ပှၤလၢအလဲၤဟးကွၢ်ကီတၢ်တဖၣ်‚ ထီၣ်ဘၣ်ဃီသွါ ၂၅၉ သွါ ဒ်သိးကတုၤဘၣ်ဆူ တၢ်သူၣ်ထီၣ်အခိၣ်ဒုးဖျၢၣ်သလၢၣ်လၢ ၀့ၢ်လိဒိၣ်‚ စ့းဖီလ်ကသံၣ်ြဒဲၣ် အပူၤန့ၣ်လီၤႉ တၢ်လီၢ်အံၤ မ့ၢ် ‘‘တၢ်ကလုၢ်ကသွံဒံလၢ တၢ်ကွၢ်ကီဒၢး’’ န့ၣ်လီၤႉ နမ့ၢ်တုၤဖဲအံၤဒီး တၢ်ကလုၢ်လၢ ကတိၤကသွံကသွါတၢ်ဒၣ်လဲာ် ဘၣ်တၢ်နၢ်ဟူအီၤသ့ လၢပှၤအဂၤတဂၤ လၢအအိၣ်လၢ တၢ်လီၢ်အံၤတတီၤတီၤ‚ ဒီးတုၤဒၣ်လဲာ်လၢ တၢ်လီၢ်လၢအယိာ် ဒီးလဲၢ်လၢအစီၤစုၤ ပ့ၣ်လၢအကယၤန့ၣ်လီၤႉ ပှၤအ့ၣ်ကၠံနယၢၣ်တဖၣ် စံးလၢ တၢ်အံၤ မ့ၢ် တၢ်သူၣ်ထီၣ်အခိၣ်ဖျၢၣ်သလၢၣ်လၢ အက့ၢ်အဂီၤက၀ီၤအဃိ‚ တၢ်အသီၣ်ကပၢၤဒီး တၢ်နၢ်ဟူကသွံဒံတၢ်သ့၀ဲန့ၣ်လီၤႉ
မ့ၢ်ပဆၢမုၢ်လၢ်လၢ ကစၢ်ယွၤကနၢ်ဟူ ပတၢ်ကိးထီၣ်အီၤ ဖဲပတူၢ်ဘၣ်တၢ် ထဲလဲၣ်န့ၣ်ဧါႉ ထါစံးထီၣ်ပ့တၢၤအဆၢဒိၣ်တဖၣ် ပှဲၤ၀ဲဒီး တၢ်အုၣ်သးလၢ ကစၢ်ယွၤ နၢ်ဟူ ပတၢ်ကိးထီၣ်အီၤ‚ ပကိးပသူထီၣ်‚ ပတၢ်ထုကဖၣ် ဒီးပတၢ်ဃ့ထုကဖၣ် ကသွံဒံဖိတဖၣ်န့ၣ်လီၤႉ စီၤဒၤ၀ံးပာ်ဖျါထီၣ်လၢ ‘‘တုၤယဘၣ် တၢ်ကိၢ်တၢ်ဂီၤဒီး ယကိးထီၣ်ယွၤဒီး ယဃ့ကညးတၢ်လၢ ယကစၢ်လီၤ’’ (စံး ၁၈း၆) ႉ တဘျီဘၣ်တဘျီအ၀ဲဒီး ပှၤကွဲးထါ အဂုၤအဂၤတဖၣ် ဃ့သကွံၢ်ကညးတၢ်လၢ ‘ကနၣ်ယကလုၢ်တက့ၢ်’ (၄း၁) ႉ ယကလုၢ် (၅း၃) ‚ ‘တၢ်ကအုကစွါ’ (၁၀၂း၂၀) န့ၣ်လီၤႉ တဘျီဘျီ‚ တၢ်ပာ်ဖျါအံၤ မ့ၢ်တၢ်လၢ အအါန့ၢ်ဒံး တၢ်ဃ့ကသွံဒံတခါလၢ ‘ဒိကနၣ်ယကလုၢ်’ (၇၇း၁) ‚ ဖဲ ‘ယဆိကမိၣ်တၢ်လၢ ယသးဒီးယသးဃုတၢ်သပှၢ်ပှၢ်လီၤ’ (၇၇း၆) ႉ
လၢတၢ်ဒိးန့ၢ်တၢ်စံးဆၢလၢ တၢ်သကွံၢ်ကညး‚ ပှၤကွဲးထါစံးထီၣ်ပ့တၢၤ တဖၣ် ဒ်စီၤဒၤ၀ံးလၢ ထါစံးထီၣ်ပ့တၢၤ ၁၈း၆ အသိး‚ လီၣ်ဖျါထီၣ်တၢ်လၢ ကစၢ်ယွၤ ဒိကနၣ်တၢ်‚ လၢအတၢ်လုၢ်ဟံၣ် အ၀ဲနၢ်ဟူယကလုၢ်‚ ယတၢ်ဃ့သကွံၢ်ကညးတၢ် လၢအမဲာ်ညါဒီး ဒိကနၣ်’ ၀ဲန့ၣ်လီၤႉ နီၢ်နီၢ်တခီ‚ အကတီၢ် ဖဲန့ၣ် တၢ်တသူၣ်ထီၣ်ဒံး တၢ်လုၢ်ဟံၣ်အဃိ‚ စီၤဒၤ၀ံး ကနဲၣ်တၢ်ဆူကစၢ်ယွၤလၢ အအိၣ်လၢမူခိၣ်‚ ကဒိကနၣ် တၢ်လၢအ၀ဲကိးသBတီထီၣ်၀ဲန့ၣ်လီၤႉ
လၢကစၢ်ယွၤ အ‘တၢ်ကလုၢ်ကသွံဒံလၢ တၢ်ကွၢ်ကီဒၢး’ လၢမူခိၣ်လီၢ်ထီၣ်ထီ‚ အ၀ဲဒိးအနၢ် ဆူပတၢ်ကအုကစွါလၢ အ၀းထဲပနိးဖံးတဖၣ်ဒီး တုၤဒၣ်လဲာ်လၢ ပတၢ်ဃ့ကသွံဒံတဖၣ်န့ၣ်လီၤႉ တနံၤအံၤ‚ မ့ၢ်နဆၢမုၢ်လၢ် ကတိၤကသွံတၢ်မနုၤဆူ ကစၢ်ယွၤ အအိၣ်န့ၣ်လဲၣ်ႉ