီ မ့ၢ်တၢ်တအိၣ်ဒီးတၢ်ဝံသးစူၤအလီၢ်ကဝီၤလီၤ. အိ, မ့ၢ်လိၣ်ဘၣ်တၢ်ပာ်သးလၢအအိၣ်ဆူၣ်အိၣ်ချ့, တၢ်ကီၤသူၣ်ပၢၤသး အိၣ်ဟဲလၢယွၤ ဒ်သိး ကခိးကွၢ်ဒီး တြီန့ၢ်ယၤလၢ တၢ်ဟုၣ်ဟဲနုာ်ဆူၣ်တဖၣ်ဒ်လဲၣ်.