ဒၢးအံၤ တကပီၤကဲၣ်ဆိးဒီး ဘရၣ်ဘှီၣ်န့ၣ်လီၤႉ ယထုးထီၣ်လီၢ်ဆ့ၣ်နီၤလၢ အအိၣ်ဘူးဒီး ကၠဲးခံၣ်အလီၢ်မံခးကပၤန့ၣ်လီၤႉ တချုးလၢယတံၤသကိးအံၤ ဘၣ်သဂၢၢ်ဒီး တၢ်ဆါ ခဲစၢၣ်‚ လၢအပူၤကွံာ်သၢနံၣ်န့ၣ် အ၀ဲမ့ၢ်ပှၤတဂၤလၢအပှဲၤဂံၢ်ပှဲၤဘါလီၤႉ ယထံၣ်မှံက့ၤ အ၀ဲအိၣ်ဒီးတၢ်နံၤတၢ်အ့‚ မဲာ်ချံလၢအကပီၤ‚ အမဲာ်အိၣ်ဒီးတၢ်နံၤကမှံန့ၣ်လီၤႉ အခဲအံၤ‚ အ၀ဲအိၣ်ဘရၣ်ဒီး ဂၢၢ်တပၢၢ်ဒီး ယလဲၤအိၣ်သကိးအီၤလၢတၢ်ဆါဒၢးလီၤဆီလၢ အဘၣ် တၢ်ကဟုကယာ်အီၤအလီၢ်န့ၣ်လီၤႉ
လၢတၢ်တသ့ၣ်ညါလၢ ယကဘၣ်တဲအီၤတၢ်မနုၤန့ၣ်ဒီး ယဆၢတဲာ်လၢ ယကဖးန့ၢ်အီၤ လံာ်စီဆှံန့ၣ်လီၤႉ ယထုးထီၣ် ယလံာ်စီဆှံဒီး အိးထီၣ် လံာ် ၁ ကရၠာစးံၣ်သူး ဒီးစးထီၣ်ဖးတၢ်အံၤန့ၣ်လီၤႉ
ဖဲယလဲၤအိၣ်သကိးအီၤ၀ံၤ‚ ယကဟဲက့ၤဆူ တၢ်လီၢ်လၢ ယပာ်သိလ့ၣ်န့ၣ် ယသးအုးဒီး ယဟီၣ်၀ဲတဂၤဧိၤအခါ တၢ်ဆိကမိၣ်တခါလၢ နကထံၣ်ဘၣ်ကဒီးအီၤ တဘျီဒံးန့ၣ် ဟဲနုာ်လီၤလၢ ယသးပူၤဒီး ယမဲာ်ထံလၢ အယွၤလီၤ၀ဲတဖၣ် ကတၢၢ်ကွံာ်၀ဲန့ၣ်လီၤႉ ပဘၣ်တၢ်လုၣ်ဘၢပှၤလၢ တၢ်သးအုးဒီး ပသးပ့ၤနီၣ်ဘၣ်လၢ တၢ်သံအံၤန့ၣ် မ့ၢ်ဒၣ်တၢ်တစိၢ်တလီၢ်လၢ ပှၤစူၢ်က့ၤနာ်က့ၤတၢ်တဖၣ်အဂီၢ်ဧိၤ (၁ ကရၠာစးံၣ် ၁၅း၂၁-၂၂) န့ၣ်လီၤႉ ယသ့ၣ်ညါလၢ ယကထံၣ်ဘၣ်က့ၤအီၤကဒီးတဘျီ မ့ၢ်လၢ ပ၀ဲခံဂၤလိာ် ပစူၢ်ပနာ် ကစၢ်ယ့ၣ့်ှှူးအတၢ်သံ ဒီးတၢ်ဂဲၤဆၢထၢၣ်သမူထီၣ်က့ၤလၢ အပျၢ်ကွံာ် ပတၢ်ဒဲးဘး (း၃-၄) န့ၣ်လီၤႉ ဖဲကစၢ်ယ့ၣ့်ှှူးဂဲၤဆၢထၢၣ်သမူထီၣ်က့ၤ ဖဲအဘၣ်တၢ်ပျၤထီအီၤလၢ ထူၣ်လိၤ၀ံၤ‚ တၢ်သံတအိၣ်ဒီး အစိကမီၤ ဒ်သိးကမၤလီၤဖး ပှၤစူၢ်က့ၤနာ်က့ၤတၢ်တဖၣ် တဂၤဒီးတဂၤမ့ၢ်ဂ့ၤ‚ ဒီးလၢကစၢ်ယွၤမ့ၢ်ဂ့ၤလၢၤဘၣ်ႉ ဖဲပသံ၀ံၤ‚ ပကမူဘၣ်ကဒီးလၢ မူခိၣ်ဘီမုၢ် ဃုာ်ဒီးကစၢ်ယွၤ ဒီးပဒီပုၢ်၀ဲၢ်လၢသူၣ်လၢသး တဖၣ် လီၤစိၤလီၤထီန့ၣ်လီၤႉ
မ့ၢ်လၢတနံၤအံၤ ကစၢ်ယ့ၣ့်ှှူးမူ၀ဲအဃိ‚ ပှၤစူၢ်က့ၤနာ်က့ၤ တၢ်တဖၣ် လၢအ၀ဲ အပူၤအိၣ်ဒီးတၢ်မုၢ်လၢ် ဖဲတၢ်လီၤမၢ်ဒီးတၢ်သးအုးအကတီၢ်တဖၣ်န့ၣ်လီၤႉ တၢ်သံဘၣ် တၢ်ယူၢ်လီၤကွံာ်လၢတၢ်မၤနၢၤ လၢထူၣ်စုညါ (း၅၄) န့ၣ်လီၤႉ