ဖဲဖးဖီမုၢ်ကတီၢ်‚ တၢ်အိၣ်ဖှိၣ်သရၠာစးၣ်စဲမယၢၢ် ဘဲးကၣ်ကၣ်ဒိးန့ၢ် လီတဲစိတၢ်ကိးတခါလၢ အကဟဲဆူဟံၣ်တဖျၢၣ်လၢအမ့ၢ် အတၢ်အိၣ်ဖှိၣ်ဖိအဟံၣ်လီၤႉ ဖဲအ၀ဲလဲၤတုၤ‚ အ၀ဲထံၣ် ဘၣ်လၢဟံၣ်အံၤ‚ ဘၣ်တၢ်က၀ီၤဃာ်လၢမ့ၣ်အူလီၤႉ ပၢ်တဂၤ‚ ဖဲလၢအကစၢ်ဒၣ်၀ဲ မ့ၣ်အူအီၣ်အီၤဘၣ်ဆၣ် နုာ်လီၤကဒီးက့ၤဆူ ဟံၣ်ပူၤဆူတၢ်ကမၤပူၤဖျဲးအဖိအကျါ တဂၤ ဒီးဟဲက့ၤဖျါထီၣ်ဃုာ်ဒီး အဖိမုၣ်လၢ အသူၣ်သပ့ၤသးသပ့ၤကွံာ်တဂၤန့ၣ်လီၤႉ တၢ်ဆါဟံၣ်လၢ ယူၢ်ကၣ်ဒၣ် ဒူသ၀ီၤတခီ‚ စီၤစုၤဒီးတၢ်လီၢ်အံၤ ဃုမံးလာ်လီၤႉ ဃုာ်ဒီး တၢ်၀ံတီစိာ်ဆှၢတအိၣ်နီတမံၤအဃိ တၢ်အိၣ်ဖှိၣ်သရၠာစးၣ်ဒီး ပၢ်အံၤ‚ စးထီၣ်ဃ့ၢ်စိာ် ဖိသၣ်အံၤ ဆူတၢ်ဆါဟံၣ်လီၤႉ ဖဲအ၀ဲသ့ၣ်အကျါတဂၤ မ့ၢ်လီၤဘှံးလၢတၢ်ဘၣ်ဃ့ၢ်စိာ် ဖိသၣ်မုၣ်လၢအဘၣ်ဒိ‚ အဂၤတဂၤ ဃ့ၢ်စိာ်ထီၣ်ဖိသၣ်မုၢ်အံၤလီၤႉ အ၀ဲသ့ၣ်ခံဂၤ ပာ်ဖှိၣ်မၤသကိးတၢ်လၢတၢ်လဲၤအံၤ‚ ပၢ်ဒီးဖိမုၣ်ခံဂၤလိာ်‚ ဒိးဘၣ်တၢ်ယါဘျါ ဒီး လၢခံဘျါက့ၤ၀ဲဂ့ၤဂ့ၤဘၣ်ဘၣ်လီၤႉ
ဖဲလံာ် ၂ မိၤဒီး ၁၇း၈-၁၃ အပူၤ‚ ကစၢ်ယွၤတိာ်လီၤ တၢ်မၤနၢၤဖးဒိၣ်လၢ အပၣ်ဃုာ်ဒီး တၢ်ဂုာ်ကျဲးစၢးတဖၣ်လၢ စီၤယိၤ့ှှူ‚ လၢအကဲခိၣ်ကဲနၢ် ပှၤလၢအဒုးတၢ် လၢတၢ်ဒုးပျီ‚ ဒီးစီၤမိၤဒီးလၢအယၤထီၣ်အစု ဖဲအဟံးဃာ် ကစၢ်ယွၤ အနီၣ်ထိးဘိ အကတီၢ်န့ၣ်လီၤႉ ဖဲစီၤမိၤဒီး အစုလီၤဘှံးကတီၢ် စီၤအၤဟရၠာစးိၣ်ဒီး စီၤဃူၢ်မၤစၢၤတၢ်‚ ခီဖျိ ဟံးဃာ်စီၤမိၤဒီးအစုတဖၣ် တုၤမုၢ်လီၤနုာ်တစုဒီး မၤနၢၤကွံာ် ဒုၣ်ဒါတဖၣ်န့ၣ်လီၤႉ
တၢ်လုၢ်တၢ်ပရၤလၢ တၢ်သန့ၤထီၣ်သးကဒဲကဒဲန့ၣ် တၢ်ဆိကမိၣ်ဆံးအီၤ တသ့ နီတစုဘၣ်ႉ ကစၢ်ယွၤ လၢအတၢ်သးကညီၤအပူၤ‚ ဆီၣ်ထွဲမၤစၢၤအပှၤဂီၢ်မုၢ် ထူးထူးတီၤတီၤ ဒ်အခၢၣ်စးတဖၣ်လၢ ကကဲထီၣ်တၢ်ဂ့ၤကဒဲကဒဲအဂီၢ်လီၤႉ နၢ်လၢ အဒိကနၣ်တၢ်တဖၣ်ဒီး စုလၢအမၤစၢၤတၢ်‚ တၢ်ကူၣ်သ့‚ တၢ်မၤမုာ်ထီၣ်တၢ်ဒီး တၢ်ဘှီလိၤက့ၤတၢ်‚ တၢ်ဒ်သိးအံၤဒီး တၢ်ဂံၢ်ထံးအဂုၤအဂၤတဖၣ် ဟဲဆူပအိၣ်ဒီး ဟဲခီဖျိလၢပှၤ‚ ဆူပှၤဂုၤပှၤဂၤတဖၣ်အအိၣ်န့ၣ်လီၤႉ ကစၢ်ယွၤ ဒိးဘၣ်တၢ်လၤကပီၤ ခီဖျိ ပတၢ်ပာ်ဖှိၣ်ထီၣ်သး အတၢ်မၤနၢၤန့ၣ်လီၤႉ