တၢ်အီၣ်ကျးတဖျၢၣ်လၢ အမံၤဟူသၣ်ဖျါလၢ ၀့ၢ်ဘီကီာ် ဆါမ့ၤချီလၢအပၣ်ဃုာ်ဒီး တၢ်ညၣ် လၢ ၄၅ နံၣ်ဒီး မၤလိမၤပှဲၤအါထီၣ် တၢ်အီၣ်အရၠာစးီၢ်တစဲးဘၣ်တစဲး လၢတနံၤ စုာ်စုာ်န့ၣ်လီၤႉ ဒ် ‘‘တၢ်အီၣ်အဘျဲၢ်’’ အရၠာစးီၢ်၀ံၣ်ဘဲ လၢခံစှၤသီအသိး‚ တၢ်ဖီတၢ်တ့ၤ တၢ်ဟံးန့ၢ်အါထီၣ် တၢ်ဆၢကတီၢ်လၢ ဒုးဂ့ၤထီၣ် တၢ်အီၣ်အကံၢ်အစီတဖၣ် န့ၣ်လီၤႉ
တလီၢ်လီၢ်‚ တၢ်လၢအဂ့ၤအ၀ါတဖၣ် လိၣ်လၢတၢ်ကဘၣ်ဟံးန့ၢ် တၢ်ဆၢကတီၢ်‚ ဘၣ်ပကူပကညီအန့ဆၢၣ်တခီ‚ ဘၣ်ဟူးဘၣ်ဂဲၤဒိၣ်မးဒီးတၢ်သူၣ်စူၤ သးစူၤန့ၣ်လီၤႉ တၢ်သံကွၢ်လၢအမ့ၢ် ‘‘ဆံးယံာ်လဲၣ်’’ ဟဲဖျါထီၣ်အီၤလၢ လံာ်စီဆှံဒီတဘ့ၣ် န့ၣ်လီၤႉ တၢ်အဒိလၢတၢ်ကလၢၢ်ဘၣ် တၢ်နးနးကလဲာ်အံၤ ဟဲလၢ၀ံဃဘးကူာ်‚ လၢအစးထီၣ် အတၢ်ကွဲးလၢတၢ်သံကွၢ်လၢအမ့ၢ်‚ ‘‘ယွၤဧၢ‚ ယဘၣ်ကိးထီၣ်တၢ်‚ ဒီးနတနၢ် ဟူဘၣ် ဆံးယံာ်လဲၣ်’’ (ဃဘး ၁း၂) ႉ ‘ဃဘးကူာ် – မံၤအခီပညီလၢအမ့ၢ် ပှၤကနိတၢ်’‚ တဲဖျါထီၣ် ၀ံအတၢ်ကတိၤလၢ အဘၣ်ထွဲဒီး ယွၤအတၢ်စံၣ်ညီၣ်လၢ အ၀ဲအထံအကီၢ် (ယူဒၤ) ခီဖျိ ဘၤဘူၤလိာ်လၢ အရၠာစးၢၢ်စၢၢ်အတၢ်ဟဲနုာ်ဆူၣ်ပျီဆူၣ်‚ ဒီးအ၀ဲဘၣ်ကနိလၢ ကစၢ်ယွၤဟ့ၣ်တၢ်ပျဲလၢ ပှၤအၢပှၤသီတဖၣ် ဘီၣ်ထီၣ်ညီထီၣ် ဒ်အမ့ၢ်ပှၤလၢအဟံးန့ၢ် ဆူၣ်ခွဲးယာ်တဖၣ်လၢ ပှၤဂုၤပှၤဂၤအဖီခိၣ်န့ၣ်လီၤႉ ဘၣ်ဆၣ်‚ ကစၢ်ယွၤအၢၣ်လီၤ တၢ်မုၢ်လၢ်ဒီး တၢ်သူၣ်ထီၣ်က့ၤတၢ်လၢ အတၢ်ဆၢကတီၢ်ဒၣ်၀ဲအပူၤ‚ ‘‘အဂ့ၢ်ဒ်အံၤ‚ တၢ်ထံၣ်လၢညါခီန့ၣ် အိၣ်၀ဲလၢတၢ်ဆၢကတီၢ်အဂီၢ်ႉႉႉ မ့ၢ်သုးနံၤသုးသီဘၣ်ဆၣ်ဒီး‚ အိၣ်ခိးတက့ၢ်ႉ အဂ့ၢ်ဒ်အံၤ‚ ကဟဲသပှၢ်တၢၢ် ဒီးတသုးနံၤသုးသီဘၣ်’’ (၂း၃) ႉ
ပှၤဘၤဘူၤလိာ်ဖိအတၢ်စိာ်မၢကဲကုၢ်ယံာ်၀ဲ အနံၣ် ၇၀ လီၤႉ လၢပှၤကူ ပှၤကညီအဂီၢ်‚ တၢ်အံၤ မ့ၢ်တၢ်လၢအယံာ်အထၢဘၣ်ဆၣ်‚ ထီဘိ ကစၢ်ယွၤ မ့ၢ်ကစၢ်လၢအကလုၢ်တီ ဒီးတၢ်လၢအတဲဘၣ်တ့ၢ်၀ဲတဖၣ်န့ၣ်လီၤႉ
ကစၢ်ယွၤအတၢ်ဆိၣ်ဂ့ၤအဂ့ၤကတၢၢ်တနီၤ ကယံာ်၀ဲထၢ၀ဲသ့ၣ်သ့ၣ်လီၤႉ မ့ၢ်သုးနံၤသုးသီဘၣ်ဆၣ်‚ ပၢၤဃာ် တၢ်ကွၢ်လၢ်တၢ်ဆူအအိၣ်တက့ၢ်ႉ အ၀ဲကတဲာ် ကတီၤတၢ်ဆိၣ်ဂ့ၤကိးမံၤဃုာ်ဒီး တၢ်ကူၣ်သ့ဒီး တၢ်ကဟုကယာ်အလၢအပှဲၤ‚ ဒီးထီဘိကၢကီၣ် လၢပကအိၣ်ခိးအ၀ဲအတၢ်ဟ့ၣ်န့ၣ်လီၤႉ