နွဲၣ်တခူဒံၣ်ဆဲးသိအဘိၣ်ဖိန့ၣ်ဆံးဆံးဖိဧိၤလီၤ. ဘၣ်ဆၣ် တၢ်ဘိၣ်ဖိအံၤ သိၣ်လိ ၦၤအမဲရကၤမုၣ်ၦၤစိၥ်တၢ်သးခုကစီၣ်တဂၤလၢ အလဲၤမၤတၢ်လၢ ကီၢ်ဒိၣ်မံၣ်နံၣ်ကၢၣ် ရံၣ်ဘၢးပလ့း (Dominican Republic) တၢ်မၤလိဖးဒိၣ်တမံၤန့ၣ်လီၤ. ဘၣ်တဟါ ဖဲအဝဲလဲၤတုၤဆူ တၢ်အိၣ်ဖှိၣ်အတၢ်ရ့လိာ်မုာ်လိာ်, ဒီးအိးထီၣ်အနွဲၣ်တခူဒံၣ်ဆဲးသိအဘိၣ်ဖိအခါ, ၦၤပိၥ်မုၣ်တဂၤလၢ အဝဲတသ့ၣ်ညါကဲၣ်ဆိးဘၣ်တဂၤ ယူာ်ဃီၤဒီးဟံးန့ၢ်အီၣ်ဝဲတနီၤလၢတၢ်ဘိၣ်ပူၤန့ၣ်လီၤ. ၦၤအဂၤတဖၣ်စ့ၢ်ကီး ဟဲဟံးန့ၢ်အီၣ်ဝဲလီၤ.

“ရၢၢ် စၢၢ်နးလဲၣ်” ၦၤစိၥ်တၢ်သးခုကစီၣ်တဂၤအံၤ ဆိကမိၣ်ဝဲလီၤ. ဖဲန့ၣ်, အဝဲ မၤလိန့ၢ် တၢ်မၤလိတမံၤလၢ အဒုးဆီၣ်လီၤအသးန့ၣ်လီၤ. တၢ်လီၢ်ဖဲအဝဲအၢၣ်လီၤလၢ ကမၤယွၤအတၢ်မၤအတၢ်ဆဲးတၢ်လၤန့ၣ် အဝဲတနၢ်ပၢၢ်ဒံးဘၣ်. လၢကီၢ်အမဲရကၤန့ၣ်, တၢ်အကါဒိၣ်လၢ ၦၤအိၣ်ဒၣ်အတၢ်ဒၣ်ဝဲလီၤ. မ့မ့ၢ်လၢ ကီၢ်ဒိၣ်မံၣ်နံၣ်ကၢၣ် ရံၣ်ဘၢးပလ့းန့ၣ်, အဝဲနၢ်ပၢၢ်ထီၣ်ဝဲလၢ ၦၤအိၣ်မူဝဲ ဒ်ကမျၢၢ်ဒူၣ်ထၢအသိးန့ၣ်လီၤ. တၢ်နီၤသကိးလိၥ်သး တၢ်အီၣ်တၢ်အီဒီး တၢ်ဖိတၢ်လံၤန့ၣ် မ့ၢ်ကျဲလၢ ၦၤတဖၣ်အံၤ ရ့လိၥ်ဘၣ်ထွဲ တဂၤဒီးတဂၤန့ၣ်လီၤ. ကီၢ်အမဲရကၤအတၢ်ဆဲးတၢ်လၤတဂ့ၤန့ၢ် ကီၢ်ဒိၣ်မံၣ်နံၣ်ကၢၣ် ရံၣ်ဘၢးပလ့း အတၢ်ဆဲးတၢ်လၤဘၣ်. မ့ၢ်ဒၣ် တၢ်ဆဲးတၢ်လၤတဖၣ် လီၤဆီလိၥ်သးန့ၣ်လီၤ. အဝဲအၢၣ်လီၤဝဲဒၣ်, “တၢ်ထံၣ်လီၤက့ၤယသး ဒ်သိးအံၤန့ၣ် ဒုးဆီၣ်လီၤ ယသးဒိၣ်မးလီၤ”. ဒ်အဝဲစးထီၣ်ထံၣ်သ့ၣ်ညါအနီၢ်ကစၢ် အတၢ်ကွၢ်မဲၥ် ဒီးထံၣ်လီၤက့ၤအသးဒၣ်ဝဲအသိးန့ၣ်, အဝဲမၤလိန့ၢ်စ့ၢ်ကီးလၢ တၢ်နီၤဟ့ၣ်လၢ တၢ်ဆီၣ်လီၤသးအပူၤန့ၢ် မၤစၢၤအီၤလၢ အတၢ်မၤတၢ်လၢအဝဲသ့ၣ်အဂီၢ် ဂ့ၤန့ၢ်အလီၢ် တက့ၢ်လီၤ.

စီၤပီလူး သိၣ်လိဝဲ တၢ်အိၣ်ဖှိၣ်သးၦၢ်တဖၣ်လၢ အကဖံးမၤပၥ်သးလၢ ၦၤဂၤအဖီခိၣ် လၢတၢ်ဆီၣ်လီၤသးအပူၤန့ၣ်လီၤ. အဝဲကူၣ်လိၥ် ၦၤသးၦၢ်တဖၣ် လၢအသုတ “ပၥ်ကစၢ်အသးလၢတၢ်န့ၢ်သါအဖီခိၣ်” ဘၣ် (၅:၃). ဒီးဆူၦၤသးစၢ်တဖၣ်န့ၣ် အဝဲစံး, “ပၥ်သုသးလၢ ၦၤသးၦၢ်သ့ၣ်အဖီလၥ်တက့ၢ်. ဒီးသုဝဲသ့ၣ်ခဲလၢၥ် ပၥ်လိၥ်သုသး လၢသုဖီလၥ်သကိးသကိး” (:၅)န့ၣ်လီၤ. ဒ်အဝဲစံးအသိး, “ယွၤတြီဃၥ် ၦၤပၥ်ထီၣ်ထီအသး, ဒီးဟ့ၣ်လီၤတၢ်ဘျုးတၢ်ဖှိၣ်လၢ ၦၤဆီၣ်လီၤအသး” လီၤ. အဃိသတးဒီး “ဆီၣ်လီၤသုသးလၢ ယွၤအစုကညီၢ်အဖီလၥ်, ဒ်သိး တုၤအဆၢကတီၢ်ဘၣ်ဒီး, ကပၥ်ထီၣ်ထီသုန့ၣ်တက့ၢ်” (:၆). မ်ယွၤမၤစၢၤၦၤ ဒ်သိးပကမူလၢ တၢ်ဆီၣ်လီၤပသး လၢယွၤဒီးၦၤဂၤ အမဲၥ်ညါတနံၤအံၤတက့ၢ်.