လၢပူၤကွံာ်နံၣ်တဖၣ်‚ ယဖိခွါလၢအအိၣ်လွံၢ်နံၣ်ဖိ ဟ့ၣ်ယၤထးအကဘျံးဘူတဘ့ၣ်လၢ အဘၣ်တၢ်ကတဲာ်ကတီၤအီၤလၢ အက့ၢ်အဂီၤဒ်ပှၤအသးဖျၢၣ်ဒီးလၢ အကံၢ်သးအံၤ‚ ဘၣ်တၢ်ခဲၣ်အီၤလၢ လံာ်မဲာ်ဖျၢၣ်လၢ အမ့ၢ် ‘‘လီၤထူလီၤယိာ်’’ န့ၣ်လီၤႉ ဒီး အ၀ဲတဲထီၣ် ၀ဲလၢ‚ ‘‘မိမိၢ်ဧၢ‚ ယအဲၣ်နၤလီၤထူလီၤယိာ်လီၤ’’ႉ
ယစံးဘျုးအီၤဃုာ်ဒီး တၢ်ဖိးဟုဒီးတၢ်တဲဖျါထီၣ်လၢ ‘‘ယအဲၣ်စ့ၢ်ကီးနၤအါန့ၢ် ဒိၣ်န့ၢ်ဒံး နအဲၣ်ယၤလီၤ’’ႉ
တၢ်ဟ့ၣ်လၢတၢ်ထိၣ်တဲာ်အပရၤကလံၤတသ့အံၤ‚ မၤလီၤတံၢ်ယၤလၢယဖိခွါ အတၢ်အဲၣ်လၢ အကတၢၢ်ကတာ်တသ့ တုၤခဲအံၤတစုန့ၣ်လီၤႉ လၢမုၢ်နံၤအကီအခဲ တဖၣ်‚ ကစၢ်ယွၤစူးကါတၢ်ဟ့ၣ်လၢ အလီၤအဲၣ်လီၤကွံအံၤ‚ ဒ်သိးကမၤမုာ်ထီၣ်ပှၤ ဒီး ဟ့ၣ်ဂံၢ်ဟ့ၣ်ဘါပှၤ ဒ် ‘ယမ့ၢ်ကစၢ်လၢ အမၤဂၢၢ်မၤကျၢၤနၤ လၢယအဲၣ်ဘၣ်နၤနီၢ်နီၢ်’ အသိးန့ၣ်လီၤႉ
တၢ်ဟ့ၣ်ဖိလၢယဖိခွါအံၤ ဒုးသ့ၣ်နီၣ်ထီၣ်ယၤလၢ ယွၤအတၢ်အဲၣ်အထူ အယိာ် အတၢ်ဟ့ၣ်‚ ဒ်တၢ်ပာ်ဖျါထီၣ်လၢ လံာ်စီဆှံအပူၤဒီး မၤဂၢၢ်မၤကျၢၤ၀ဲလၢ သးစီဆှံအသိး န့ၣ်လီၤႉ ပနာ်န့ၢ်ကစၢ်ယွၤအတၢ်ဂ့ၤလၢ တဆီတလဲသး ဒီးသး၀ံၣ်စံးဘျုးစံးပ့တၢၤက့ၤ အီၤလၢ အတၢ်မၤဂၢၢ်မၤကျၢၤအတၢ်အဲၣ်အထူအယိာ်‚ ဒ်ပှၤကွဲး ထါစံးပ့တၢၤ အသိးန့ၣ် လီၤ (စံး ၁၃၆း၁) ႉ ပစံးထီၣ်ပ့တၢၤအီၤသ့‚ ဒ်အမ့ၢ်ကစၢ်လၢ အဒိၣ်န့ၢ်ထီန့ၢ်လၢ တၢ်ခဲလၢာ် (း၂-၃) ‚ အတၢ်လီၤလးလၢ အကတၢၢ်တသ့ဒီး အတၢ်သ့ၣ်ညါနၢ်ပၢၢ်လၢအဒိၣ်အယိာ် လီၤ (း၄-၅) ႉ ယွၤလၢ အအဲၣ်ပှၤလီၤထူလီၤယိာ်အံၤ မ့ၢ်ကစၢ်လၢ အတ့လီၤမူခိၣ်ဒီး ဟီၣ်ခိၣ် လၢတၢ်ကူၣ်တၢ်ဆး‚ ဒီးအပၢၤဃာ် တၢ်ကိးမံၤ (း၆-၉) န့ၣ်လီၤႉ
ပသူၣ်ခုသးခုသ့၀ဲ မ့ၢ်လၢတၢ်အဲၣ်အထူအယိာ်လၢ ပှၤကွဲးထါစံးပ့တၢၤ သး၀ံၣ်ထီၣ်အံၤန့ၣ် မ့ၢ်တၢ်အဲၣ်တမံၤဃီလၢ အအဲၣ်ပှၤလၢ အဟဲလၢပပၢ်ကစၢ်ယွၤလၢ အတ့လီၤပှၤ‚ ပၢၤဃာ်ပှၤဒီးလ ူလီၤတၢ်အဲၣ်အံၤလၢ ပတၢ်အိၣ်မူလၢ မုၢ်တနံၤအံၤအဃိ န့ၣ်လီၤႉ ပကကွၢ်ဆၢၣ်မဲာ်ဘၣ်တၢ်ဒ်လဲၣ်ဒ်လဲၣ် အတွးတအိၣ်ဘၣ်ႉ ကစၢ်လၢ အတ့ လီၤပှၤဒီး အိၣ်ဒီးပှၤ‚ ဟ့ၣ်ဂံၢ်ဟ့ၣ်ဘါစ့ၢ်ကီးပှၤအံၤ အိၣ်ဒီးတၢ်အဲၣ်တခီတၢၤဒီး တၢ်အဲၣ် လၢ အလၢ၀ဲပှဲၤ၀ဲလီၤႉ လၢတၢ်ဒုးသ့ၣ်နီၣ်ထီၣ်ပှၤလၢ တၢ်ဂံၢ်က့ၤ ဒၣ်လဲာ်တသ့လၢ နတၢ်အဲၣ်လၢ အကတၢၢ်တအိၣ်ဒီး တၢ်အဲၣ်လၢအဆီတလဲ ပတၢ်အိၣ်မူအဃိ‚ တၢ်ဘျုးလီၤ ယွၤဧၢႉ