ယထုးထီၣ် စီၢ်နီၤခိၣ်လၢ ယမၤလိၥ်လီၤလီၤဆီဆီတဖျၢၣ် အကူၥ်အက့တဖၣ်လၢ တၢ်ဒၢအပူၤဒီး ရဲၣ်လီၤအီၤလၢ ယမဲၥ်ညါဝံၤအလီၢ်ခံန့ၣ်, ယပၥ်သူၣ်ပၥ်သး တၢ်လၢအတဘၣ်လိၥ်ဘၣ်စးတမံၤန့ၣ်လီၤ. စီၢ်နီၤခိၣ်အဖီခိၣ်အဒါလၢ အဃံလၤ ဒီးတၢ်အကူၣ်အက့အဂုၤအဂၤတဖၣ် အိၣ်ဝဲခဲလၢၥ်, ဘၣ်ဆၣ်ထဲအခီၣ်တခီဧိၤ တအိၣ်ဘၣ်. အခီၣ် မ့ၢ်တအိၣ်ခဲလၢၥ်ဘၣ်န့ၣ်, ယဖှိၣ်ထီၣ်ဆီထီၣ် စီၢ်နီၤခိၣ်အံၤ တသ့ဘၣ်, ဒီးအဝဲကကဲထီၣ် တၢ်လၢအဘျုးတအိၣ်ဘၣ်န့ၣ်လီၤ.
တမ့ၢ်ထဲလၢ စီၢ်နီၤခိၣ်တဖၣ်ဧိၤ ကဲထီၣ်တၢ်လၢၦၤသူအီၤတသ့, ဖဲတၢ်အကူၣ်အခီ အကါဒိၣ်တကူၥ် မ့ၢ်တအိၣ်ဘၣ်အခါဘၣ်. ဖဲ လံၥ် ၁ ကရံၣ်သူးအပူၤ, စီၤပီလူးမၤသ့ၣ်နီၣ်ထီၣ် အၦၤဖးလံၥ်ဖိတဖၣ်လၢ အဝဲသ့ၣ်တအိၣ်ဒီး တၢ်အကါဒိၣ်တမံၤဘၣ်. ၦၤစူၢ်က့ၤနၥ်က့ၤတၢ်ဖိတဖၣ် အိၣ်ဒီး နီၢ်သးအတၢ်ဟ့ၣ်အါမး, ဘၣ်ဆၣ် တအိၣ်ဒီး တၢ်အဲၣ်တၢ်ကွံဘၣ်.
စီၤပီလူးစူးကါဝဲ တၢ်ကတိၤလု (exaggerated language) ဒ်သိးအကမၤဆူၣ်ထီၣ်အတၢ်ဂ့ၢ်, ဒီးကွဲးဝဲဒၣ်လၢ ၦၤဖးတၢ်ဖိတဖၣ် မ့ၢ်အိၣ်ဒီး တၢ်သ့ၣ်ညါခဲလၢၥ်ဒၣ်လဲၥ်, အဝဲသ့ၣ် မ့ၢ်ဟ့ၣ်ကွံၥ်တၢ်လၢအအိၣ်ဒီးအီၤ ကိးမံၤဒဲးဒၣ်လဲၥ်, ဒီးအဝဲသ့ၣ် မ့ၢ်သးဆူၣ်တူၢ်တၢ်ကီတၢ်ခဲဒၣ်လဲၥ်, တၢ်အခီၣ်ထံး မိၢ်ၦၢ်လၢ အမ့ၢ်တၢ်အဲၣ်တၢ်ကွံမ့ၢ် တအိၣ်ဘၣ်ဒီး, အတၢ်မၤခဲလၢၥ်တဖၣ် ကကဲထီၣ် တၢ်ကလီကလီလီၤ (၁ ကရံၣ် ၁၃:၁-၃). စီၤပီလူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ အကမၤတၢ်ထီဘိလၢတၢ်အဲၣ်အပူၤ, ဒီးဒုးကလၢၢ်ဘၣ် တၢ်အဲၣ်အတၢ်ဃံတၢ်လၤလၢ အဒီသဒၢတၢ်, နၥ်န့ၢ်တၢ်, မုၢ်လၢ်တၢ်, ဒီးမၤတၢ်သၦၢ်ၦၢ် (:၄-၇) ထီဘိန့ၣ်လီၤ.
ပနီၢ်သးအတၢ်ဟ့ၣ်တဖၣ် ကမ့ၢ်သ့ၣ်သ့ၣ် တၢ်သိၣ်လိနဲၣ်ယုၤ, တၢ်ဟ့ၣ်ဂံၢ်ဟ့ၣ်ဘါ, မ့တမ့ၢ် တၢ်မၤတၢ်ခ့တၢ်ပှၤအတၢ်မၤလၢ တၢ်နၥ်အကမျၢၢ်ဒူၣ်ထၢအပူၤန့ၣ်လီၤ. ဖဲပစူးကါ ပတၢ်ဟ့ၣ်တဖၣ်အံၤအခါ, ပကဘၣ်သ့ၣ်နီၣ်လၢ ယွၤအတၢ်တ့တိၥ် ကျဲၤန့ၣ်ထီဘိကဘၣ်အိၣ်ဒီး တၢ်အဲၣ်န့ၣ်လီၤ. မ့တမ့ၢ်ဘၣ်ဒီး, တၢ်ကလီၤဂၥ်ဒီး စီၢ်နီၤခိၣ်လၢ အခီၣ်တခီတအိၣ်ဘၣ် အသိးန့ၣ်လီၤ. အဝဲတထီၣ်ဘးအတၢ်ပညိၣ်နီၢ်နီၢ် ဒ်တၢ်တ့တကွီၢ်ဃၥ်အီၤ အသိးန့ၣ်ဘၣ်.
