ယပာ်လီၤလံာ်စီဆှံလၢ ပျဲၢ်စီၢ်အဖီခိၣ်ဒီး ယကွၢ်မဲာ်သၣ်ဖိတဖၣ်လၢအအိၣ်ခိး၀ဲလၢ တၢ်သးဆူၣ်အပူၤလၢ ယကစးထီၣ်စံၣ်တဲၤတဲလီၤတၢ်အဂီၢ်လီၤႉ ယဘါထုကဖၣ်ဒီး ကတဲာ်ကတီၤပာ်စၢၤတ့ၢ်လံယသးလံႉ ဘၣ်မနုၤအဃိ ယကတိၤတၢ်တထီၣ်လဲၣ်ႉ
နမ့ၢ်ပှၤလၢအလုၢ်အပရၤတအိၣ်ဘၣ်တဂၤလီၤႉ လီၤဆီဒၣ်တၢ် ပှၤမ့ၢ်သ့ၣ်ညါနတၢ်အိၣ်မူလၢခါပူၤကွံာ်န့ၣ်ဒီး မတၤတဂၤမး တဒိကနၣ်နၤဘၣ်ႉ ဒီးကစၢ်ယွၤ တစူးကါ နၤလၢၤဘၣ်ႉ တၢ်ကတိၤတဖၣ်အံၤ ဘၣ်တၢ်ကတိၤတ့ၢ်အီၤလၢ ကျဲအကလုာ်လုာ်လၢ ယတၢ်အိၣ်မူအပူၤ‚ အိၣ်စဲထီတံၢ်၀ဲလၢ ယသူၣ်ယသးအပူၤ‚ တုၤယတူၢ်အီၤတပှဲၤလၢၤ ဒီးယအိၣ်ခိး သးအတၢ်ဒုးတၢ်ယၤ ဘၣ်ထွဲဒီး တၢ်ကတိၤတၢ်လီတၢ်၀့ၤတဖၣ်အံၤလၢ ယနာ်တ့ၢ်အီၤညီကဒၣ်လၢ အနံၣ် ၁၀ အတီၢ်ပူၤလီၤႉ ယသ့ၣ်ညါလၢ တၢ်ကတိၤ တဖၣ်အံၤ တမ့ၢ်၀ဲတီ၀ဲဘၣ်ဆၣ်ၢ်၀ဲဘၣ်လီၤႉ အဃိ ယအိးထီၣ်ယလံာ်စီဆှံလီၤႉ
ယအိးထီၣ် ဖဲကတိၤဒိ ၃၀း၅ န့ၣ် ဒီးတချုးလၢယဖးအီၤလၢယကလုၢ်ဖးဒိၣ်န့ၣ် ယသါနုာ်လီၤဒီး သါဟးထီၣ်ကလံၤကယီကယီဖိလီၤႉ ယဖးဒ်အံၤ ယွၤအကလုၢ် ကထါန့ၣ် ကဆှီ၀ဲကိးထံၣ်ဒဲးလီၤႉ အ၀ဲဒၣ် မ့ၢ်ကတီၤတဘ့ၣ်လၢပှၤသန့ၤအသးလၢအီၤ အဂီၢ်လီၤႉ ယထံၣ်လီၤယမဲာ်ချံဒီး တၢ်ဃူတၢ်ဖိးလုၣ်ဘၢယၤလီၤႉ ဒီးယစးထီၣ်ဟ့ၣ်နီၤယတၢ်အုၣ်အသးလၢပှၤဂီၢ်မုၢ်လီၤႉ
ပ၀ဲအါဂၤ ပလဲၤခီဖျိကွၢ်ဆၢၣ်မဲာ်ဘၣ် ပှၤဂၤအတၢ်ကတိၤဒီး တၢ်ထံၣ် ဆိကမိၣ်လၢ အခံးတကပၤလၢအိၣ်ဒီး စိကမီၤလၢ အစှီၤတံၢ်ဃာ်ပှၤ ဒ်သိးပမၤတၢ် ဘၣ်လိၣ်ဘၣ်စးတသ့ဘၣ်အဂီၢ်လီၤႉ ဘၣ်ဆၣ် ယွၤအကလုၢ်ကထါန့ၣ် အကမၣ် တအိၣ်ဘၣ်ႉ လၢပှဲၤ၀ဲဒီး မ့ၢ်၀ဲတီ၀ဲသပှၢ်ကတၢၢ်လီၤႉ ဖဲပဘၣ်တၢ်လ့ပစီပှၤလၢ ပကနာ် တၢ်ထံၣ်ဆိကမိၣ်လၢ အမၤလီၤဘှံးပသူၣ်ပသး ဘၣ်ဃးဒီး ပလုၢ်ပပရၤ‚ မ့တမ့ၢ် ပတၢ် ပညိၣ်ကွၢ်စိ ဒ်ယွၤအဖိတဖၣ် ဒီးၣ် ဒီတဒၢပသူၣ်ပသးတဖၣ်လီၤႉ ဒ်ပှၤကွဲးထါကွဲး၀ဲအသိး ပသီၣ်ဆၢက့ၤသ့၀ဲ‚ ‘‘ယွၤဧၢၣ် ယသ့ၣ်နီၣ်ထီၣ်က့ၤ ဒီးယမၤမုာ်ထီၣ်ယသးလီၤ’’ (စံး ၁၁၉း၅၂) န့ၣ်လီၤႉ
မ်ပကထီဒါဒုးဆၢက့ၤ တၢ်လီတၢ်၀့ၤတဖၣ်လၢ ပတူၢ်လိာ်တ့ၢ်အီၤ လၢအဘၣ်ဃးဒီးယွၤၣ်တက့ၢ်ႉ