လၢဖိခွါခၠါ (လ) အဂီၢ် မ့ၢ်၀ဲခရၠာစးံာ်အိၣ်ဖျဲၣ် ၁၂ ဘျီတဘျီန့ၣ် ဖိခွါအံၤအိၣ်ခိးလၢ ကအိးထီၣ် တၢ်ဟ့ၣ်တဖၣ်လၢ အအိၣ်လၢခရၠာစးံာ်အိၣ်ဖျဲၣ်အသ့ၣ်ထူၣ်အဖီလာ်‚ လၢတၢ်သူၣ်ဆူၣ်သးဆူၣ် န့ၣ်လီၤႉ အ၀ဲ ဆၢမုၢ်လၢ်ဒိးန့ၢ်ဘၣ် လ့ၣ်ယီၣ်ခီၣ်အသီတဆိလီၤႉ ဘၣ်ဆၣ်‚ အ၀ဲအတၢ် မုၢ်လၢ် ကတၢၢ်ကွံာ်လၢတၢ်သးဟးဂီၤ‚ မ့ၢ်လၢတၢ်ဟ့ၣ်လၢခံကတၢၢ်လၢအ၀ဲဒိးန့ၢ်ဘၣ်အံၤ မ့ၢ်လံာ်ခီယ့ၤ တဘ့ၣ်အဃိန့ၣ်လီၤႉ လၢ လံာ်ကဘျံးအဆိကတၢၢ်တကဘျံး‚ အ၀ဲဖးဘၣ် တၢ်ကွဲးလၢ‚ ‘‘ဆူ ခၠါ (လ) လၢတၢ်အဲၣ်ဒီးတၢ်ဆၢမုၢ်လၢ်အါလၢ နကဂုာ်ကျဲးစၢးလၢ နတၢ်မၤလိအဂီၢ် -လၢမိၢ်ဒီးပၢ်‚ ၁၉၅၈ နံၣ်’’ လီၤႉ
လၢခံအနံၣ်တဆံ‚ ခၠါ (လ) မၤတၢ်အဂ့ၤကတၢၢ်လၢအတၢ်မၤလိအပူၤန့ၣ်လီၤႉအ၀ဲဖျိထီၣ်ခီလ့ၣ်ကၠိ ဒီးလၢခံထီၣ်တၢ်နီၣ်ကဘီယူၤတၢ်မၤလိလီၤႉ အ၀ဲကဲထီၣ် ပှၤနီၣ် ကဘီယူၤတဂၤလၢအလဲၤတၢ်လၢထံဂုၤကီၢ်ဂၤ‚ မၤလၢပှဲၤအတၢ်သူၣ်ဆူၣ်သးဆူၣ်လၢ ကမၤစၢၤ ပှၤလၢအလိၣ်ဘၣ်တၢ်မၤစၢၤဒီး ဆူတၢ်ကနီၤဟ့ၣ် ကစၢ်ယ့ၣ့်ှှူးဃုာ်ဒီး အ၀ဲသ့ၣ်န့ၣ်လီၤႉ ဖဲအဒိးန့ၢ်တၢ်ဟ့ၣ် ပူၤကွံာ်အနံၣ်ဃုဆံ‚ အ၀ဲနီၤဟ့ၣ်ကဒါက့ၤ အလံာ်ခီယ့ၣ် လၢအစူးကါ၀ဲဒိၣ်မးအံၤ ဆူအလံၤဖိတဖၣ်န့ၣ်လီၤႉ တၢ်အံၤကဲထီၣ် တၢ်ပနီၣ်တမံၤ လၢအ၀ဲအဂီၢ်လၢအမိၢ်အပၢ် အတၢ်ဘျၢလီၤတၢ်အဲၣ်တၢ်ကွံ လၢအ၀ဲအခါဆူညါအပူၤ‚ဒီးအ၀ဲပာ်လုာ်ပာ်ပရၤဒံး တၢ်အံၤန့ၣ်လီၤႉ ဘၣ်ဆၣ်‚ အါန့ၢ်တၢ်အံၤ အ၀ဲဘၣ်ဘျုးဘၣ်ဖှိၣ် တုၤဒၣ်လဲာ်လၢ ကိးနံၤအမိၢ်အပၢ်အတၢ်ဘျၢလီၤ တၢ်ဘျုးတၢ်ဖှိၣ်လၢအသူၣ်ထီၣ် တၢ်စူၢ် တၢ်နာ်‚ ခီဖျိတၢ်သိၣ်လိအီၤလၢ ကစၢ်ယွၤအဂ့ၢ်အကျိၤဒီး လံာ်စီဆှံအဆၢဖိတဖၣ်န့ၣ်လီၤႉ
လံာ် ၅ မိၤဒီး ၁၁‚ တဲဖျါထီၣ် တၢ်ဂ့ၢ်လၢအဘၣ်ထွဲဒီး တၢ်ဂ့ၢ်လၢအကါဒိၣ်လၢ တၢ်ဟံးန့ၢ်တၢ်ခွဲးတၢ်ယာ်ကိးမံၤ ဒ်သိးကနီၤဟ့ၣ် ယွၤအကလုၢ်ကထါဃုာ်ဒီး ဖိတဖၣ်‚ ‘‘ဒီးသုကဘၣ်သိၣ်လိအီၤလၢ သုဖိသုလံၤ‚ ဒီးတုၤနဆ့ၣ်နီၤလၢနဟံၣ်ပူၤ တုၤနလဲၤတၢ်လၢကျဲပူၤ‚ တုၤနမံလီၤ ဒီးတုၤနဂဲၤဆၢထၢၣ်ဒီး‚ နဘၣ်ကတိၤတၢ်လၢ အဂ့ၢ်အကျိၤလီၤ’’ (း၁၉) ႉ
လၢခၠါ (လ) အဂီၢ်‚ တၢ်လုၢ်ဒိၣ်ပရၤဒိၣ်အထူအယိာ်လၢ အဘၣ်တၢ်သူၣ်လီၤတ့ၢ် ဖဲအမ့ၢ်ဖိသၣ်ဆံးတဂၤကတီၢ်‚ ဖီထီၣ်သၣ်ထီၣ်လၢ အသးသမူဒီတစိၤလၢ အတၢ်မၤတၢ်လၢအတၢ်အုၣ်က့ၤခီၣ်က့ၤကစၢ်အဂီၢ်န့ၣ်လီၤႉဃုာ်ဒီးယွၤအတၢ်မၤကဲထီၣ်လိၣ်ထီၣ်တၢ်‚ တၢ်အသူအသၣ်ဟဲအိၣ်ထီၣ်လၢတၢ်လၢပဘျၢလီၤတ့ၢ်ဃာ်ထဲလဲၣ်န့ၣ်လီၤႉ