တၢ်ဟ့ၣ်ဂံၢ်ဟ့ၣ်ဘါန့ၣ် လီၤဂၥ်ဒီး အီးစံၣ်ကၠ့ၣ်(oxygen), အီးစံၣ်ကၠ့ၣ်တအိၣ်န့ၣ် ပမူတသ့ဘၣ်. တၢ်ဂ့ၢ်တမံၤအံၤ မ့ၢ်ဝဲတီဝဲလၢ ဖိသၣ် ၉ နံၣ်ဖိ ကၠ့(မ) စၢဘ့း (James Savage)အဂီၢ်လီၤ. ပိၥ်ခွါဖိအံၤ ကူထံ ယံၤအါန့ၢ် ၂ မံၤလၥ်, စးထီၣ်ဟးထီၣ်လၢ စဲၣ်ဖရဲၣ်စ့းစကိၣ်အကၢၢ်ပၤ(San Francisco shoreline) ဆူ အဲ(လ)ခါထရ့း စွ့ (Alcatraz) ဒီးဟဲက့ၤကဒါ, မ့ၢ်ဒ်သိးကခီဂၥ်ပျံထီၣ်ကွံၥ် တၢ်ကွဲးနီၣ်လၢ ၦၤအသးစၢ်ကတၢၢ် ကဘၣ်မၤနၢၤဝဲ န့ၣ်လီၤ. ဘၣ်ဆၣ် ဖဲတၢ်ကူထံ ဆၢကတီၢ် တုၤ မံးနံး ၃၀ န့ၣ် ပီၣ်လဲၣ်ထံလပီတဖၣ်ဒီး ထံခုၣ်ဒိၣ်မးအဃိ ကၠ့(မ) အဲၣ်ဒိးဃၣ်ကွံၥ်လီၤ. ဖဲန့ၣ် ၦၤဝၢ်ချံကရူၢ်တဖုကိးသတြီထီၣ်, “နမၤန့ၢ်”လီၤ. တၢ်ကတိၤအဖျၢၣ်တဖၣ်အံၤ ဟ့ၣ်အီၤ “တၢ်ကဲထီၣ်လိၣ်ထီၣ်” လၢ ကၠ့(မ) လိၣ်ဘၣ်လၢ ကမၤတုၤအကတၢၢ်အဂီၢ်လီၤ.
အကတီၢ်ဖဲ “တၢ်နးတၢ်ဖှိၣ်ဖးဒိၣ်” အလပီထံခုၣ် မၤသးဟးဂီၤ ၦၤခရံၥ်ဖိတဖၣ် ဒ်သိးကညိကွံၥ် အတၢ်နၥ်န့ၣ် စီၤပီလူးဒီး စီၤဘၢ်နါဘၤ ဟ့ၣ်ဆူၣ်ထီၣ် အပျဲၢ်အဘီၣ်တဖၣ် ဒ်သိးကလဲၤကဒီးဆူညါလီၤ. ဖဲၦၤတၢ်မၢဖိတဖၣ် စံၣ်တဲၤတဲတၢ်သးခုကစီၣ် ဖဲဝ့ၢ်ဒ့ၢ်ဘ့ၤဝံၤလီၢ်ခံ အဝဲသ့ၣ်က့ၤထီၣ်ဝဲဆူ လူၤစတြၤဒီးအံၤကနံၤ, ဒီးအၣ်တံၤအီၥ်လီၤ. ဒီး မၤဂၢၢ်ထီၣ်ကျၢၤထီၣ် အပျဲၢ်အဘီၣ်အသးဒီး သဆၣ်ထီၣ်အခံ ဒ်သိးအကအိၣ်ဝဲ ဆိးဝဲ လၢတၢ်နၥ်အပူၤ…လီၤ (မၤတၢ် ၁၄:၂၁-၂၂). အဝဲသ့ၣ်မၤစၢၤ ၦၤခရံၥ်ဖိတဖၣ် ဒ်သိး ကအိၣ်ကျၢၤလၢ အတၢ်နၥ်ယ့ၣ်ၡူးအပူၤလီၤ. တၢ်ကီတၢ်ခဲတဖၣ် မၤဂံၢ်စၢ်အဝဲသ့ၣ်, ဘၣ်ဆၣ် တၢ်ဟ့ၣ်ဂံၢ်ဟ့ၣ်ဘါ အတၢ်ကတိၤဖျၢၣ်တဖၣ် မၤဆူၣ်ထီၣ် အဝဲသ့ၣ်အတၢ်ဃုထံၣ်န့ၢ်က့ၤတၢ်အစၢ လၢကအိၣ်မူလၢခရံၥ်ပူၤအဂီၢ်လီၤ. လၢကစၢ်ယွၤအဂံၢ်အဘါအပူၤ, အဝဲသ့ၣ် သ့ၣ်ညါထီၣ်ဝဲလၢ အဝဲသ့ၣ်လဲၤတၢ်ဆူညါ သ့ဝဲအဂ့ၢ်လီၤ. လၢခံကတၢၢ်စီၤပီလူး ဒီးစီၤဘၢ်နါဘၤ မၤစၢၤအီၤ ဒ်သိးကနၢ်ပၢၢ်ဝဲလၢ အဝဲသ့ၣ်ကဘၣ် လဲၤခီဖျိ တၢ်ကီတၢ်ခဲအါမးလၢ ကနုၥ်လီၤဆူ ယွၤဘီမုၢ်ပူၤအဂီၢ်န့ၣ်လီၤ (:၂၂).
တၢ်မူလၢယ့ၣ်ၡူးအဂီၢ် ကဲထီၣ်တၢ်တၤတမံၤ, တၢ်ကူထံလၢအကီအခဲလီၤ. တဘျီတခီၣ် ပဘၣ် တၢ်မၤကွၢ်ၦၤလၢ ပကဟ့ၣ်အၡူလီၤ. မ့ၢ်တၢ်ဂ့ၤလၢပဂီၢ်န့ၣ် ယ့ၣ်ၡူးဒီး အၦၤပိၥ်အခံတဖၣ် ဟ့ၣ်တၢ်သဆၣ်ထီၣ်လၢ ပလိၣ်ဘၣ်တဖၣ် ဒ်သိးပကလဲၤကဒီးဆူညါလီၤ. ဃုၥ်ဒီးခရံၥ်န့ၣ် ပမၤတၢ်ခဲလၢၥ်သ့ဝဲလီၤ.
