တံးဖၣ်နံၣ် ဖုသံနီၣ်ထီၣ်ဒီး ထံၣ်လီၤအသးလၢ အအိၣ်ဘၣ်လၢတၢ်ခံးသူလၢ ခဲနဒၢ်ကၠဲး ကဘီယူၤတဘ့ၣ်ပူၤန့ၣ်လီၤႉ လၢအလိၤ‚ အိၣ်ဒံးဒီးယီၢ်တကိးလၢ အထီဃာ်ဒံးအသး ဒီးအ၀ဲမံသပ့ၤ ဖဲပှၤလဲၤတၢ်ဖိအဂုၤအဂၤလၢ တၢ်သူၣ်ဟူးသးဂဲၤအပူၤ စံၣ်လီၤလၢ ကဘီယူၤ‚ ဖဲကဘီယူၤစီၢ်လီၤန့ၣ်လီၤႉ ဘၣ်မနုၤလၢ‚ ပှၤတအိၣ်၀ဲနီတဂၤ လၢကကိးပၢၤ လီၤအီၤန့ၣ်လဲၣ်ႉ အ၀ဲလဲၤတုၤလၢ တၢ်လီၢ်အံၤ ဒ်လဲၣ်ႉ အ၀ဲ၀ံး၀း အခိၣ်နူာ်လၢအသဘံၣ်ဘုၣ် ဒ်ကပီၤဒၢဒီး ဂုာ်ကျဲးစၢးဆူ တၢ်ကသ့ၣ်နီၣ်ထီၣ်တၢ်အဂီၢ်လီၤႉ
မ့ၢ်နထံၣ်လီၤနသးလၢ နအိၣ်ဘၣ်လၢ တၢ်လီၢ်တတီၤလၢ နတမုၢ်လၢ်ဘၣ်၀ဲ န့ၣ်ဧါႉ နသးစၢ်ဒံးလၢ နကဒိးန့ၢ်တၢ်ဆါအံၤဒီး ကသံၣ်တအိၣ်နီတမံၤလၢ တၢ်ကယါဘျါနၤ‚ နတၢ်ကွၢ်ကဒါက့ၤ လၢခံကတၢၢ်တဘျီအံၤ ဂ့ၤ၀ဲဒိၣ်နီၢ်မးဒီး ဘၣ်မနုၤလၢ နလီၢ်နလၤဘၣ်တၢ်သုးကွံာ်အီၤ‚ နမ့ၢ်ပှၤလၢ အသးခုဘၣ် နံၣ်အဂ့ၤကတၢၢ်တဖၣ်လၢ နတၢ်ဆီဟံၣ်ဆီဃီအပူၤဒီး အခဲအံၤ နဘၣ်စးထီၣ်ကဒီးက့ၤတဘျီ ဒ်မိၢ်^ပၢ်ထဲတဂၤဧိၤလၢအဘၣ်ကွၢ်က့ၤအဖိဃုာ်ဒီး ခီဖးတၢ်မၤတမံၤ လၢ တၢ်ဘၣ်မၤအီၤ တဖၣ်န့ၣ်လီၤႉ
မ့ၢ်ယတုၤဖဲအံၤဒ်လဲၣ်ႉ စီၤယိၤဘး ကကမၢကမၣ်ဘၣ်သ့ၣ်သ့ၣ် ဖဲ ‘အဆ့ၣ်နီၤ၀ဲ လၢဖၣ်ဆါအကျါ’ (ယိၤဘး ၂း၈) န့ၣ်လီၤႉ အ၀ဲလီၤမၢ်ဘၣ်လၢ အဖိတဖၣ်သံကွံာ်‚ တၢ်ထူးတၢ်တီၤဒီး အတၢ်အိၣ်ဆူၣ်အိၣ်ခ@န့ၣ်လီၤႉ အ၀ဲတယာ်က့ၤ၀ဲဒၣ်လဲာ် တမ့ၢ် ကသ့၀ဲလၢအ၀ဲဘၣ်တုၤလၢ တၢ်လီၢ်ဒ်သိးအံၤ‚ အ၀ဲသ့ၣ်ညါထဲဒၣ်ဆူ တၢ်သ့ၣ်နီၣ်ထီၣ်တၢ်ဧိၤ န့ၣ်လီၤႉ
စီၤယိၤဘးသ့ၣ်နီၣ်ထီၣ် ပှၤလၢအတ့လီၤအီၤ ဒီးကစၢ်ယွၤလၢအတ့လီၤအီၤ အံၤ မ့ၢ်ကစၢ်လၢ အဂ့ၤ၀ဲလၢအဂီၢ် ဒ်လဲၣ်န့ၣ်လီၤႉ အ၀ဲစံးဘၣ် အမါလၢ ‘ပဒိးန့ၢ်မး တၢ်ဂ့ၤ လၢ ယွၤအစုပူၤဒီး ပတဒိးန့ၢ်ဘၣ်တၢ်အၢဘၣ်ဧါ’ လီၤ (း၁၀) ႉ စီၤယိၤဘးသ့ၣ်နီၣ်ထီၣ်လၢ ကဂံၢ်ထီၣ် ယွၤလၢအဂ့ၤတဂၤ အတၢ်မၤဂ့ၤအီၤ ဒ်သိးကသးတီဒီးအီၤန့ၣ်လီၤႉ လၢတၢ် အံၤအဃိ‚ အ၀ဲကအုကစွါထီၣ်လီၤႉ အ၀ဲကိးပသူထီၣ်တၢ် လၢမူခိၣ်န့ၣ်လီၤႉ ဒီးအ၀ဲ ကအုကစွါလၢ တၢ်မုၢ်လၢ်တၢ်အပူၤန့ၣ်လီၤႉ ‘‘အဂ့ၢ်ဒ်အံၤ‚ ယသ့ၣ်ညါလၢ ယပှၤပရၤက့ၤ ယၤ တဂၤမူ၀ဲႉႉႉ ဒီးကထံၣ်ဘၣ်ယွၤလၢယဖံးယညၣ်လီၤ’’ (၁၉း၂၅-၂၆) ႉ စီၤယိၤဘး အိၣ်စဲဘူးဆူ တၢ်မုၢ်လၢ်‚ ဖဲယသ့ၣ်နီၣ်ထီၣ်တၢ်အံၤ စးထီၣ်အသးဒ်လဲၣ်ဒီး တၢ်အံၤ ကတၢၢ်၀ဲဒ်လဲၣ်န့ၣ်လီၤႉ