ဒ်ပှၤဒိၣ်တုာ်ခိၣ်နၢ်တဂၤအသိး‚ ယရၠာစးဲၣ်ကျဲၤ ပှၤကၠိဖိတၢ်မၤလိလၢ အဘၣ်ထွဲဒီး တၢ်လဲၤခီဖျိ မၤနၢၤ တၢ်ကီတၢ်ခဲန့ၣ်လီၤႉ ပနဲၣ်လီၤပှၤကၠိဖိတဖၣ်လၢ ကထီၣ်တၢ်ဒူၣ်လၢအထီအိၣ် ၈ ပ့ၣ် တခါန့ၣ်လီၤႉ ပှၤလၢအလဲၤတုၤဆူ တၢ်ဖီခိၣ် အဆိကတၢၢ်‚ ဟ့ၣ်ဂံၢ်ဟ့ၣ်ဘါ ပှၤထီၣ်တၢ်ဖိ တဂၤစုာ်စုာ် ဒ်သိးကနာ်န့ၢ်ပျံၤလၢ အဘၣ်တၢ်စၢဃာ်ဒီးထီၣ်ကယီကယီဆူ တၢ်ဒူၣ်အဖီခိၣ် လၢတၢ်တအိၣ်ဒီးတၢ်ကွၢ်က့ၤတၢ်ဆူလာ်ဘၣ်န့ၣ်လီၤႉ လၢပပှၤကၠိဖိအါဂၤအကျါတဂၤ‚ ကွၢ်စူၣ်တၢ်အဒူၣ်အဆၢ ဖဲပစၢဒီး ဒုးသိးထီၣ် ယီၢ်တကိးလၢ အယီၢ်ဒ့န့ၣ်လီၤႉ ဖဲန့ၣ် အ၀ဲ တဲထီၣ်၀ဲလၢ‚ ‘ကျဲတအိၣ်နီတဘိလၢ ယမၤတၢ်အံၤကန့ၢ်၀ဲဘၣ်လီၤႉ’ လၢတၢ်မၤဂၢၢ် မၤကျၢၤ ပျံၤလၢအ၀ဲဘၣ်တၢ်စၢထီၣ် အတၢ်ဂံၢ်ဆူၣ်ဘါဆူၣ်‚ ပဟ့ၣ်ဂံၢ်ဟ့ၣ်ဘါအီၤဒီး သူၣ်ခုသးခုဖဲအ၀ဲထီၣ်တုၤဆူ တၢ်ဒူၣ်အဖီခိၣ်‚ ဒီးခါထီၣ်အခီၣ်ကါလၢတၢ်လီၢ်ထီၣ်ထီအံၤ န့ၣ်လီၤႉ
ဖဲပကွၢ်ဆၢၣ်မဲာ်ဘၣ် တၢ်ဂ့ၢ်ကီတဖၣ်လၢ အဖျါလၢပမၤနၢၤအီၤ တမ့ၢ်ကသ့ ကတီၢ်‚ တၢ်ပျံၤတၢ်ဖုး ဒီးတၢ်တဘံၣ်တဘၢတဖၣ် ဒုးအိၣ်ထီၣ်တၢ်သးဒ့ဒီသ့၀ဲန့ၣ်လီၤႉ ယွၤအတၢ်အုၣ်ကီၤလၢ အတဆီတလဲသးလၢ အတၢ်ဂံၢ်ဆူၣ်ဘါဆူၣ်‚ အတၢ်ဂ့ၤတၢ်၀ါဒီး အကလုၢ်လၢအတီ ဒုးကဲထီၣ် ပျံၤလၢအဂံၢ်ဆူၣ်တဘိလၢ တၢ်နာ်န့ၢ်အီၤသ့၀ဲန့ၣ်လီၤႉ တၢ်နာ်န့ၢ်တၢ်လၢတၢ်အုၣ်ကီၤအံၤ‚ ဟ့ၣ်ဆူၣ်ထီၣ် ပှၤစီဆှံလၢပျၢၤတဖၣ်လၢ အပာ်ဖျါထီၣ် အ၀ဲသ့ၣ် အတၢ်စူၢ်တၢ်နာ်တၢ်မၤနၢၤတဖၣ်လၢ အလီၢ်အိၣ်လၢ ပကသ့ၣ်ညါလီၤတံၢ် လီၤဆဲးကိးမံၤလၢ ကစၢ်ယွၤအတၢ်တိာ် (ဧ့ၤ့ဘံၤ ၁၁း၁-၁၃‚၃၉) န့ၣ်လီၤႉ ဃုာ်ဒီးတၢ်နာ်‚ ပဃုထံၣ်ကစၢ်ယွၤအတၢ်ပာ်သးသမှံၤသပှၢ်‚ တလီၢ်လီၢ်ဆၢထၢၣ်ထဲတဂၤဧိၤ‚ ဖဲပနာ်န့ၢ် အီၤန့ၣ်လီၤႉ ပမၤဘၣ်လိာ်က့ၤ ကျဲလၢပသုးဘူးပသးလၢ တၢ်လၢအတၤတၢ်တဖၣ်သ့ ခီဖျိတၢ်ကွၢ်က့ၤ ပတၢ်အိၣ်သးတဖၣ်လၢတၢ်ထံၣ်လၢ တၢ်လီၤထူလီၤယိာ်တမံၤ သ့ၣ်ညါ က့ၤလၢ‚ ပတၢ်နးတၢ်ဖီှၣ်တဖၣ် မ့ၢ်ဒၣ်တၢ်တစိၢ်တလီၢ် (း၁၃-၁၆) န့ၣ်လီၤႉ
တၢ်ပညိၣ်တၢ်လၢကျဲလၢအနးဒီးကီခဲဆူ တၢ်ကထီၣ်သးသမူ အတၢ်ဒူၣ်မ့ၢ်တၢ်လၢ အBတီဃာ်ပှၤ‚ လၢတၢ်နာ်န့ၢ်တၢ်လၢ ကစၢ်ယွၤစိာ်ခီဖျိကွံာ်ပှၤသ့၀ဲန့ၣ်လီၤႉ ဘၣ်ဆၣ်‚ ခီဖျိ တၢ်သ့ၣ်ညါလၢအ၀ဲအိၣ်ဒီးပှၤ‚ ပမၤဂၢၢ်ကျၢၤထီၣ် ပပျံၤလၢ အတလီၤတံၢ်လီၤဆဲး ခီဖျိ တၢ်နာ်‚ ဖဲပနာ်န့ၢ်ယွၤလၢကမၤစၢၤပှၤလၢ ကမၤနၢၤကွံာ် တၢ်ကီတၢ်ခဲလၢ တဘျီ ဖျါလၢအကဲထီၣ်တသ့၀ဲဘၣ်န့ၣ်လီၤႉ