ဘၣ်တဂီၤ‚ ယဆၢထၢၣ်ဒီး လဲၤဆူကမါဖိတဖျၢၣ်လၢ အအိၣ်ဘူးဒီး ယဟံၣ်န့ၣ်လီၤႉ ယဆ့ၣ်နီၤလၢချံဖိအပူၤ‚ ကွၢ်ဒီိးဆိကမိၣ်ထီၣ် ကလံၤကသံွဒံလၢ အအူတၢ်လၢမုၢ်နုာ်‚ လူၤပိာ်ဘရၣ်အကဘျၣ်ဖးဒိၣ်လၢ အသူလၢအအိၣ်လၢထံအဖီခိၣ်န့ၣ်လီၤႉ မ့ၣ်လုၢ်တၢ် အၢၣ်အကျိၤထီထီဖိတဖၣ်လၢ အဘၣ်တၢ်က၀ီၤဃာ်လၢ ဘရၣ်န့ၣ်လီၤႉ ကလံၤသ၀ံးလၢ အအူတပျုာ်တပျီၤတၢ်ဆံးဆံးတဖျၢၣ် ဟဲပၢၢ်ထီၣ် ၀ံၤအသဟီၣ်စၢ်လီၤလီၤႉ တယံာ် မုၢ်ဟဲဖျါထီၣ်ဒီး တၢ်အၢၣ်ဒီးဘရၣ်မုၢ်ပစီၤထံတဖၣ် ဟါမၢ်ကွံာ်လီၤႉ
တၢ်လၢယထံၣ်ဘၣ်အံၤ မၤမုာ်ထီၣ်က့ၤယၤ မ့ၢ်လၢ ယဒုးဘၣ်ထွဲတၢ်အံၤ လၢ လံာ်စီဆှံလၢယဖးတ့ၢ်‚ ‘‘ယ့တူာ်ကွံာ်လံ နတၢ်ကမၣ် ဒ်တၢ်အၢၣ်သူအသိးဒီး နတၢ်ဒဲးဘးဒ်တၢ်အၢၣ်အသိးလံ’’ (ယ့ှှါ ၄၄း၂၂) န့ၣ်လီၤႉ ယလဲၤဆူ တၢ်လီၢ်အံၤအိၣ်ဒီး တၢ်မုၢ်လၢ်လၢ ကထုးကွံာ် ယတၢ်ဆိကမိၣ်လၢအတဂ့ၤတဖၣ်လၢ ယဆိကမိၣ်တ့ၢ် လၢအါနံၤအါသီလၢ အမၤဒဲးဘးတၢ်န့ၣ်လီၤႉ ဖဲလၢယမ့ၢ်အၢၣ်လီၤ တၢ်သ့ၣ်တဖၣ်အံၤ ဘၣ်ဆၣ်‚ ယစးထီၣ်ကမၢကမၣ်လၢ မ့ၢ်ယွၤဘၣ်ကပျၢ်တၢ်အံၤ ဖဲလၢယမ့ၢ်မၤဘၣ်က့ၤ တၢ်ဒဲးဘး ဒ်အလီၢ်လီၢ်အသိးန့ၣ်ဧါလီၤႉ
ဂီၤအ၀ဲန့ၣ်‚ ယသ့ၣ်ညါက့ၤတၢ်စံးဆၢလၢ ကစၢ်ယွၤ ကပျၢ်ယတၢ်ဒဲးဘး န့ၣ်လီၤႉ ခီဖျိ ၀ံယ့ှှါယၤန့ၣ် ယွၤပာ်ဖျါထီၣ် အတၢ်ဘျုးတၢ်ဖှိၣ် ဆူပှၤအံၣ်စရၠာစး့လးဖိတဖၣ် ဖဲအ၀ဲသ့ၣ် ဂုာ်ကျဲးစၢးဟူးဂဲၤလၢ တၢ်ဂ့ၢ်ကီလၢ တၢ်ဘါတၢ်ဂီၤတၢ်ဖီၣ် အတၢ် လဲၤသးဆူညါန့ၣ်လီၤႉ ဖဲလၢအ၀ဲမ့ၢ်တဲဘၣ် ပှၤအံၣ်စရၠာစး့လးဖိတဖၣ် ဒ်သိးကဆိကတီၢ် တၢ်လူၤပိာ်ကစၢ်အဂုၤအဂၤတဖၣ်ဘၣ်ဆၣ်‚ ယွၤကွဲမုာ်က့ၤစ့ၢ်ကီး အ၀ဲသ့ၣ်လၢကဟဲက့ၤဆူအအိၣ်‚ လၢအစံး၀ဲလၢ‚ ‘‘နမ့ၢ်ယခ့ယပှၤလီၤႉ ယတ့နၤ‚ နမ့ၢ် ယခ့ယပှၤ လီၤႉ အံၣ်စရၠာစး့လးဧၢ‚ ယတသးပ့ၤနီၣ်ဘၣ်နၤဘၣ်’’ (း၂၁) န့ၣ်လီၤႉ
ယတဟံးဃာ်ဖီၣ်ဃာ်ဘၣ် တၢ်ပျၢ်တၢ်ကမၣ်အလၢအပှဲၤ ဒ်သိးအံၤနီတစု ဘၣ်ဆၣ်‚ ယသ့ၣ်ညါနၢ်ပၢၢ်ယဲလၢ ကစၢ်ယွၤအဘျုးအဖှိၣ်အံၤ မ့ၢ်တၢ်ထဲတမံၤဧိၤလၢ အမၤကတၢၢ်ကွံာ် ပတၢ်ဒဲးဘးအလၢအပှဲၤဒီး ယါဘျါပှၤလၢတၢ်ဒဲးဘးအံၤသ့၀ဲန့ၣ်လီၤႉ ကစၢ်ယွၤအဘျုးအဖှိၣ်န့ၣ် အကတၢၢ်တအိၣ်ဒီး ဂ့ၤ၀ဲ ဒ်ကစၢ်ယွၤအသိးန့ၣ်လီၤႉ ဒီး ပမၤန့ၢ်အဘျုးအဖှိၣ်အံၤသ့‚ ဖဲပလိၣ်ဘၣ်တဘျီလၢ်လၢ်န့ၣ်လီၤႉ