ဖဲချႉခႉနႉ ၂၇‚ ရၠာစးိမ့ၤပှၤပၢတၢ်ဖိ အီးစ့ဘယၢးစ် ဟဲနုာ်ဆူဘျီၣ်ဒိၣ်အပူၤလၢ ကပာ်လီၤ လၢ အတၢ်အစိကမီၤတဖၣ် အပူၤန့ၣ်လီၤႉ အ၀ဲမၤနၢၤတၢ်လၢ ထံလီၢ်ကီၢ်ပူၤ တၢ်ဒုး တၢ်ယၤဒီး ကဲထီၣ်ပှၤပၢတၢ်ဖိထဲတဂၤဧိၤလၢ လီၢ်က၀ီၤအ၀ဲန့ၣ်‚ လၢဟီၣ်ခိၣ် ဒီးသုးကျဲၤ ပၢတၢ် ဒ်ဘီမုၢ်စီၤပၤဖးဒိၣ်တဂၤအသိးလီၤႉ ဘၣ်ဆၣ်‚ အ၀ဲသ့ၣ်ညါလၢ တၢ်စိကမီၤ ဒ်သိးအံၤ‚ ဘၣ်တၢ်ထံၣ်အီၤ ဒ်ပှၤမၤကမၣ်တၢ်အသိးန့ၣ်လီၤႉ လၢတၢ်အံၤအဃိ‚ အ၀ဲ ပာ်လီၤကွံာ်အစိကမီၤအံၤလၢ ဘျီၣ်ဒိၣ်အမဲာ်ညါ‚ အၢၣ်လီၤအသးလၢ ကကဲထီၣ်ဒၣ် ပှၤဘၣ်မူဘၣ်ဒါလၢ အဘၣ်တၢ်ပာ်လီၤလၢဘျီၣ်ဒိၣ်တဂၤအသိးန့ၣ်လီၤႉ ပှၤလၢဘျီၣ်ဒိၣ် တဖၣ် စံးဆၢက့ၤတၢ်ဒ်လဲၣ်ႉ ပှၤရၠာစးိမ့ၤလၢဘျီၣ်ဒိၣ်တဖၣ်‚ မၤလၤကပီၤကဒါက့ၤ ပှၤပၢ တၢ်အံၤ‚ ခီဖျိတၢ်ဒုးကုာ်ထီၣ်ခိၣ်သလုးလၢ အ၀ဲအခိၣ်ဒီးယုၢ်န့ၢ်အ၀ဲအမံၤလၢ ‘‘ပှၤရၠာစးိမ့ၤဖိတဖၣ် အတၢ်ခ့တၢ်ပှၤ’’ န့ၣ်လီၤႉ အ၀ဲဘၣ် တၢ်ဟ့ၣ်စ့ၢ်ကီးအမံၤလၢ အီကၢးစတၢးစ်‚ လၢအမ့ၢ်ပှၤအဒိၣ်အမုၢ်တဂၤန့ၣ်လီၤႉ
စီၤပီလူး ကွဲးဖျါထီၣ် ကစၢ်ယ့ၣ့်ှှူးဆီၣ်လီၤအသး ဒီးဟံးန့ၢ်တၢ်အက့ၢ်အဂီၤ ဒ်တၢ်ခ့တၢ်ပှၤတဂၤအသိးန့ၣ်လီၤႉ အီကၢးစတၢးစ်စ့ၢ်ကီး ဖျါလၢအမၤတၢ် ဒ်သိးအံၤ န့ၣ်လီၤႉ မ့ၢ်၀ဲတီ၀ဲစ့ၢ်ဧါႉ အီကၢးစတၢးစ် မၤအသး ဒ်အပာ်လီၤအးလီၤအစိကမီၤ မ့မ့ၢ် အ၀ဲမၤတၢ်အံၤလၢ ကဒိးန့ၢ်တၢ်လၢအကစၢ်ဒၣ်၀ဲ အဂီၢ်န့ၣ်လီၤႉ မ့မ့ၢ် ကစၢ်ယ့ၣ့်ှှူး တခီ‚ ‘‘ဆီၣ်လီၤအသး ဒီးစူၢ်၀ဲတုၤအဒိးသံအသး‚ တုၤအဒိးသံ အသးလၢထူၣ်စုညါအလိၤလီၤ’’ (ဖံး ၂း၈) ႉ တၢ်တူၢ်ဘၣ်တၢ်သံလၢ ပှၤရၠာစးိမ့ၤအထူၣ်စုညါတခါအလိၤမ့ၢ်တၢ်အက့ၢ်အဂီၤ လၢအနးကတၢၢ်လၢ အဒုးလီၤမၢ် ပှၤအတၢ်ယူးတၢ်ယီၣ် ဒီးတၢ်မဲာ်တိၣ်မဲာ်ဆှးန့ၣ်လီၤႉ
တနံၤအံၤ‚ တၢ်အဂ့ၢ်အခၢး လၢအကါဒိၣ်လၢ ပှၤကူပှၤကညီစံးထီၣ်ပ့တၢၤ၀ဲ မ့ၢ်‚ ‘တၢ်ခ့တၢ်ပှၤခိၣ်နၢ်’ ဒ်တၢ်ဂ့ၤတၢ်၀ါတမံၤ‚ မ့ၢ်ဒၣ်လၢ ကစၢ်ယ့ၣ့်ှှူး အဃိန့ၣ်လီၤႉ မ့ၢ်လၢကစၢ်ယ့ၣ့်ှှူးတူၢ်သံအသးလၢထူၣ်လိၤ လၢပဂီၢ်အဃိ‚ အ၀ဲမ့ၢ်နီၢ်နီၢ် တၢ်ခ့ တၢ်ပှၤန့ၣ်လီၤႉ တဘျီဃီ‚ အ၀ဲမ့ၢ်စ့ၢ်ကီး ပှၤအုၣ်က့ၤခီၣ်က့ၤတၢ်နီၢ်နီၢ်န့ၣ်လီၤႉ
ကစၢ်ခရၠာစးံာ်ကဲထီၣ် တၢ်ခ့တၢ်ပှၤတဂၤလၢ ပကဒိးဘၣ် တၢ်အုၣ်က့ၤခီၣ်က့ၤပှၤ န့ၣ်လီၤႉ အ၀ဲ ‘ညိကွံာ်အသး’ (း၇) အဃိ‚ ပဒိးန့ၢ်တၢ်လၢအဒိၣ်၀ဲမုၢ်၀ဲနီၢ်နီၢ်လၢ အမ့ၢ် တၢ်အုၣ်က့ၤခီၣ်က့ၤ ဒီးတၢ်မူအထူအယိာ်န့ၣ်လီၤႉ