လၢတယံာ်ဒံးဘၣ်အဆၢကတီၢ်န့ၣ်‚ တၢ်ဂီၤမူတခါအပူၤ ပှၤလၢအဖၠဲးလီၤဆီ စံးကတိၤ တၢ် ဘၣ်ဃးလၢ ဟီၣ်ခိၣ်အတၢ်လီၤပျံၤလီၤဖုး‚ တၢ်ဟးဂူာ်ဟးဂီၤ‚ တၢ်သ့ၣ်ညါနၢ်ပၢၢ် တၢ်တအိၣ်ဒီး တၢ်ဖှီၣ်တၢ်ယာ်‚’’ ဒီး ကိးသBတီထီၣ်လၢ ကအိၣ်မူ ဒ်သိးထူတအိၣ် ယွၤတအိၣ်ဒီး တၢ်လၢအထီဒါတၢ်မ့ၢ်တၢ်တီန့ၣ်လီၤႉ ဖဲတၢ်ဆိကမိၣ်ဒ်သိးအံၤလၢ စိၤဆၢ ကတီၢ်တၢ်ဂီၤမူတဖၣ်အပူၤန့ၣ် တမ့ၢ်တၢ်လၢ အလီၤဆီဘၣ်ႉ မ့မ့ၢ် တၢ်လၢအလီၤ သးစဲန့ၣ် မ့ၢ်တၢ်အံၤကဆှၢတၢ်ဆူလဲၣ်န့ၣ်လီၤႉ လၢခံကတၢၢ်‚ ပှၤလၢအကဲခိၣ်နၢ်လၢ လုၢ်လၢ်သကဲာ်ပ၀းအံၤ‚ ဃၣ်အသးဆူကမျၢၢ်ဒီး မၢပှၤဒ်သိးပကမၤတၢ်ကိးမံၤ ဒ်သိးကဃုထံၣ်န့ၢ်တၢ်လၢ ကမၤသးခုအါထီၣ်တၢ် တဆံးတက့ၢ်လီၤႉ လၢအ၀ဲအဂီၢ် န့ၣ် အ၀ဲဟးထီၣ်ကွံာ်လၢ ထူသနူတၢ်ဒီသူၣ်ပာ်သးသ့ၣ်တဖၣ်န့ၣ်လီၤႉ
ဘၣ်ဆၣ်‚ မ့ၢ်တၢ်လၢပမၤအီၤတမံၤဂ့ၤတမံၤဂ့ၤ လၢပအဲၣ်ဒိးမၤ‚ ပမၤအီၤသ့အံၤ‚ဂ့ၤ၀ဲ့ကၢး၀ဲစ့ၢ်ကီးဧါႉ လၢတၢ်ကွၢ်ဆၢၣ်မဲာ်ဘၣ် သးသမူအတၢ်သးဟးဂီၤလၢ အလီၤပျံၤ လီၤဖုးန့ၣ် ပှၤကွဲးလံာ်စံၣ်တဲၤတဲလီၤတၢ် ဂုာ်ကျဲးစၢးတ့ၢ်လၢ ကဃုထံၣ်တၢ်သးခု ခီဖျိ တၢ်မုာ်တၢ်လၤ (စံၣ် ၂း၁‚၁၀) ‚ တိာ်လီၤမၤလီၤ တၢ်မၤဖးဒိၣ် (း၄-၆) ‚ တၢ်ကဲဒိၣ်ကဲပှၢ် (း၇-၉) ဒီးတၢ်ဃုတၢ်ကူၣ်သ့လၢ တၢ်ဆိကမိၣ်ဆိကမးတၢ် (း၁၂-၁၆) လီၤႉ ဘၣ်ဆၣ် တၢ်ကိးမံၤအံၤန့ၣ် မ့ၢ်တၢ်ကလီကလီဒီး တဂိာ်တသီၣ် (း၁၇) ၀ဲဘၣ်လီၤႉ တၢ်လၢ တၢ်ဃုထံၣ်န့ၢ်အီၤကိးမံၤအံၤ ထီဒါ၀ဲတန့ၢ်လၢ တၢ်သံ‚ တၢ်ဘၣ်ကိၢ်ဘၣ်ဂီၤ ဒီး တၢ်တတီတလိၤသ့ၣ်တဖၣ်န့ၣ်ဘၣ်လီၤ (၅း၁၃-၁၇) ႉ
ထဲတၢ်တမံၤဧိၤ‚ ဟ့ၣ်ထီၣ်တၢ်မၤဘၣ်လိာ်ဘၣ်စးက့ၤ ပှၤကွဲးလံာ်စံၣ်တဲၤတဲလီၤ တၢ် အတၢ်သးဟးဂီၤန့ၣ်လီၤႉ ဖဲပကွၢ်ဆၢၣ်မဲာ်ဘၣ် သးသမူတၢ်မၤကွၢ်ဒၣ်လဲာ်‚ ပထံၣ် န့ၢ် တၢ်လၢတၢ်ပှဲၤသ့ ဖဲယွၤအိၣ်လၢပတၢ်အိၣ်မူဒီး ပတၢ်မၤအပူၤ‚ ‘‘အဂ့ၢ်ဒ်အံၤ‚ မ့ၢ်မတၤ အီၣ်တၢ်ဒီး မ့ၢ်မတၤမုာ်လၤတၢ်ဒိၣ်န့ၢ်ယၤတဂၤလဲၣ်’’ (၂း၂၅) ႉ လၢပတၢ်အိၣ်မူအပူၤပကကလၢၢ်ဘၣ်လၢသးသမူ မ့ၢ်တၢ်ကလီကလီလီၤႉ ဘၣ်ဆၣ်‚ ပဘၣ်‘သ့ၣ်နီၣ်ထီၣ်က့ၤ ပှၤလၢအတ့လီၤပှၤ’လီၤ (၁၂း၁) ႉ လီၤဘှံးလီၤတီၤနဲလၢ နကစၢ်အတၢ်ဂုာ်ကျဲးစၢးလၢ နတၢ်အိၣ်မူအပူၤတဂ့ၤႉ မ့မ့ၢ် ‘ပျံၤယွၤဒီး တိၢ်န့ၢ်အတၢ်မၤလိာ်တက့ၢ်’ (း၁၃) ႉ
မ့တမ့ၢ်လၢ ယွၤမ့ၢ်ပကံၢ်သးအဃိဘၣ်ဒီး‚ သးသမူအတၢ်မုာ်လၤတဖၣ်ဒီး တၢ်သးအုး ကဆှၢပှၤလၢကျဲထဲတဘိလၢအမ့ၢ်တၢ်သးဟးဂီၤ‚ တၢ်သးလၢာ်ကွံာ် န့ၣ်လီၤႉ