ပိာ်မုၣ်တဂၤ ကဒူးကဒ့ၣ်တၢ်ဆူအတၢ်အိၣ်ဖှိၣ်သရၠာစးၣ် အဖီခိၣ်‚ လၢအ၀ဲပာ်သူၣ်ပာ်သး ဘၣ်လၢ‚ အသရၠာစးၣ် အတၢ်ကစီၣ်လၢ အတဲဖျါထီၣ်တၢ်ဂ့ၢ်န့ၣ် တဘျီ၀ံၤတဘျီန့ၣ်လီၤႉ အ၀ဲသံကွၢ်ကွၢ် အသရၠာစးၣ်လၢ ‘‘ဘၣ်မနုၤလၢနဘၣ်တဲတၢ်ဒ်န့ၣ်အသိးလဲၣ်’’ ဒီး အသရၠာစးၣ်န့ၣ် စံးဆၢက့ၤအီၤလၢ‚ ‘‘ပှၤဂီၢ်မုၢ်သးပ့ၤနီၣ်တၢ်’’ အဃိန့ၣ်လီၤႉ
တၢ်ဂ့ၢ်အိၣ်၀ဲအါမံၤလၢ ပသးပ့ၤနီၣ်ဘၣ်တၢ် – တၢ်ဆၢကတီၢ်‚ သးအနံၣ် အလါပှၢ်ထီၣ် မ့တမ့ၢ် ပတၢ်မၤအါကဲၣ်ဆိးအဃိန့ၣ်လီၤႉ ပသးပ့ၤနီၣ်ဘၣ် နီၣ်ဂံၢ်ခူသူၣ် တဖၣ်‚ ပှၤအမံၤအသၣ် မ့တမ့ၢ် တုၤဒၣ်လဲာ်လၢမ့ၢ် ပဆိကတီၢ်ဃာ် ပသိလ့ၣ်လၢတၢ်လီၢ်မတၤန့ၣ်လီၤႉ ယ၀ၤစံး၀ဲလၢ‚ ‘တၢ်အိၣ်၀ဲအါမံၤလၢ ယဘၣ်တ့ၢ်နုာ်လၢ ယခိၣ်နူာ်အပူၤန့ၣ်လီၤႉ တချုးလၢ ယကသ့ၣ်နီၣ်ထီၣ်က့ၤ တၢ်ဂ့ၢ်အသီတမံၤ‚ အဆိယဘၣ်ထူးသံကွံာ်တၢ်လၢ အအိၣ်လၢ ယခိၣ်နူာ်ပူၤန့ၣ်လီၤ’ႉ
တၢ်အိၣ်ဖှိၣ်သရၠာစးၣ်အတၢ်စံးဆၢအံၤ မ့ၢ်တၢ်လၢအမ့ၢ်၀ဲတီ၀ဲန့ၣ်လီၤႉ ပှၤဂီၢ်မုၢ် တဖၣ် သးပ့ၤနီၣ်တၢ်လီၤႉ လၢတၢ်အံၤအဃိ‚ တလီၢ်လီၢ်ပလိၣ်ဘၣ်လၢ ပှၤကဒုးသ့ၣ်နီၣ် ထီၣ်က့ၤပှၤ ဒ်သိးကမၤစၢၤပှၤလၢ ကသ့ၣ်နီၣ်ထီၣ်တၢ်လၢ ယွၤမၤတ့ၢ်၀ဲလၢပဂီၢ်န့ၣ်လီၤႉ ပှၤအံၣ်စရၠာစး့လးဖိတဖၣ်စ့ၢ်ကီး အိၣ်ဒီးတၢ်လၢအလီၤပလိာ်ဒီးတၢ်အံၤန့ၣ်လီၤႉ ဖဲလၢအ၀ဲသ့ၣ် မ့ၢ်ထံၣ်ဘၣ် တၢ်လီၤလးအါမံၤမၤအသးဒၣ်လဲာ်‚ အ၀ဲလိၣ်ဘၣ်ဒံး တၢ်ဒုးသ့ၣ်နီၣ် ထီၣ်တၢ်လၢ‚ ယွၤအတၢ်ကဟုကယာ်တၢ်လၢ အ၀ဲသ့ၣ်အဂီၢ်န့ၣ်လီၤႉ
လၢလံာ် ၅ မိၤဒီးအပူၤ ကစၢ်ယွၤဒုးသ့ၣ်နီၣ်ထီၣ် ပှၤအံၣ်စရၠာစး့လးဖိတဖၣ်လၢ‚ အ၀ဲပျဲအ၀ဲသ့ၣ် ဒ်သိးကလဲၤခီဖျိဘၣ် တၢ်သူၣ်၀ံၤသၣ်စ့ၤလၢပှၢ်မုၢ်ကနၢ ဘၣ်ဆၣ်‚ လၢခံအ၀ဲဟ့ၣ်လီၤတၢ်အီၣ်လၢအလီၤဘီလီၤမုၢ်ဒီး လီၤလးလၢ အမ့ၢ်ကိၣ်မၤနၤလၢ အ၀ဲသ့ၣ်အဂီၢ် ကိးနံၤန့ၣ်လီၤႉ အ၀ဲဟ့ၣ်လီၤတၢ်ကူတၢ်ကၤလၢ အတလီၢ်လံၤနီတစုန့ၣ်လီၤႉ ကစၢ်ယွၤဆှၢအ၀ဲသ့ၣ်လၢ ပှၢ်မုၢ်ကနၢလၢ အအိၣ်ဒီးဂုၢ်သ့ၣ်ဒီးပတ့ၤချဲးတဖၣ် ဒီးကတဲာ် ကတီၤ ထံလၢလၢၢ်တဖျၢၣ်အပူၤန့ၣ်လီၤႉ အ၀ဲသ့ၣ်မၤလိန့ၢ်တၢ်ဆီၣ်လီၤသး‚ ဖဲလၢမ့ၢ် သ့ၣ်ညါနီၢ်နီၢ်လၢ ကဘၣ်သန့ၤထီၣ်သးလၢာ်လၢာ်ဆ့ဆ့လၢ ကစၢ်ယွၤအဖီခိၣ်ဒီး တၢ်မၤပှဲၤတၢ်လၢအအိၣ်တဖၣ် (း၂-၄‚ ၁၅-၁၈) န့ၣ်လီၤႉ
ယွၤ ‘‘အတၢ်မ့ၢ်တၢ်တီအိၣ်၀ဲအစိၤစိၤအဃၣ်ဃၣ်လီၤ’’ (စံး ၁၀၀း၅) ႉ တဘျီလၢ်လၢ်‚ ဖဲလၢပမ့ၢ်ထံၣ်လီၤပသး လၢပသးပ့ၤနီၣ်ဘၣ်တၢ်‚ ပဆိကမိၣ်ထီၣ်က့ၤကျဲ တဖၣ် လၢ အ၀ဲစံးဆၢပတၢ်ထုကဖၣ်သ့၀ဲ ဒီးတၢ်အ၀ဲန့ၣ် မ့ၢ်တၢ်လၢအဒုးသ့ၣ်နီၣ်ထီၣ်က့ၤပှၤ‚ လၢကစၢ်ယွၤအတၢ်ဂ့ၤတၢ်၀ါ ဒီးအတၢ်အၢၣ်လီၤတဖၣ် လၢအမ့ၢ်၀ဲတီ၀ဲ လီၤစိၤလီၤထီ န့ၣ်လီၤႉ