လ့လ့ၣ်‚ ပှၤကွဲၤကျိးလံာ်စီဆှံတဂၤ‚ ဒိးထီၣ်ကဘီယူၤလၢ ကက့ၤဆူ အထံအကီၢ် န့ၣ်လီၤႉဖဲအတုၤလၢကဘီယူၤသန့န့ၣ် အ၀ဲဘၣ်တၢ်ပာ်ဃာ်အီၤန့ၣ်လီၤႉ အလီတဲစိ ဘၣ်တၢ်သမံသမိး ဒီးဖဲပှၤဘၣ်မူဘၣ်ဒါထံၣ်ဘၣ် တၢ်တ့ၢ်နုာ်လံာ်စီဆှံအသီလၢ အကွဲးကျိး၀ဲ၀ံၤ‚ အ၀ဲသ့ၣ် ဟံးန့ၢ်လီတဲစိအံၤ ဒီးစးထီၣ်သံကွၢ်သံဒိးအီၤလၢ ခံနၣ်ရၠာစးၣ်အတီၢ်ပူၤလၢ တၢ်ဂ့ၢ်အံၤန့ၣ်လီၤႉ လၢတၢ်အကတီၢ်တတီၤ‚ အ၀ဲဘၣ်တၢ်ဃ့အီၤ လၢကအိးထီၣ် တၢ်လၢ အဘၣ်ထွဲဒီးလံာ်စီဆှံလၢ အတ့ၢ်နုာ်ဃာ်၀ဲ‚ ဒီးဖဲန့ၣ် လံာ်စီဆှံအဆၢလၢ အဟဲဖျါထီၣ်မ့ၢ်လံာ်မးသဲ ၇း၁-၂ လၢအမ့ၢ်‚ ‘‘ဒ်သိးသုသုတဘၣ်တၢ်စံၣ်ညီၣ်သုလၢ တၢ်စံၣ်ညီၣ်လၢ သုစံၣ်ညီၣ်တၢ်န့ၣ်လီၤႉ ဒီးသုကဘၣ်တၢ်ဃီၣ်န့ၢ်သုလၢ တၢ်ဃီၣ်လၢသုဃီၣ်တၢ်န့ၣ်လီၤ’’ႉ ဖဲပှၤဘၣ်မူဘၣ်ဒါအကျါတဂၤ နၢ်ဟူဘၣ်လံာ်စီဆှံအဖျၢၣ်တဖၣ် လၢအကလုာ်ဒၣ်၀ဲအကျိာ်‚ ဖျါလီၤသံလီၤ၀ါဘၣ်အသးန့ၣ်လီၤႉ လၢခံ‚ အ၀ဲဘၣ်တၢ်ပျဲပူၤဖျဲးကွံာ်အီၤလၢ တၢ်တဟံးန့ၢ်တၢ်မူးတၢ်ရၠာစးၢ်ဆူညါနီတမံၤဘၣ်လီၤႉ
ပတသ့ၣ်ညါတၢ်လၢအဟဲအိၣ်ထီၣ်လၢ ပှၤဘၣ်မူဘၣ်ဒါလၢ ကဘီယူၤပျီအံၤ အသးပူၤဘၣ်ဆၣ်‚ ပသ့ၣ်ညါလၢ ‘ယွၤအတၢ်ကတိၤလၢအဟဲထီၣ်လၢ အထးခိၣ်ႉႉႉ တဟဲက့ၤကဒါက့ၤဆူအအိၣ် ကလီကလီဘၣ်’ (ယ့ှှါ ၅၅း၁၁) ႉ မ့မ့ၢ် တၢ်အံၤ ကမၤလၢပှဲၤတၢ်လၢ ကစၢ်ယွၤသးအိၣ်မၤ၀ဲန့ၣ်လီၤႉ ၀ံယ့ှှါယၤ တဲဖျါထီၣ်၀ံ အတၢ်ကတိၤလၢ ပဘၣ်ထွဲဒီးတၢ်မုၢ်လၢ် ဆူကစၢ်ယွၤအပှၤဂီၢ်မုၢ်တဖၣ်‚ ဖဲအအိၣ်လၢ တၢ်စိာ်မၢကဲကုၢ်‚ မၤလီၤတံၢ်အ၀ဲသ့ၣ်လၢ မူခိၣ်ထံဒီးမူခိၣ်ဖီတဖၣ်လၢ အဟဲလီၤဆူ ဟီၣ်ခိၣ်‚ မၤဘၣ်စီၣ်ဟီၣ်ခိၣ်ဒီး ဒုးမဲထီၣ်ဖးထီၣ်တၢ်‚ ဒ်န့ၣ်အသိး‚ တၢ်ကတိၤလၢအဟဲဟးထီၣ်လၢယွၤအထးခိၣ် ကမၤလၢပှဲၤတၢ်လၢအတိာ်၀ဲတဖၣ် (း၁၀-၁၁) န့ၣ်လီၤႉ
ပဖးလံာ်စီဆှံအဆၢအံၤ ဒ်သိးကမၤဆူၣ်ထီၣ်ဂ့ၤထီၣ် ပတၢ်နာ်န့ၢ်တၢ်လၢ ယွၤအပူၤသ့၀ဲန့ၣ်လီၤႉ ဖဲပအိၣ်လၢတၢ်အိၣ်သးလၢတၢ်တသးအိၣ် ဆီတလဲတၢ်ကတီၢ်‚ ဒ်လ့လ့ၣ်ဒီးပှၤဘၣ်မူဘၣ်ဒါလၢကဘီယူၤပျီအသိး‚ မ်ပကနာ်န့ၢ်ကစၢ် တၢ်လၢကစၢ်ယွၤအံၤ မၤတၢ်တုၤဒၣ်လဲာ်လၢ ပမ့ၢ်တထံၣ်ဘၣ်ဒံး တၢ်အစၢလၢ ကဟဲဖျါထီၣ်လၢ တၢ်အကတီၢ်လၢခံကတၢၢ်န့ၣ်လီၤႉ